كەزەكتى جولداۋىندا مەملەكەت باسشىسى قاسىم-جومارت توقاەۆ عىلىم سالاسىن دامىتۋ بويىنشا ۇكىمەتكە بىرقاتار تاپسىرمالار بەرىپ, بيزنەس وكىلدەرىن وسى سالاعا اتسالىسۋعا شاقىردى, دەپ حابارلايدى Egemen.kz.
"عىلىم سالاسىن دامىتۋ تۋرالى دا ايتقىم كەلەدى. بۇل ماسەلەدە بىزگە تىڭ كوزقاراس پەن جاڭا تاسىلدەر كەرەك. سونداي-اق حالىقارالىق تاجىريبەگە ارقا سۇيەۋىمىز قاجەت. ۇكىمەتكە جىل سايىن الەمنىڭ جەتەكشى عىلىمي ورتالىقتارىندا 500 عالىمنىڭ تاعىلىمدامادان ءوتۋدى قامتاماسىز ەتۋدى, سونداي-اق «جاس عالىم» جوباسى اياسىندا زەرتتەۋ جۇرگىزۋ ءۇشىن 1000 گرانت ءبولۋدى تاپسىرامىن", دەدى پرەزيدەنت.
اتالعان سالانى العا جىلجىتۋدا كاسىپورىن يەلەرىنىڭ دە ۇلەسى بولۋى كەرەكتىگىن اتاعان ق.توقاەۆ ۇلتتىق دەڭگەيدەگى ناقتى ماسەلەلەردى شەشۋدە دە عىلىمنىڭ الەۋەتىن پايدالانۋ كەرەكتىگىن اتاپ ءوتتى.
"عىلىمدى قارجىلاندىرۋدىڭ جانە قولداۋدىڭ ماڭىزدى كوزى – ءىرى كاسىپورىنداردىڭ, اسىرەسە, شيكىزات سالاسىنداعى كومپانيالاردىڭ تاپقان قاراجاتى. تاپقان تابىستىڭ 1%-ىن عىلىم مەن تەحنولوگيانى دامىتۋعا بەرۋ تۋرالى قولدانىستاعى نورما تالاپتارى ساقتالماي وتىر. كوپ جاعدايدا بۇل قاراجات كومپانيالاردىڭ ىشىندە بولىنىسكە ءتۇسىپ كەتەدى. ۇكىمەتكە وسى قاراجاتتى جيناقتاۋ ءىسىن ورتالىقتاندىرۋدى جانە ونى بيۋدجەت ارقىلى جالپىۇلتتىق عىلىمي باسىمدىققا ساي ءبولىنۋىن قامتاماسىز ەتۋدى تاپسىرامىن. ءىرى بيزنەس وكىلدەرى وڭىرلىك ۋنيۆەرسيتەتتەردىڭ عىلىمي قىزمەتىن قامقورلىققا السا نۇر ۇستىنە نۇر بولار ەدى. بىزگە ەلىمىزدە عىلىمدى دامىتۋ جونىندەگى ارناۋلى باعدارلامالىق قۇجات قاجەت. ونىڭ باستى مىندەتى – ۇلتتىق دەڭگەيدەگى ناقتى ماسەلەلەردى شەشۋدە عىلىمنىڭ الەۋەتىن پايدالانۋ بولماق", دەدى مەملەكەت باسشىسى.