قازىر «ون ۇشتە وتاۋ يەسى» دەيتىن زامان ەمەس. دەسەك تە, اتىراۋ قالاسىندا تۇراتىن 13 جاسار قىز قىزىلقوعا اۋدانىنداعى ميالى اۋىلىنىڭ 2002 جىلعى تۇرعىنىنا تۇرمىسقا شىعىپتى.
«اتىراۋ قالاسىندا تۇراتىن كامەلەتكە تولماعان قىز بىلتىرعى جەلتوقسان بەرى قىزىلقوعا اۋدانىنىڭ جىگىتىمەن كەزدەسە باستاعان. ارادا بىرنەشە اي وتكەندە وتباسى قۇرۋعا شەشىم قابىلداعان. قىزدىڭ اناسى كەلىسىمىن بەرگەن. قىزىلقوعا اۋداندىق يۋۆەنالدى پوليتسيا ءبولىمىنىڭ قىزمەتكەرلەرى كامەلەتكە تولماعان قىزدىڭ اناسىن شاقىرىپ, ءجاسوسپىرىمدى دارىگەرلىك تەكسەرۋدەن وتكىزدى. اۋداندىق اۋرۋحانا دارىگەرلەرى 13 جاسار قىزدىڭ جىنىستىق قاتىناسقا تۇسپەگەنىن, دەنەسىندە جاراقات جوعىن انىقتادى. جاس جۇپپەن, ولاردىڭ اتا-اناسىمەن ءتۇسىندىرۋ جۇمىسى جۇرگىزىلىپ, كامەلەتكە تولماعاندارمەن جىنىستىق قاتىناسقا ءتۇسۋ قر قىلمىستىق كودەكسىنىڭ 122-بابىمەن قىلمىستىق جاۋاپكەرشىلىككە تارتىلاتىنى تۋرالى ەسكەرتۋ جاسادى» - دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتى.
پوليتسەيلەر 13 جاسار قىزدى وتباسىنا قايتاردى. ەندى ول مەكتەپتەگى وقۋىن جالعاستىرادى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.