كونستيتۋتسيا كۇنى قارساڭىندا 33 وتباسى جاڭا قونىسقا كوشىپ, قۋانىشقا كەنەلدى. جاڭا پاتەرلەر اتىراۋ قالاسىنداعى "نۇرسايا" ىقشام اۋدانىندا بوي كوتەرگەن 9 قاباتتى تۇرعىن ۇيدەن بەرىلدى. باسپانا العانداردىڭ دەنى – 2013 جىلدان بەرى تۇرعىن ءۇي كەزەگىنە تىركەلگەن كوپبالالى وتباسىلار, دەپ حابارلايدى Egemen.kz
"بۇل – "نۇرلى جەر" باعدارلاماسى اياسىندا جالعا بەرىلگەن پاتەرلەر. اتالعان باعدارلاما اياسىندا جىل باسىنان بەرگى 8 ايدا جاڭا باسپانا العان وتباسىلاردىڭ سانى 257-گە جەتتى", دەدى اتىراۋ قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ سەكتور مەڭگەرۋشىسى رافحات جولديەۆ.
ونىڭ ايتۋىنا قاراعاندا, جىل اياعىنا دەيىن تۇرعىن ءۇي كەزەگىندە تۇرعاندارعا جاڭا پاتەرلەر بەرىلەدى. سونداي-اق, اپاتتى جاعدايداعى جاتاقحانالاردىڭ تۇرعىندارى دا جاڭا مەكەنگە كوشىرىلەدى.