مەكتەپتەردە اشىلاتىن كەزەكشى سىنىپتارعا جۇكتى, جاسى 65-تەن اسقان مۇعالىمدەر ساباق بەرە المايدى. قر ءبىلىم جانە عىلىم ءمينيسترى اسحات ايماعامبەتوۆ ەلىمىزدىڭ مەكتەپتەرىندە وقۋ اپتاسىنىڭ ۇزارتىلۋىنا قاتىستى سۇراققا جاۋاپ بەردى, دەپ حابارلايدى Egemen.kz قازاقپاراتقا سىلتەمە جاساپ.
ورتالىق كوممۋنيكاتسيالار قىزمەتىندەگى ءباسپاسوز ءماسليحاتى بارىسىندا مينيستر باق وكىلدەرىنىڭ ساۋالىنا وراي كوروناۆيرۋس جۇقتىرىپ العان مۇعالىمدەرگە ەشقانداي ۇستەماقى قاراستىرىلماعانىن ايتتى. «كەزەكشى سىنىپتاردا جۇمىس ىستەۋگە جىبەرۋ ءۇشىن ءتيىستى تالاپ بار.
مۇنداي فورماتتاعى جۇمىس پروتسەسىنە جۇكتى مۇعالىمدەر, سوزىلمالى اۋرۋلارى بار جاسى 65-تەن اسقان ۇستازدار جىبەرىلمەيدى. ياعني, مۇنداي پەداگوگتار كەزەكشى سىنىپتا جۇمىس ىستەي المايدى. كوروناۆيرۋس جۇقتىرىپ الماس ءۇشىن دەنە قىزۋىن قاداعالاپ, بارلىق سانيتارلىق تالاپتاردى ساقتاۋ قاجەت», - دەدى اسحات ايماعامبەتوۆ.
ايتا كەتەيىك, ءباسپاسوز ءماسليحاتى بارىسىندا مينيستر كەزەكشى سىنىپقا ساباق بەرگەن مۇعالىمنىڭ قاشىقتان وقىتۋعا دا قۇقىعى بار ەكەندىگىن ايتقان بولاتىن. جالپى جاڭا وقۋ جىلىندا مەكتەپتەردە قاشىقتان وقىتۋ 8 ينتەرنەت پلاتفورمادا جۇرگىزىلەدى. مەكتەپ جاسىنداعى 2,6 ملن بالا قاشىقتان ءبىلىم الادى. ال باستاۋىش سىنىپتىڭ 530 مىڭ وقۋشىسى كەزەكشى سىنىپتا, شاعىن جيناقتى مەكتەپتەردە 202 مىڭ بالا ءداستۇرلى فورماتتا وقيدى.