ءبىزدىڭ حالقىمىزدىڭ باسىنان نە ءبىر زۇلمات, قىم-قۋىت كەزەڭدەر ءوتتى. سونىڭ بارىندە دە قازاق حالقىنىڭ ارمانى دا, اڭسارى دا تاۋەلسىزدىك بولاتىن. وسى تاۋەلسىزدىك جولىندا اتا-بابالارىمىز جان قيىپ, قان توكتى. ودان بەرتىندەگى الاش اعالارى قازاقستاننىڭ دەربەس ەل بولۋىن كوكسەپ, ءارقيلى امالدار ىزدەسە, كەڭەس وكىمەتى ورناعاننان كەيىن دە حالقىمىزدىڭ كورنەكتى قايراتكەرلەرى ەلدىڭ ءوز جولىمەن دامۋىن ويلاستىرىپ باقتى.
وسىنداي سانعاسىرلار بويعى ارماننىڭ, سول جولداعى جانكەشتى ەرلىكتىڭ وتەۋىنە تاعدىر بىزگە بوستاندىق بەرىپ, تاۋەلسىزدىك تۋىن سىيلادى. ەندىگى جەردە وسى تۋدى ماڭگىلىك تۇعىرىنا ورناتىپ, بەرىك قولدا ۇستاۋىمىز ءۇشىن ءار قازاقستاندىقتىڭ ايانباي ەڭبەك ەتىپ, تەر توگەتىن كەزەڭى كەلدى.
وسى تۇستا زامان “مىڭ ءولىپ, مىڭ تىرىلگەن” قازاق حالقىنىڭ باقىتىنا وراي, بۇگىنگى ەل تىزگىنىن ۇستاپ وتىرعان بىلىكتى باسشىمىز نۇرسۇلتان ءابىش ۇلى نازارباەۆتى تاريح ساحناسىنا شىعاردى.
ءبىز – تاۋەلسىزدىك العان جىلداردان باستاپ, قيىنشىلىق قامىتىنان تەز شىعىپ, ءوزىمىز تاڭداعان نۇرلى جولعا ءبىرجولا بەت تۇزەگەن حالىقپىز. ءبىزدىڭ بۇل جولىمىز ماعىنالى دا ماڭگىلىك جول. ول – “قازاقستان جولى”. ەلباسى نۇرسۇلتان نازارباەۆ نەگىزدەگەن وسى جول ارقىلى ءبىز ەگەمەندىك پەن تاۋەلسىزدىككە ەشقانداي قانتوگىسسىز جەتتىك. قيىندىق بولمادى ەمەس, بولعاندا قانداي. تاۋەلسىزدىكتىڭ ەلەڭ-الاڭىندا بۇكىل ەكونوميكالىق بايلانىستار ءۇزىلىپ, توقتاپ قالعان شارۋاشىلىقتى جۇرگىزۋ ءۇشىن قىرۋار قارجى قاجەت بولدى. بۇرىن قازاقستاندى تەك كسرو-نىڭ قۇرامىندا تانىعان ەلدەر دەربەس دامۋ جولىنا تۇسكەن ەلىمىزگە بەت بۇرا قويمادى. وسىنداي تۇستا پرەزيدەنتىمىز نۇرسۇلتان نازارباەۆتىڭ اسقان كورەگەندىگى مەن الەمدىك دامۋدى جەتە ءبىلۋى كوپ كومەگىن تيگىزدى. ەڭ الدىمەن, ءبىز الەمگە قاۋىپ توندىرەتىن اتوم قارۋى ارسەنالىنان باس تارتىپ, جەرىمىزدەگى سىناق پوليگونىن جاپتىق. قازاقستاننىڭ بەيبىت ساياساتى الەم ەلدەرىن قازاقستانعا بەت بۇرۋعا ىڭعايلاسا, داۋ-جانجالدىڭ, قاقتىعىستاردىڭ سەبەبى بولادى دەگەن كوپەتنوستىق جاعدايىمىز الەمدەگى ەڭ شەشۋشى كۇشكە اينالدى. تاتۋلىقتىڭ, بىرلىكتىڭ ارقاسىندا ءبىز رەسەي, گەرمانيا, كورەيا, گرەكيا, تۇركيا جانە باسقا ۇلكەن مەملەكەتتەردى, سول سەكىلدى قۇراما شتاتتار, ۇلىبريتانيا, قىتاي سەكىلدى الىپ دەرجاۆالاردى قازاقستانمەن ساياسي-ەكونوميكالىق, مادەني بايلانىستارعا تۇسۋگە تارتتىق, شەتەلدىك ينۆەستيتسيالارعا جول اشتىق.
جيىرما جىلعا جەتپەيتىن مەرزىمدە ءبىز عاسىرلارعا پارا-پار جول-دان وتتىك. قانداي قيىندىقتار كەزدەسسە دە, ەلدىڭ بولاشاق دامۋىن ءبىر ساتكە دە ەستەن شىعارماعان ەلباسى “قازاقستان–2030” ستراتەگياسىن جاساپ, سونىڭ نەگىزىندە دامىپ كەلەمىز. سىرتقى كۇشتەردىڭ وراسان ىقپالىنا قاراماستان, ءوزىمىزدىڭ كونستيتۋتسيامىزدى قابىلدادىق, قاجەتىنە قاراي وعان تۇزەتۋلەر دە ەنگىزىپ كەلەمىز. شىعىس ازيادا باستالعان, مۇحيتتىڭ ارعى جاعىنان كەلگەن داعدارىستاردىڭ سالدارىن ەڭسەرە الدىق. مۇنىڭ ءبارى حالقىمىزدىڭ بىرلىگى مەن ەرەن ەڭبەگىنىڭ ارقاسىندا مۇمكىن بولدى. ەۋرازيا كىندىگىندەگى, مۇسىلمان حالقى باسىم ەل ەۋروپاداعى قاۋىپسىزدىك جانە ىنتىماقتاستىق ۇيىمىنا, مىنە, ءۇش ايدان استى بىلىكتى توراعالىق ەتىپ كەلەدى, يسلام كونفەرەنتسياسى ۇيىمىنا دا جەتەكشىلىگىمىز جەمىستى بولارىنا سەنىم مول.
جەرىمىز ۇلان-عايىر بولعانىمەن, حالقىمىزدىڭ سانى از, دامۋشى ەلمىز. سوعان قاراماستان قول جەتكەن جەتىستىكتەرىمىز سەرپىندى سەكىرىستەر جاساۋعا مۇمكىندىك بەردى. سولاي ەكەن دەپ توقمەيىلسۋدىڭ ەش رەتى جوق. سوندىقتان دا, پرەزيدەنت نازارباەۆ الدىمىزعا جاڭا ءمىندەتتەر قويىپ وتىر. ونىڭ ەڭ باستىسى – يندۋستريالىق-تەحنولوگيالىق ەلگە اينالىپ, الەمنىڭ ەڭ وزىق ەلۋ ەلىنىڭ قاتارىنا ەنۋ, كەدەن وداعىنىڭ بەلسەندى مۇشەسىنە اينالۋ. قازىرگى كەزدە ءبىز داعدارىستى ەڭسەرۋدىڭ ۇلكەن باعدارلاماسىن جۇزەگە اسىرا وتىرىپ, وسى قيىن جاعدايدىڭ وزىنەن دامي ءتۇسۋدى كوزدەسەك, بۇل جوسپارلاردى جۇزەگە اسىرۋ مەملەكەت باسشىسىنىڭ توڭىرەگىنە, مەملەكەتتىك ساياساتتى جۇزەگە اسىرۋ يدەياسى استىنا توپتاسا ءتۇسۋىمىزدى تالاپ ەتەدى.
قازىرگى تىلمەن ايتقاندا, الىس-جاقىن شەتەلدەردىڭ بارىندە دەرلىك تۇراقتىلىققا قول جەتكىزە الماي, تولقىمالى ساتتەردى باستان كەشىپ جاتقانىن كۇندە كورىپ, ەستىپ, ءبىلىپ جاتىرمىز. ال قازاقستانداعى تۇراقتىلىق پەن تاتۋلىق ەلباسى نۇرسۇلتان نازارباەۆتىڭ ەرەن ەڭبەگى ناتيجەسىندە جۇزەگە اسىپ وتىرعانى اقيقات. شىندىققا قارسى تۇرار كۇش جوق. جالعان جالا, وتىرىك-وسەكتىڭ ءبارى تۇبىندە تاريح قۇمداۋىتىنا كومىلىپ قالادى دا, شىندىق ءوز تۇعىرىندا ءاردايىم تۋ بولىپ جەلبىرەپ تۇرارى حاق.
بولاشاق بۇدان دا گورى بيىك, بۇدان دا گورى نۇرلى بولۋ ءۇشىن, ءبۇگىنگى كوزىمىز كورىپ تۇرعان ۇلى شىندىقتى ارقايسىمىز ءار جاققا بۇرا تارتپاي, بۇلتاقسىز مويىنداۋىمىز كەرەك. كوز كورىپ تۇرعان شىندىقتى مويىنداۋ – ۇرپاققا ۇلگى.
بەكبولات مۇقىشەۆ, قازاقستان رەسپۋبليكاسى ارداگەرلەر ۇيىمى توراعاسىنىڭ ورىنباسارى.
استانا.