كارانتين رەجىمى كەزىندە وتباسىلىق سالتاناتتى شارالارعا رۇقسات ەتىلمەيتىنى, ادامداردىڭ جينالۋعا بولمايتىنى جونىندە ەسكەرتۋ العانىنا قاراماستان پەتروپاۆل قالاسىنىڭ ءبىر تۇرعىندارى 5 تامىز كۇنى قالا ىرگەسىندەگى قىزىلجار اۋدانىنا قارايتىن ارحانگەلكا سەلوسىنىڭ شىركەۋىنە كەلىپ, ۇيلەنۋ راسىمدەرىن جاساعان. ولاردىڭ قوناقتارعا جايىپ قويعان داستارحاندارى دا فوتو جانە بەينەكورىنىستەرگە تۇسىرىلگەن. شىركەۋ قىزمەتكەرلەرى كارانتيندىك رەجىمنىڭ بۇزىلاتىنىنا قاراماستان وسى شارانىڭ وتۋىنە رۇقسات بەرگەن.
حالىقتىڭ شىركەۋگە كوپ جينالىپ جاتقانىن كورىپ, اۋىل اكىمى مۇنداي شاراعا قازىر جول بەرىلمەيتىنىن ايتىپ, تاراۋ كەرەكتىگىن ەسكەرتسە دە وعان ەشكىم باعىنىپ, مويىنسۇنباعان. باسقا امالى قالماعان اكىم ۋچاسكەلىك پوليتسيانى شاقىرتقان. پوليتسيا قىزمەتكەرلەرىمەن بىرگە كەلگەن مونيتورينگتىك توپ جەرگىلىكتى اكىمگە باعىنباي, كارانتيندىك تالاپتى مويىنداماي جاتقان توپتىڭ ورەسكەل قىلىقتارىن ءوز كوزدەرىمەن كورگەن.
وسى باسسىزدىققا جول بەرگەن شىركەۋ باسشىلارىنىڭ ۇستىنەن اكىمشىلىك ماتەريالدار جينالىپ, قازىر ول شارا قولدانىلۋى ءۇشىن ءتيىستى ورگانعا جونەلتىلدى.
جامان ىندەتتىڭ قاسىرەتىن كەيبىر قازاقتار تۇسىنبەيدى, ادام جينالماسىن دەگەنگە قاراماي وتباسىلىق سالتاناتتى شارالار وتكىزەدى دەپ ءوزىمىزدى سىناۋشى ەدىك. سويتسەك, ونىڭ قاسىرەتىن تۇسىنبەيتىندەر باسقا حالىقتاردىڭ اراسىنان دا تابىلىپ جاتىر.