16 تامىز كۇنى كەشكى ساعات 10-دا "103" پۋلتىنە شۇعىل قوڭىراۋ ءتۇستى. 81 جاستاعى قاريا باس اۋرۋى مەن دەنە قىسىمىنىڭ 180-گە كوتەرىلگەنىنە بايلانىستى شاعىمدانادى. بۇل تۋرالى ەلوردا اكىمدىگىنىڭ ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.
الايدا قوڭىراۋ تۇسكەن مەكەنجايعا كەلگەن ءىلياس وڭعارباەۆ پەن اۋباكير ايدانا ەسىمدى فەلدشەرلەر قاريانىڭ سول اياق-قولى قيمىلسىزدىعى جانە بەتتىڭ قيسايۋىنا اكەپ سوققان اۋىز بۇرىشىنىڭ ارەكەتسىزدىگىن بايقادى. ناۋقاستى شۇعىل تۇردە اۋرۋحاناعا اپارۋ ءتيىس ەكەنى بىردەن بەلگىلى بولدى.
"كىرەبەرىستە قاريا جۇرەك ۇستاماسىنا ۇشىرادى. ارنايى قۇرىلعى ناۋقاستىڭ جۇرەك ىرعاعى جوعارلاعانىن كورسەتتى. ءبارى بىرەر سەكۋندتىڭ ىشىندە بولدى. اۋرۋحاناعا تەزىرەك جەتەمىز دەگەندە, كلينيكالىق ءولىم تىركەلدى. ءبىز شۇعىل مەديتسينالىق كومەك كورسەتتىك. بۇل جەردە ءاربىر سەكۋند باعالى", دەپ ەسكە الىپ وتىر فەلدشەرلەر.
ادام ءومىرى فەلدشەرلەردىڭ شۇعىل ارەكەتى مەن كورسەتىلگەن مەديتسينالىق كومەكتىڭ ارقاسىندا قۇتقارىلعانى ءسوزسىز. دەفيبريللياتوردى قولدانۋ ارقىلى ناۋقاستىڭ جۇرەك سوعۋ جىلدامدىعى قالپىنا كەلتىرىلدى. 8 مينۋتتان سوڭ ناۋقاس №2 كوپسالالى قالالىق اۋرۋحاناعا جەتكىزىلىپ, ءارى قاراي مامانداندىرىلعان كومەك كورسەتۋ ءۇشىن رەانيماتسيالىق توبقا تاپسىرىلدى.
قازىرگى تاڭدا ناۋقاستىڭ دەنساۋلىق جاعدايى تۇراقتى بولىپ وتىر, دارىگەرلەردىڭ تولىق باقىلاۋىندا.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.