موڭعول فۋتبولىنىڭ جارىق جۇلدىزى – جانسەرىك

بۇل تۋرالى اتالمىش ەلدىڭ بارلىق بۇقارالىق اقپارات قۇرالدارى جارىسا جازىپ جاتىر. سونىڭ ىشىندە SP Falcons FC سايتى "موڭعوليا فۋتبول تاريحىندا ماۋسىمارالىق ترانسفەردىڭ جاڭا رەكوردى ورنادى" دەپ جاھانعا جار سالۋدا. ناقتىراق ايتقاندا, جۋىقتا جوعارعى ليگادا ونەر كورسەتەتىن كوماندالار اراسىندا جىل سايىن وتەتىن ءداستۇرلى اۋىس-ءتۇيىس كەزىندە دەرەن كلۋبىنىڭ شابۋىلشىسى جانسەرىكتى سپ فالكونس كومانداسى 20 ميلليون موڭعول اقشاسىنا ساتىپ العان.

بۇنداي ساۋدا جوعارىدا ايتقانىمىزداي شىڭعىسحان ەلىنىڭ اياقدوپشىلار تاريحىندا بۇرىن-سوڭدى بولماعان. اشىقىراق ايتقاندا, بۇنداي باعانى ەشكىم ساتىلىپ كورمەگەن. ءسويتىپ, جانسەرىك باۋىرىمىز جاڭا كوماندانىڭ 7-ءشى ءنومىرلى جەيدەسىن كيگەن ەكەن.

وقىرماندار ايتاتىن شىعار: "موڭعول فۋتبولى ماقتانارلىق دەڭگەيدە ەمەس", دەپ ول راس. مىسالى, موڭعولدىڭ ۇلتتىق قۇراماسى فيفا توقتاتقان الەمدىك رەيتينگىدە 210 مەملەكەت اراسىنان 190-شى ورىنعا جايعاسىپتى. بىراق اتام قازاقتىڭ "جارلىنى جارلى دەمەڭىز, جارلى بايعا تەڭەلەر" دەگەنى سياقتى ءبىر كۇنى بۇلاردىڭ دا جۇلدىزى جاناتىن شىعار. كىم ءبىلسىن.

سويتە تۇرا مۇنداعى فۋتبولدىڭ كوماندالىق ويىن جۇيەسى  جوعارعى جانە ءبىرىنشى, ەكىنشى ليگالاردان تۇرادى. مۇندا بارلىعى 25 كلۋب بار. بۇلاردىڭ ارناسىنان جوعارعى ليگادا 10 كوماندا وينايدى.  جانسەرىك ءىنىمىز سوڭعى 6 جىلدان بەرى جوعارعى ليگادا ونەر كورسەتىپ ءجۇر. سونىمەن قاتار, ەلدىڭ ۇلتتىق قۇراماسى ساپىنان ويىپ تۇرىپ ورىن العان. ءتىپتى وتكەن 2019 جىلى "ۇزدىك شابۋىلشى" اتاعىن قينالماي قانجىعالاعان ەكەن.

"تۇلپارعا دا ءبىر تومار" دەگەندەي باۋىرىمىز 1999 جىلى 5 ءساۋىر كۇنى ۇلان-باتىر قالاسىندا ومىرگە كەلگەندىكتەن انا تىلىنە تىم شورقاق كورىندى. ونىڭ ۇستىنە اكەدەن ەرتە ايىرىلعان. بۋىنى بەكىمەي جاتىپ, تاعدىردىڭ سان قيلى سىناعىن باستان وتكەرىپ دە ۇلگەرىپتى. فۋتبولدان ۇلتتىق قۇراما سپورتشىلارى جايلى انىقتامالىقتا: پوزيتسياسى – شابۋىلشى, بويىنىڭ بيىكتىگى – 176 سم, سالماعى – 64 كەلى ت.ب. دەلىنىپتى. فۋتبولدى 2008 جىلى 9 جاسىندا دەرەن كلۋبىنىڭ اكادەمياسىندا باستاپ, 16 جاسىندا ۇلتتىق قۇراما ساپىنا الىنىپ, سودان بەرى جوعارى ليگادا دوپ تەۋىپ ءجۇر.

باۋىرىمىزبەن تەلەفون ارقىلى تىلەسكەنىمىزدە, فۋتبول ويناۋمەن قاتار ۇلان-باتىرداعى ۇلتتىق ۋنۆەرسيتەتتە وقىپ جۇرگەنىن ايتىپ قالدى. "اتامەكەن قازاقستانىڭدى كەلىپ كورمەيسىڭ بە؟" دەگەن ءبىزدىڭ ءوتىنىش-سۇراعىمىزدا: "ول مەنىڭ تىرىدەگى ارمانىم", دەپ قىسقا قايىردى.