وبلىستىق ءماسليحاتتىڭ كەزەكتەن تىس 37-ءشى سەسسياسى ءوتىپ, سەسسيانىڭ كۇن تارتىبىنە باتىس قازاقستان وبلىستىق ءماسليحاتىنىڭ 2019 جىلعى 13 جەلتوقسانداعى №32-1 «2020-2022 جىلدارعا ارنالعان وبلىستىق بيۋدجەت تۋرالى» شەشىمىنە وزگەرىستەر ەنگىزۋ تۋرالى ماسەلە قارالىپ, تالقىلاندى. بۇل تۋرالى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ حابارلايدى.
بۇل جونىندە باتىس قازاقستان وبلىسىنىڭ ەكونيميكا جانە بيۋدجەتتىك جوسپارلاۋ باسقارماسىنىڭ باسشىسى تىلەپبەرگەن كايۋپوۆ بايانداما جاسادى. قوسىمشا باياندامانى باتىس قازاقستان وبلىستىق ءماسليحاتتىڭ قارجى جانە بيۋدجەت ماسەلەلەرى بويىنشا تۇراقتى كوميسسياسىنىڭ مۇشەسى فاريد باحتيوزين جاسادى.
"2020 جىلعا ارنالعان وبلىستىق بيۋدجەتتىڭ ناقتىلانۋىنىڭ جالپى سوماسى شامامامەن 3 ملرد تەڭگەنى قۇرادى. سونىڭ ىشىندە سالىقتىق تۇسىمدەردى ۇلعايتۋ 2,2 ملرد تەڭگە, بيۋدجەتتىك باعدارلامالار اكىمشىلەرىنىڭ شىعىندارىن وڭتايلاندىرۋ ارقىلى قارجى بوساتۋ 868 ملن تەڭگە. كورسەتىلگەن وزگەرىستەر ەسەبىمەن وبلىستىق بيۋدجەت 250 ملرد تەڭگەنى قۇرايدى. ءبىرىنشى كەزەكتە شىعىندار كوروناۆيرۋسقا قارسى كۇرەس شارالارىن قارجىلاندىرۋعا جولداندى.
اتاپ ايتقاندا, كوروناۆيرۋسقا قارسى كۇرەس اياسىندا وبلىستاعى ينفەكتسيالىق جانە پروۆيزورلىق ستاتسيونارلارعا مەديتسينالىق جابدىقتاردى ساتىپ الۋعا 603 ملن تەڭگە, مەديتسينالىق تەحنولوگيالىق جابدىقتار كەشەنى بار ينفەكتسيالىق اۋرۋحانانى ورنالاستىرۋ ءۇشىن دايىن مودۋلدىك قۇرىلعىنى ساتىپ الۋ جانە بۇدان ءارى قۇرىلىس-مونتاجداۋ جۇمىستارىمەن 2 ملرد تەڭگە", - دەدى وبلىستىق ەكونوميكا جانە جوسپارلاۋ باسقارماسىنىڭ باسشىسى ءوز سوزىندە.
كەزەكتەن تىس سەسسيانىڭ كۇن تارتىبىندە وبلىستىق اۋماقتىق سايلاۋ كوميسسياسىنىڭ توراعاسى عايسا قاپاقوۆتىڭ حابارلاماسى جانە «باتىس قازاقستان وبلىسىنىڭ جاسىل ەكپەلەردى كۇتىپ ۇستاۋ جانە قورعاۋ قاعيدالارىن بەكىتۋ تۋرالى» وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارما باسشىسىنىڭ مىندەتىن اتقارۋشى بەيىمبەت ءمۋسيننىڭ, «باتىس قازاقستان وبلىسىنىڭ اۋماعىندا اۋىل شارۋاشىلىعى جانۋارلارىن جايۋدىڭ قاعيداسىن بەكىتۋ تۋرالى» وبلىستىق اۋىل شارۋاشىلىعى باسقارماسى باسشىسىنىڭ مىندەتىن اتقارۋشى جاسۇلان ءحاليۋلليننىڭ, باتىس قازاقستان وبلىسى ورال قالاسىنىڭ ەۋرازيا داڭعىلىن قايتا اتاۋ تۋرالى وبلىستىق تىلدەردى دامىتۋ باسقارماسى باسشىسىنىڭ مىندەتىن اتقارۋشى سۆەتا عانيەۆانىڭ, 2020 جىلى كوروناۆيرۋس ىندەتىمەن كۇرەستىڭ جاي-جاپسارى تۋرالى وبلىستىق دەنساۋلىق ساقتاۋ باسقارماسىنىڭ باسشىسى بولاتبەك حايۋپوۆتىڭ ەسەبى تىڭدالىپ تالقىلاندى.
سەسسياعا وبلىس اكىمى عالي ەسقاليەۆ قاتىسىپ, ءسوز سويلەدى. ول وبلىستىق بيۋدجەت, جاسىل ەكپەلەردى كۇتىپ ۇستاۋ, وبلىس اۋماعىنداعى كيىكتەرگە رەزەرۆۋار قۇرۋ جايىن ايتا كەلىپ, كوروناۆيرۋس ىندەتىنىڭ سەيىلمەگەندىگىن, اۋرۋدىڭ الدىن الۋ شارالارى جۇرگىزىلە بەرەتىندىگىن ايتتى.
"ارامىزدا ءالى دە مەيرامحانادا توي جاساۋعا رۇقسات بەرىڭىز, كوپ ادام بولمايدى. ءبىر بولمەدە تەك 30, ەكىنشى بولمەدە تاعى سونشاما ادامدى جيناپ وتكىزەمىز, - دەيتىندەر بار. بۇل دۇرىس ەمەس. ەگەر كۇنى كەشەگى جاعداي قايتالانسا, دارىگەرلەر تاعى جەتىسپەيدى. سوندىقتان بۇرىنعى داعدىدان ارىلىپ, بۇعان تۇسىنىستىكپەن قاراۋ كەرەك. ساقتانباساق, ىندەتتىڭ ءورشىپ كەتۋى مۇمكىن. ىندەتكە قارسى كۇرەستە تەك دارىگەرلەر عانا ەمەس, ەلدىڭ ءبارى اتسالىستى. تەلەفونمەن كەڭەس بەرىپ وتىرعان جاندار دا بولدى. ولاردىڭ بارىنە دە العىسىمدى بىلدىرەمىن", - دەدى ول.
وبلىس باسشىسى ءسوزىنىڭ سوڭىندا جينالعان قاۋىمدى سەسسيا جۇمىسى بارىسىندا دەپۋتاتتار شەشىمىمەن قالاداعى ەۋرازيا داڭعىلىنا ۇلى ابايدىڭ ەسىمى بەرىلۋىمەن قۇتتىقتادى.