ەڭبەك جانە حالىقتى الەۋمەتتىك قورعاۋ مينيسترلىگى حالىقتى الەۋمەتتىك قورعاۋ سالاسىنداعى الەۋمەتتىك قىزمەتكەرلەر ءۇشىن لاۋازىمدىق مىندەتتەرىن ورىنداۋ كەزىندەگى مىنەز-ق ۇلىقتىڭ كاسىبي ەتيكاسى بويىنشا ادىستەمەلىك ۇسىنىمداردى بەكىتتى. بۇل – قازاقستان تاريحىنداعى الەۋمەتتىك سالا ماماندارىنىڭ جۇمىسىن رەتتەيتىن العاشقى قۇجات.
مينيسترلىكتىڭ مالىمەتىنشە, ادىستەمەلىك ۇسىنىمدار قوعام تاراپىنان الەۋمەتتىك قىزمەتكەرلەرگە دەگەن سەنىمدى نىعايتۋعا جانە ولاردىڭ مارتەبەسىن ارتتىرۋعا, الەۋمەتتىك قىزمەتكەرلەر مەن ارنايى الەۋمەتتىك قىزمەتتەردى الۋشىلار اراسىنداعى قارىم-قاتىناستىڭ جوعارى مادەنيەتىن قالىپتاستىرۋعا, سونداي-اق ادەپسىز مىنەز-ق ۇلىق جاعدايلارىنىڭ الدىن الۋعا باعىتتالعان.
قۇجاتقا سايكەس الەۋمەتتىك ادىلەت, ادالدىق, گۋمانيزم, قۇزىرەت, ۇزدىكسىز كاسىبي دامۋ الەۋمەتتىك قىزمەتكەردىڭ نەگىزگى ەتيكالىق قاعيدالارى بولىپ تابىلادى. سونداي-اق الەۋمەتتىك قىزمەتكەرلەرگە قىزمەت الۋشىلارمەن, ارىپتەستەرمەن جانە قوعامدا ءوزىن قالاي ۇستاۋ كەرەك ەكەنى تۋرالى ۇسىنىستار بەرىلەدى.
«الەۋمەتتىك قىزمەت كورسەتۋ, حالىقپەن تىكەلەي جۇمىس ىستەۋ – ادىستەمەلىك ءبىلىم مەن داعدىلاردى تالاپ ەتەتىن ەڭبەك. ادامدار قيىن ومىرلىك جاعدايدا ولارعا جۇگىنەدى, بۇل مورالدىق تۇراقتىلىق پەن ارنايى كاسىبي ەتيكانى قاجەت ەتەدى. الەۋمەتتىك قىزمەتكەرلەردىڭ مىنەز-قۇلقى قوعامنىڭ سەنىمىن نىعايتۋى كەرەك. ساپاسىز قىزمەت كورسەتۋ مەن جانجالدى جاعدايلاردىڭ الدىن الۋ ءۇشىن كاسىبي ەتيكا مامان دايارلاۋدىڭ اجىراماس بولىگى بولۋى كەرەك. سوندىقتان ەڭبەك جانە حالىقتى الەۋمەتتىك قورعاۋ مينيسترلىگى UNICEF-پەن بىرلەسىپ الەۋمەتتىك قىزمەتكەرلەردىڭ ەتيكالىق مىنەز-قۇلقىنىڭ ادىستەمەلىك ۇسىنىمدارىن ازىرلەدى جانە قابىلدادى», دەدى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ.
بۇگىندە قازاقستاننىڭ الەۋمەتتىك قىزمەت كورسەتۋ جۇيەسىندە 30 مىڭنان اسا ادام ەڭبەك ەتەدى, ولاردىڭ 11 مىڭى – الەۋمەتتىك قىزمەتكەرلەر.