تورتكۇل دۇنيەنى جامان تۇماۋدىڭ جان تۇرشىكتىرەر لەبى جايلاعالى كىتاپقۇمار قاۋىم جان سەرىگىمەن اجىراپ قالا جازداپ ەدى. رۋحاني ءناردىڭ ءتىنىن جالعاستىرار جاقسى جول توتەننەن تابىلدى.
كوكشەتاۋ قالالىق اقپاراتتىق كىتاپحانالار جۇيەسى تامىز ايىنان باستاپ جان جادىراتارلىق وسىنداي جوبانى قولعا الىپ, جۇيەلى جۇرگىزە باستادى. نەگىزى بۇل ەلدە كارانتين باستالعان كەزدە ويعا ورالعان وڭدى جوسپار بولاتىن. تىڭنان تابىلعان ءتاسىل ارقىلى قالىڭ وقىرمان مەن رۋحاني ازىق ورداسىنىڭ ەجەلدەن قالىپتاسقان بايلانىسى ۇزىلگەن جوق. قايتا بۇرىنعىدان دا جاقىنداسا تۇسكەندەي.
ەلەكتروندىق كىتاپحاناعا وقىرماندار تاراپىنان كۇن سايىن بىرنەشە قوڭىراۋ تۇسەدى. ولار وزدەرىن قىزىقتىراتىن, وقىسى كەلگەن شىعارمالارىنا تاپسىرىس بەرەدى. كىتاپحانا قىزمەتكەرلەرى بولسا قاۋىپسىزدىكتى ساقتاۋ ماقساتىندا بارلىق تالاپتاردى مۇقيات ورىنداي كەلىپ, شىرايلى شىعارماعا, رۋحاني نارگە شولدەپ وتىرعان وقىرمانداردىڭ تىلەگىن ورىنداپ, قالاعان كىتاپتارىن جەتكىزىپ بەرەدى. مىنە, وسىنداي وڭ شارۋا بىرنەشە ايدان بەرى مۇلتىكسىز جۇزەگە اسىرىلۋدا.
- ءبىزدىڭ ەڭ باستى ماقساتىمىز كوركەم ادەبيەتتەن ءنار الاتىن كوپشىلىكتىڭ كىتاپتان قول ءۇزىپ قالماۋى. كەشەگى كارانتين كەزىندە بۇرىنعى وقىرماندارىمىزعا جاڭا لەك قوسىلدى, – دەيدى كىتاپحاناشى نازگۇل داۋرەنبەك.
بايلانىسسىز كىتاپ جەتكىزۋدىڭ ءبىر تيىمدىلىگى, وقىرمان كوڭىلى قالاعان دۇنيەسىن ءوز شاڭىراعىنان قارعاادىم جەر ۇزاپ شىقپاي-اق, تابا الادى. كىتاپحانا قىزمەتكەرلەرى وقىرمانداردىڭ وتىنىشىنە وراي سۇراعان كىتاپتارىن مەكەنجايىنا الىپ كەلىپ, ەسىگىنە ءىلىپ كەتەدى. بار بولعانى سول-اق.
وزدەرىنىڭ مىندەتتەرىنە جاۋاپكەرشىلىكپەن قاراپ, وقىرماندارىنىڭ كادەسىنە قىسىلتاياڭ كەزدە دە جاراپ تۇرعان رۋحاني قازىنا ورتالىعىنىڭ وڭدى شارۋاسى وزگەگە ۇلگى بولارلىق-اق. قازىر قالالىق كىتاپحانالار اقپاراتتىق جۇيەسىندەگى 12 مەكەمە وسىلاي جۇمىس ىستەۋدە. كۇنى بۇگىنگە دەيىن كىتاپحاناشىلار قالا تۇرعىندارىنا مىڭنان ارتىق كىتاپ جەتكىزىپتى. الداعى ۋاقىتتا ءتيىمدى ءادىستىڭ شاراپاتىن قاريالار مەن ءجۇرىپ-تۇرۋى قيىن ادامدار كورە بەرمەك.
شىن مانىندە كوپ كوڭىلىنەن شىعاتىن جوبا ەمەس پە؟!
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.