ەل بيلىگى تاۋداعى پارۆان پروۆينتسياسىندا نوسەر جاڭبىردان ورىن العان سۋ تاسقىنى سالدارىنان 900-دەن استام وتباسىنى قاۋىپسىز جەرگە كوشىردى, دەپ حابارلايدى Egemen.kz قازاقپاراتقا سىلتەمە جاساپ.
كەم دەگەندە 250 ادام جاراقات الدى. ءتىرى قالعانداردىڭ ايتۋىنشا, قازا بولعاندار اراسىندا بالالار كوپ. تابيعي اپات سالدارىنان قازا تاپقاندار سانى ءالى دە ءوسۋى مۇمكىن.
اۋعانستان اۋداندارى قۇرعاقشىلىقتان دا, وڭتۇستىكازيالىق مۋسسون كەزەڭىندەگى تولاسسىز جاڭبىردان دا ۇنەمى زارداپ شەگىپ وتىرادى. جەرگىلىكتى تۇرعىن 45 جاستاعى شارۋا مۇحامەد قاسىم AFP-عا سۋ تاسقىنى سالدارىنان وتباسىنىڭ 11 مۇشەسى قايتىس بولعانىن ايتتى.
"مەنىڭ اپكەم, ونىڭ كۇيەۋى, ەكى قىزى مەن ولاردىڭ بالالارى ءبىر ۇيدە ۇيىقتاپ جاتقان ەدى", دەدى قاسىم. پارۆان پروۆينتسياسى بيلىگىنىڭ ايتۋىنشا, سۋ تاسقىنى چاريكار قالاسىن باسقان, جەرگىلىكتى اۋرۋحانا جارىم-جارتىلاي قيرادى, جاراقات العان كوپتەگەن ادام كابۋل اۋرۋحانالارىنا اۋىستىرىلدى.
پروۆينتسيانىڭ ءباسپاسوز حاتشىسى ۆاحيدا شاكحار قۇرباندار سانىنىڭ سانى ءالى دە ءوسۋى مۇمكىن ەكەنىن مالىمدەدى, سەبەبى قۇتقارۋ كوماندالارى قيراعان ۇيلەردىڭ استىندا قالعان ادامداردى ىزدەۋ جۇمىستارىن جۇرگىزۋدە. كەم دەگەندە سەگىز ادام, سونىڭ ىشىندە ەكى بالا سۋعا باتىپ كەتكەنى, 14 ادام جاراقات العانى حابارلانىپ وتىر.