مەملەكەت باسشىسى قاسىم-جومارت توقاەۆ ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆتىڭ سالاداعى اتقارىلىپ جاتقان جۇمىستارىنىڭ ەسەبىن تىڭدادى, دەپ حابارلايدى Egemen.kz اقورداعا سىلتەمە جاساپ.
پرەزيدەنتكە ەلىمىزدە بالىق شارۋاشىلىعىن دامىتۋ پەرسپەكتيۆالارى تۋرالى باياندالدى. ءمينيستردىڭ دەرەگىنە سۇيەنسەك, 2019 جىلى بالىق جانە بالىق ونىمدەرى نارىعىنىڭ جالپى كولەمى 66 مىڭ توننانى قۇراعان. ونىڭ ىشىندە بالىق اۋلاۋ – 45 مىڭ توننا, بالىق ءوسىرۋ – 7,4 مىڭ توننا, بالىق يمپورتى – 43,5 مىڭ توننا, ەكسپورتى – 30 مىڭ تونناعا جەتكەن.
عالىمداردىڭ پايىمداۋىنشا, ەلدەگى سۋقويمالاردا جىلىنا 600 مىڭ تونناعا دەيىن بالىق وسىرۋگە مۇمكىندىك بار. مەملەكەت باسشىسى قولدا بار مۇمكىندىكتەردى پايدالانۋ قاجەتتىگىن ايتتى. مينيسترلىككە بارلىق وبلىستارمەن بىرلەسە وتىرىپ, وسى جىلدىڭ قاراشا ايىنا دەيىن بالىق شارۋاشىلىعىن دامىتۋدىڭ وڭىرلىك باعدارلامالارىن ازىرلەپ, بەكىتۋ تاپسىرىلدى. كەزدەسۋدە وڭىرلەردەگى ەكولوگيالىق جاعدايعا ەرەكشە ءمان بەرىلدى.
ءمينيستردىڭ ايتۋىنشا, قازىرگى ۋاقىتتا قوعاممەن بىرلەسە وتىرىپ الماتى, تەمىرتاۋ قالالارىنىڭ جانە اتىراۋ, اقتوبە, پاۆلودار وبلىستارىنىڭ ەكولوگيالىق ماسەلەلەرىن شەشۋ جونىندەگى جول كارتالارى ازىرلەنگەن. پرەزيدەنت ناقتى ينديكاتورلاردى انىقتاي وتىرىپ, ەلىمىزدىڭ وڭىرلەرىندەگى ەكولوگيا مەن اتموسفەرالىق اۋانى جاقسارتۋ بويىنشا بەلسەندى ءارى ءتيىمدى جۇمىستى جالعاستىرۋدى تاپسىردى.
قاسىم-جومارت توقاەۆقا "جانۋارلارعا جاۋاپكەرشىلىكپەن قاراۋ تۋرالى" زاڭ جوباسىنىڭ ازىرلەنىپ جاتقانى تۋرالى اقپارات بەرىلدى. مەملەكەت باسشىسى اسىرەسە وسكەلەڭ ۇرپاقتى تاربيەلەۋدە بۇل قۇجاتتىڭ ماڭىزدىلىعىن اتاپ ءوتتى.
ماعزۇم مىرزاعاليەۆ مەملەكەت باسشىسىنا قازاقستاننىڭ ۇلتتىق پاركتەرىندە ەكولوگيالىق ءتۋريزمدى دامىتۋدىڭ جوسپارىن ۇسىندى. جوسپاردى ىسكە اسىرۋ ارقىلى ەكولوگيالىق تۋريزم سالاسىنا 70 ملرد تەڭگەگە دەيىن جەكە ينۆەستيتسيالاردى تارتۋعا, 4 مىڭعا دەيىن جاڭا جۇمىس ورىندارىن اشۋعا مۇمكىندىك بەرەدى.
پرەزيدەنت ۇلتتىق پاركتەردىڭ الەۋەتىن نىعايتۋدى مىندەتتەپ, ەكولوگيالىق ءتۋريزمدى ىلگەرىلەتۋ جۇمىسىن جالعاستىرۋدى تاپسىردى. سۇحباتتاسۋ بارىسىندا گەولوگيالىق بارلاۋ سالاسىنىڭ ماسەلەلەرى قوزعالدى.
قاسىم-جومارت توقاەۆ قازاقستاننىڭ نازاردان تىس قالعان جانە كەلەشەگى بار باسسەيندەرىن زەرتتەۋگە جانە ولاردى يگەرۋ ماقساتىندا ينۆەستيتسيا تارتۋعا كۇش جۇمىلدىرۋ قاجەتتىگى تۋرالى ايتتى. ماعزۇم مىرزاعاليەۆ بۇدان باسقا وڭىرلەردە سۋارىلاتىن جەرلەردى ەنگىزۋ جانە جاڭا سۋقويمالارىنىڭ قۇرىلىسى بويىنشا اتقارىلىپ جاتقان جۇمىس تۋرالى ايتتى.
مەملەكەت باسشىسى سۋارىلاتىن جەرلەردى ەنگىزۋ بويىنشا جۇرگىزىلىپ وتىرعان جۇمىسقا جاقسى باعا بەرىپ, سۋ ۇنەمدەيتىن تەحنولوگيالارعا جانە سۋ سالاسىن تسيفرلاندىرۋعا جەدەلدەتىپ ءوتۋدى تاپسىردى.