شىمكەنتتە "كونە قۇمىرانىڭ سىرى" اتتى انيماتسيالىق ءفيلمنىڭ ءۇشىنشى ءبولىمى جارىق كوردى, - دەپ حابارلايدى Egemen.kz.
قالا اكىمدىگىنىڭ تاپسىرىسىمەن "رۋحاني جاڭعىرۋ" باعدارلاماسى اياسىندا جارىققا شىققان "ساق" كينوستۋدياسىنىڭ تۋىندىسى شىمكەنتتى قىزعالداقتار مەكەنى رەتىندە تانىستىرادى.
تانىمدىق ءمانى زور, تاعىلىم الار تۋىندىنىڭ رەجيسسەرى – ەلىمىزگە تانىمال انيماتور باتىرحان داۋرەنبەكوۆ, ستسەناريىن باقىتجان قۇلجاباي جازىپ شىققان.
"قازاقستان – قىزعالداقتار وتانى. وسكەلەڭ ۇرپاققا سول جايلى كوبىرەك ايتۋىمىز كەرەك. ەلىمىزدە قىزعالداقتىڭ كوپتەگەن ءتۇرى وسەدى. وكىنىشتىسى, بىرەگەي وسىمدىك تۇرلەرى ەكسپەديتسيا كەزىندە العاش رەت سۋرەتكە ءتۇسىرىپ, جاريالاعان كاۋفمان, گرەيگ سىندى نەمىس ازاماتتارىنىڭ ەسىمىمەن اتالىپ كەتكەن. مىسالى, جازۋشى مارحابات بايعۇت اعامىز ناسيحاتتاپ جۇرگەنىندەي, شۇبايقىزىل دەگەن قانداي كەرەمەت اتاۋ؟! ءبىز دە قىزعالداقتاردىڭ قازاقى اتتارىن وسىلايشا ناسيحاتتاۋدى ماقسات تۇتتىق. جاپونيا ەلىندە ساكۋرا گۇلدەگەندە ەلگە تۋريستەر اعىلادى. سول سياقتى ءبىزدىڭ ءوڭىرىمىز دە كوكتەمدە جايناپ كەتەدى. قىزعالداقتار قالاسى - شىمكەنت قىزىلدى, جاسىلدى گۇلدەرگە تولادى. مۇنداي كورىنىس وزگە وڭىرلەردە جوق!", - دەيدى باتىرحان داۋرەنبەكوۆ.
انيماتسيالىق ءفيلمنىڭ ءتورتىنشى ءبولىمى دە اياقتالۋعا جاقىن. ول – "اقساق تەمىردىڭ شىمكەنتكە كەلۋى" تۋرالى. "ساق" كينوستۋدياسى ءتۇسىرىپ جاتقان بۇل فيلمدە شەجىرەشى, تاريحشى شارافيددين يازدىنىڭ كىتابىنان الىنعان دەرەكتەر كەلتىرىلەدى. اقساق تەمىردىڭ جورىقتارىنىڭ بىرىندە شىمكەنت ارقىلى ءوتىپ, دالىرەگى, قوشقار اتا وزەنى بويىنا توقتاعانى تۋرالى تاريحي دەرەكتەر جەلىسى الىنعان.
ايتا كەتەيىك, "كونە قۇمىرانىڭ سىرى" انيماتسيالىق ءفيلمىنىڭ العاشقىسى "وتىراردى قورعاۋ", ەكىنشىسى " ۇلى ۇستازبەن كەزدەسۋ" دەپ اتالادى. ول بولىمدەردە ءال-فارابي, اباي سىندى عۇلاما تۇلعالار دارىپتەلىپ, مەملەكەتتىك رامىزدەرىمىز ناسيحاتتالعان.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.