وبلىس اكىمى ەتنومادەني بىرلەستىك جەتەكشىلەرىمەن كەزدەستى

ايماقتا بۇگىندە 35-كە جۋىق ەتنوس وكىلدەرىنەن قۇرالعان 809 مىڭنان استام ازامات بەرەكەلى بىرلىك پەن تاتۋ-ءتاتتى ءومىر سۇرۋدە. وبلىستىق اسسامبلەيادا 11 ەتنومادەني, اۋدانداردا 6 ەتنو باعىتتاعى ۇكىمەتتىك ەمەس ۇيىمدار, 118 انالار كەڭەسى, 165 قوعامدىق كەلىسىم كەڭەسى جۇمىس جۇرگىزەدى. سونىمەن بىرگە عىلىمي-ساراپشىلىق توپ, مەدياتسيا كابينەتى, "قازاقستان حالقى اسسامبلەياسى" كافەدراسى, دەپۋتاتتىق جانە كاسىپكەرلەر توبى, جۋرناليستەر مەن ساراپشىلار كلۋبى, "جاڭعىرۋ جولى" جاستار قوزعالىسى, قايىرىمدىلىق باعىتىندا ۇيلەستىرۋشىلىك جانە قولداۋ كورسەتۋ مەن ۆولونتەرلىك ورتالىقتارى جۇيەلى جۇمىس جۇرگىزۋدە.

جىل باسىندا باستالعان پاندەميا كەزىندە اسسامبلەيانىڭ باستاماسىمەن 5 مىڭعا جۋىق مەديتسينالىق ماسكا تاراتىلىپ, وبلىستىق جۇقپالى اۋرۋلار اۋرۋحاناسىنا جاردەم جاسالدى. سونىمەن قاتار, "مىڭ العىس!" جالپىۇلتتىق اكتسياسى اياسىندا 2 مىڭ مەديتسينا قىزمەتكەرىنە 12 ميلليون تەڭگەنىڭ كومەگى كورسەتىلدى. جىل باسىنان بەرى 20 مىڭعا جۋىق ادامعا 130 ميلليون تەڭگە كولەمىندە جاردەم بەرىلگەن.

بۇگىندە بارشامىزدىڭ باستى ماقساتىمىز – ەلىمىزدە قوعامدىق كەلىسىم مەن تۇراقتىلىقتى ساقتاپ, ەتنوسارالىق تاتۋلىقتى قامتاماسىز ەتۋ. تولىمدى جەتىستىكتەرىمىزدى ەسەلەپ, الەۋمەتتىڭ الەۋەتىن كوتەرۋىمىز قاجەت. وسى مىندەتتەردى ورىنداۋدا وبلىستىق اسسامبلەيا قىزمەتىن جاڭا دەڭگەيگە كوتەرەدى دەپ ويلايمىن. سىزدەر, قازاقستان حالقى اسسامبلەياسىنىڭ ءرولى مەن مارتەبەسىن ارتتىرۋ بويىنشا جۇيەلى جۇمىس جۇرگىزەتىندىكتەرىڭىزگە سەنىمدىمىن. وبلىستىق قازاقستان حالقى اسسامبلەياسىنىڭ بارلىق مۇشەلەرىنە, ەتنومادەني بىرلەستىكتەرگە بارلىق باستامالارىڭىزعا ساتتىلىك, دەنساۋلىق پەن اماندىق تىلەيمىن, - دەدى وبلىس اكىمى گ.ابدىقالىقوۆا.

مەرەكەلىك شارادا ءسوز العان "سلاۆيانە" قوعامدىق-مادەني ورتالىعى» وبلىستىق قوعامدىق بىرلەستىگىنىڭ ءتورايىمى گالينا ششەرباكوۆا سىر وڭىرىندەگى ۇلتتار مەن ۇلىستاردىڭ تاتۋلىعى تۋرالى ويىن ورتاعا سالدى. ال "قازاقستان كورەيلەر قاۋىمداستىعى" وبلىستىق قوعامدىق بىرلەستىگىنىڭ ءتورايىمى ەلەنا كيم كورەي ەتنومادەني بىرلەستىگىنىڭ 30 جىلدىعىنا بايلانىستى ۇسىنىسىن جەتكىزسە, وبلىستىق وزبەك ەتنومادەني بىرلەستىگىنىڭ توراعاسى قاحار داداشەۆ ايماقتاعى كاسىپكەرلىك سالاسى, قايىرىمدىلىق باعىتىنداعى اسسامبلەيانىڭ ءرولىن ارتتىرۋ باعىتىنداعى جوسپارلارىمەن ءبولىستى.

جيىن سوڭىندا ايماق باسشىسى گۇلشارا ابدىقالىقوۆا جاسامپازدىققا, ىزگىلىككە تولى 25 جىل ىشىندە قوعامدىق كەلىسىم مەن تۇراقتىلىقتى ساقتاۋعا قوسقان ەلەۋلى ۇلەستەرى ءۇشىن وبلىستىق ەتنومادەني بىرلەستىك جانە قۇرىلىم جەتەكشىلەرىنە "قازاقستان حالقى اسسامبلەياسىنا 25 جىل" مەرەكەلىك مەدالىن تابىستادى.