بۇگىن تۇندە ەۋروپا ليگاسىنىڭ جارتىلاي فينالىنىڭ العاشقى ويىندارى ءوتتى. گەرمانيانىڭ كيولن قالاسىندا وتكەن ماتچتا «سەۆيليا» «مانچەستەر يۋنايتەدتەن» 2:1 ەسەبىمەن باسىم ءتۇستى.
ويىن باستالماس بۇرىن ءبىز «سەۆيليانىڭ» جەڭىسكە جەتۋ جولدارىنا ءۇڭىلىپ, قانداي جاعدايدا عانا ولاردىڭ فينالعا شىعۋعا مۇمكىندىگى بار ەكەنىن ايتقان ەدىك: «سوڭعى 15 جىلدا ەۋروپا ليگاسىنىڭ كۋبوگىن بەس مارتە جەڭىپ العان «سەۆيليا» بۇل تۋرنيردە باستى فوۆوريتتەردىڭ ءبىرى. الايدا جارتىلاي فينالعا شىققان كوماندالاردىڭ بارلىعى «سەن تۇر, مەن اتايىندار». Cوندىقتان بۇل جولى دا «نەرۆيوندىقتار» ءۇشىن اۋىر سىناق كۇتىپ تۇر. نەگە اۋىر سىناق؟ سەبەبى بۇعان دەيىن ولار 1/8 فينالدا ازۋلى «روما» كومانداسىن 2:0 ەسەبىمەن جەڭدى. شيرەك فينالدا انگليانىڭ «ۆۋلۆەرحەمپتون» فۋتبولشىلارىنان باسىم ءتۇستى. ەندى مىنە ولاردىڭ جولىنا ميۋ كەدەرگى بولماق. ايتكەنمەن ¼ فينالدا «ۆۋلۆەرحەمپتون» كومانداسىنا قۇرعان تاكتيكاسى مەن ويىن ورنەگىن بۇل جولى تاعى كورسەتسە, حۋلەن لوپەتەگي شاكىرتتەرى قارسىلاسىن ءسوزسىز جەڭەدى».
مىنە, ايتقانىمىز ايداي كەلدى. «سەۆيليا» – فينالدا!
العاشقى مينۋتتاردا ويىن قالاي بولار ەكەن دەپ كۇدىكتەندىك. سەبەبى, كەزدەسۋدىڭ 7 مينۋتىندا «سەۆيليا» قورعاۋشىسى ديەگو كارلوس ايىپ الاڭىنىڭ ىشىندە ميۋ جارتىلاي قورعاۋشىسى رەشفوردتىڭ قاقپاعا سوققى جاساۋىنا مۇمكىندىك بەرىپ, ارتىنشا اياعىنان شالدى. كوپ ۋاقىت وتپەي بەينە-باقىلاۋ ارقىلى باس تورەشى فەليكس برىح 11 مەترلىك ايىپ دوبىن بەلگىلەدى. فەرناندەش ءمۇلت كەتكەن جوق. ەسەپ – 1:0, ميۋ الدا. وسى گولدان كەيىن «نەرۆيوندىقتار» تەز ەستەرىن جيىپ ويىننىڭ 26-مينۋتىندا ەسەپتى تەڭەستىردى. سول قاپتالدان سۋىرىلىپ شىققان رەگيلون «قىزىل سويقانداردىڭ» ەكى قورعاۋشىسىنان اسىرىپ سۋسوعا ادەمى پاس شىعارىپ بەردى. سۋسو ويلانباستان بىردەن سول اياعىمەن سوققى جاساپ, قاقپانىڭ وڭ جاق بۇرىشىن ءدال كوزدەدى. ەسەپ – 1:1.
ەسەپ تەڭەسكەننەن كەيىن قوس كوماندا الما-كەزەك شابۋىلدارمەن الماسىپ جاتتى. سونداي قارىمتا شابۋىلداردىڭ بىرىندە «نەرۆيوندىقتار» ەسەپتى ەسەلەپ, بۇل ماتچتىڭ نۇكتەسىن قويدى. ويىننىڭ 78-مينۋتىندا وڭ قاپتالدان ناۆاس ايىپ الاڭىنا اۋەلەتىپ اسىرعانى سول ەدى, وعان ءبىرىنشى بولىپ جەتكەن دە يونگ قاقپانىڭ ءدال ورتاسىنا سوققى جاساپ, ەسەپتى 2:1-گە جەتكىزدى. بۇدان كەيىن ميۋ ويىندى ءوز قولدارىنا الىپ, قانشا شابۋىل جاساسا دا ناتيجە بەرمەدى. سەبەبى, وعان «سەۆيليا» قاقپاشىسى مەن قورعاۋشىلارى دايىن بولىپ شىقتى.
ءبىر قىزىعى, بۇعان دەيىن «سەۆيليا» ەۋروپا ليگاسىنىڭ جارتىلاي فينالىندا بەس رەت ويناپ, بارلىعىندا دا فينالعا شىققان جانە بارلىعىندا دا جەڭىسكە جەتكەن. ەندى مىنە, قاتارىنان 20 ماتچتا جەڭىلمەگەن «سەۆيليا» التىنشى مارتە ەۋروپا ليگاسىنىڭ فينالىنا شىعىپ وتىر. ال ەندى فينالدا جەڭىسكە جەتۋ وزدەرىنىڭ قۇرعان تاكتيكالارىنا بايلانىستى بولماق.
ستاتيستيكا:
«سەۆيليا» – «مانچەستەر يۋنايتەد» 2-1
دوپتى يەلىك ەتۋ – 53% – 47%; سوققى – 9:20; ءدال سوققى – 3:8; ايىپ سوققى – 16:15; بۇرىشتاما – 3:4; وفسايد – 3:0; سارى قاعاز – 2:3; ويىنشى الماستىرۋ – 4:5.
«سەۆيليا»: قاقپاشى – بونو; قورعاۋشىلار – رەگيلون, كارلوس, كۋنتە, ناۆاس; جارتىلاي قورعاۋشىلار – حوردان, فەرناندو, بانەگا; شابۋىلشىلار – وكامپوس, ەن-نەسيري, سۋسو.
«مانچەستەر يۋنايتەد»: قاقپاشى – دە حەا; قورعاۋشىلار – ۆان-بيسساكا, ليندەليوف, ماگۋاير, ۋيليامس; جارتىلاي قورعاۋشىلار – فرەد, گرينۆۋد, فەرناندەش, پوگبا, رەشفورد; شابۋىلشى – مارسيال.