قازاقستاندىق كوروناۆيرۋسقا قارسى ۆاكتسينانى كلينيكاعا دەيىنگى زەرتتەۋ اياقتالدى

"دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىنىڭ (دزسۇو) الماتى قالاسىنداعى ايماقتىق فيليالىنىڭ فارماكولوگيالىق سىناق زەرتحاناسى بازاسىندا COVID-19 قارسى قازاقستاندىق بەلسەندى ەمەس ۆاكتسينانى (QazCovid-in ®️) كلينيكاعا دەيىنگى زەرتتەۋ اياقتالدى. جانۋارلارعا ۆاكتسينانىڭ كۇشەيتىلگەن دوزاسىن سالىپ, ونىڭ قاۋىپسىزدىگى مەن ۋىتتى اسەرى مۇقيات تەكسەرىلدى. سونىمەن قاتار, وسى زەرتتەۋ اياسىندا وتاندىق ۆاكتسينانىڭ اعزاعا اللەرگيالىق رەاكتسياسى مەن دەنەنى تىتىركەندىرگىش اسەرىنىڭ جوق ەكەنى انىقتالدى. جالپى زەرتتەۋ ادىستەرىنەن باسقا, ۆاكتسينانىڭ قاۋىپسىزدىك دەڭگەيى قاننىڭ گەماتولوگيالىق جانە بيوحيميالىق كورسەتكىشتەرىمەن راستالدى. ۆاكتسينانىڭ جانۋارلاردىڭ ىشكى مۇشەلەرىنە اسەرى دە باعالاندى", - دەدى قر دەنساۋلىق ساقتاۋ مينيسترلىگى تاۋارلار مەن كورسەتىلەتىن قىزمەتتەردىڭ قاۋىپسىزدىگى مەن ساپاسىن باقىلاۋ كوميتەتىنە قاراستى "دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعى" رمك وكىلى. 

ءمالىم ەتىلگەندەي, ءجىتى زەرتتەۋ ناتيجەلەرى كلينيكاعا دەيىنگى زەرتتەۋ COVID-19 قارسى وتاندىق ۆاكتسينا ۋىتتى ەمەس ەكەنىن انىقتادى جانە ونى كەيىن كلينيكالىق سىناق بارىسىندا ەرىكتى-ادامدارعا قولدانۋعا بولاتىندىعىن كورسەتتى.

"جاڭا ۆاكتسينانىڭ تيىمدىلىگى مەن قاۋىپسىزدىگىن تولىق باعالاۋ ءۇشىن, قازاقستاندىقتاردى ۆاكتسيناتسيالاۋ ءۇشىن ودان ءارى كەڭ اۋقىمدى كلينيكالىق زەرتتەۋلەر قاجەت. زەرتتەۋدىڭ بارلىق كەزەڭى وتكىزىلگەننەن كەيىن عانا ۆاكتسينانىڭ قاۋىپسىزدىگى تۋرالى ايتۋعا بولادى", - دەدى بيولوگيا عىلىمدارىنىڭ كانديداتى, دوتسەنت, "دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعى" الماتى فارماكولوگيالىق سىناق زەرتحاناسىنىڭ مەڭگەرۋشىسى ۆالەنتينا شناۋكشتا.

اتاپ وتىلگەندەي, بارلىق ەكسپەريمەنت دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىنىڭ جانۋارحاناسىنداعى ەكسپەريمەنتتىك جانۋارلارعا جاسالعان.

"فارماكولوگيالىق زەرتتەۋلەر زەرتحاناسى GLP OECD سايكەس سلوۆاك ۇلتتىق اككرەديتتەۋ قىزمەتىنىڭ (SNAS) حالىقارالىق اككرەديتتەۋ مارتەبەسىنە يە جانە قازاقستانداعى بيوەكۆيۆالەنتتى زەرتتەۋ جۇرگىزەتىن جالعىز زەرتحانا. ەستەرىڭىزگە سالا كەتەيىك, بۇعان دەيىن دۇنيەجۇزىلىك دەنساۋلىق ساقتاۋ ۇيىمى قازاقستاندىق عالىمداردىڭ جۇمىسىن ءوزىنىڭ رەسمي سايتىندا تىركەپ, ونى كلينيكاعا دەيىنگى زەرتتەۋگە رۇقسات ەتىلگەن Covid-19 قارسى ۆاكتسيناعا كانديداتتاردىڭ تىزىمىنە قوسقان بولاتىن. وتاندىق بەلسەندى ەمەس ۆاكتسينانى قر بعم عىلىم كوميتەتىنىڭ بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ قىزمەتكەرلەرى ازىرلەدى. ۆەدومستۆونىڭ مالىمەتىنشە, ول قازاقستانداعى ناۋقاستاردان بولىنگەن ۆيرۋس شتاممى نەگىزىندە جاسالعان", - دەدى ورتالىقتىڭ ءباسپاسوز قىزمەتىنەن.

ەسكە سالايىق, قازاقستاندا 2020 جىلدىڭ 23 ناۋرىزىندا COVlD-19-عا شالدىققان العاشقى پاتسيەنتتەن پاتولوگيالىق ماتەريال الىنىپ, ءبىر اپتادان كەيىن قر بعم عىلىم كوميتەتىنىڭ بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى SARS-CoV-2 ۆيرۋسىن ءبولىپ شىعاردى. 2020 جىلدىڭ 9 مامىرىندا COVlD-19-عا قارسى كانديتات يناكتيۆتەلگەن ۆاكتسينا ازىرلەۋ بويىنشا جۇمىس اياقتالىپ, ونىڭ حاتتاماسى دۇنيەجۇزىلىك دەنساۋلىق ساقتاۋ ۇيىمىنا جىبەرىلدى. 15 مامىردا ددسۇ الدىن الا تەكسەرۋدەن كەيىن ونى كلينيكاعا دەيىنگى سىناققا جىبەرىلگەن كانديات ۆاكتسينالار تىزىمىنە قوسىپ, ۆاكتسينا جانە ازىرلەۋشى تۋرالى اقپاراتتى رەسمي سايتىندا ورنالاستىردى. 2020 جىلدىڭ 15 مامىرىندا زەرتحانالىق تىشقان, سيريالىق اتجالمان, تەڭىز شوشقاسى, كۇزەن جانە ءۇي قويانىنا كانديدات ۆاكتسينانى كلينيكاعا دەيىنگى سىناق باستالدى. كلينيكاعا دەيىنگى سىناق ۆاكتسينانىڭ ددسۇ رەگلامەنتتەگەن بارلىق پارامەترلەر, اتاپ ايتقاندا ۋىتتىلىعى, دەرت تۋىنداتۋشىلىعى, اللەرگەندىلىگى, يممۋنوگەندىگى بويىنشا ددسۇ تالاپتارىنا جانە قازاقستان رەسپۋبليكاسىنىڭ مەملەكەتتىك فارماكوپياسىنا ساي كەلەتىندىگىن كورسەتتى. 2020 جىلدىڭ 6 شىلدەسىندە ۆاكتسينا قر دسم ۇلتتىق دارىلىك زاتتاردى ساراپتاۋ ورتالىعىنا بەرىلدى.

ورتالىق بۇعان دەيىن بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى العان ۆاكتسينانى كلينيكاعا دەيىنگى سىناق ناتيجەلەرىنىڭ جاڭعىرتىلاتىندىعىن قۋاتتادى. 2020 جىلدىڭ 10 شىلدەسىندە بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى ۆاكتسينانى مايمىلعا (ماكاكا رەزۋس) سىناقتان وتكىزۋدى باستادى. lg م, lg G انتيدەنە ءتيترى جەتىنشى كۇندە 3,5 10Q (جوعارى كورسەتكىش) بولعان ەدى. دۇنيەجۇزىلىك دەنساۋلىق ساقتاۋ ۇيىمىنىڭ تالابىنا سايكەس, 2020 جىلدىڭ 13 تامىزىندا ماكاك-رەزۋستان انتيدەنەنىڭ كەمىندە 7 log بولۋى ءتيىس سوڭعى ءتيترىن انىقتاۋ جوسپارلانىپ وتىر. بۇل جوعارى يممۋنوگەندىك كورسەتكىش سانالادى.

2020 جىلدىڭ 26 شىلدەسىندە ۆاكتسينانىڭ 5 ازىرلەۋشىسى ءتىرى ۆيرۋسپەن جۇمىس ىستەۋ بارىسىندا قاۋىپسىزدىكتەرىن قامتاماسىز ەتۋ ءۇشىن ەرىكتى تۇردە ۆانتسينانى وزدەرىندە سىنادى. بىرنەشە تاۋلىك وتكەننەن كەيىن ولار وزدەرىن جاقسى سەزىنىپ, دەنە قىزۋى مەن اللەرگياسى بولماعان. وتاندىق ۆاكتسينانىڭ كلينيكاعا دەيىنگى سىناعى بيىلعى 20 تامىزدا اياقتالىپ, ناتيجەسى قر دەنساۋلىق ساقتاۋ مينيسترلىگىنە بەرىلەتىنى بۇعان دەيىن ءمالىم ەتىلگەن ەدى. قر دەنساۋلىق ساقتاۋ مينيسترلىگىنەن رۇقسات الىنعاننان كەيىن 2020 جىلدىڭ 20 قىركۇيەگىندە الماتى قالاسىنداعى كلينيكانىڭ بازاسىندا COVID-19-عا انتيدەنەسى جوق 44 ەرىكتىگە كلينيكالىق سىناق ء(ى فازا) باستالاتىندىعى كۇتىلەدى.

2020 جىلدىڭ قازان ايىنىڭ ورتاسىندا دۇنيەجۇزىلىك دەنساۋلىق ساقتاۋ ۇيىمىنىڭ تالاپتارىنا ساي كەلەتىن 200 ەرىكتىگە كلينيكالىق سىناق وتكىزۋدىڭ ءىى فازاسىنا شىعۋ جوسپارلانعان. كلينيكالىق سىناقتىڭ ءىى فازاسى 2020 جىلدىڭ جەلتوقسان ايىندا اياقتالۋى ءتيىس. كوپتەگەن ەلدىڭ (قىتاي, اقش, رەسەي) تاجىريبەسىن جانە حالىقتى ۆاكتسينامەن قامتاماسىز ەتۋ قاجەتتىگىن قاپەرگە الا وتىرىپ, كلينيكالىق سىناق فازاسىنىڭ سانىن 4-تەن 2-گە دەيىن قىسقارتۋ قاراستىرىلىپ جاتىر. بۇل ددۇ تالاپتارىنا قايشى بولمايدى. كانديدات ۆاكتسينانىڭ كلينيكالىق سىناق ناتيجەلەرىن ددۇ راستاعان جاعدايدا قازاقستان ينستيتۋتى جانىنداعى قۇرىلىس جۇمىستارى جۇرگىزىلىپ جاتقان يممۋنوبيولوگيالىق پرەپاراتتار ءوندىرىسى زاۋىتى ۆاكتسينا شىعارۋعا دايىن. زاۋىتتىڭ جوبالىق قۋاتى جىلىنا 60 ملن دوزانى قۇرايدى. قۇرىلىس جۇمىسى 2020 جىلدىڭ جەلتوقسانىندا اياقتالادى.