ازاماتتاردىڭ الەۋمەتتىك وسال ساناتتارىنا جانە مۇمكىندىگى شەكتەۋلى جاندارعا قۇقىقتىق كەڭەس بەرۋ نيەتىمەن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى, الماتى قالاسى, مەدەۋ اۋداندىق "Nur Otan" فيليالىنا قاراستى "اباي" باستاۋىش پارتيا ۇيىمىنىڭ توراعاسى تاكير وسپان ۇلى بالىقباەۆتىڭ باستاماسىمەن قايىرىمدىلىق اكتسياسى ۇيىمداستىرىلادى, دەپ حابارلايدى Egemen.kz.
ۇيىمداستىرۋشىلار "قايىرىمدىلىق - حالقىمىزدىڭ ەڭ ىزگى قاسيەتتەرىنىڭ ءبىرى. قايىرىمدىلىقتىڭ باستى ەرەكشەلىگى - كومەكتىڭ ءتۇرىن, ۋاقىتى مەن ورنىن, سونداي-اق مازمۇنىن (ماقساتتى) ەرىكتى تۇردە تاڭداۋ مۇمكىندىگى بار" دەي كەلە اتالمىش شارا بارىسىندا پاندەميا كەزىندە تۋىنداعان قۇقىقتىق ماسەلەلەر بويىنشا (الەۋمەتتىك كومەك الۋ, جۇمىستان بوساتۋ جانە جالداۋ, ازاماتتىق-قۇقىقتىق كەلىسىمشارت بويىنشا مىندەتتەمەلەردى ورىنداۋ, اكىمشىلىك, قىلمىستىق جاۋاپكەرشىلىككە تارتۋ) اباي اتىنداعى قازۇپۋ-دىڭ قۇقىقتانۋ كافەدراسىنىڭ جوعارى بىلىكتى زاڭگەر-وقىتۋشىلارى تەگىن زاڭگەرلىك كەڭەس بەرەتىندىگىن جەتكىزدى.
قايىرىمدىلىق اكتسياسى اعىمداعى جىلدىڭ 27 تامىزىندا ساعات 10:00-دە الماتى ق. جامبىل ك., 25 مەكەن-جايى بويىنشا باستالادى. ەپيدەمياعا قارسى ەرەجەلەرگە سايكەس كەڭەس بەرۋ ءۇشىن 8 (702) 803 88 73, 8 (747) 772 74 32 بايلانىس تەلەفوندارى ارقىلى حابارلاسۋ قاجەت.