جامبىل وبلىسىندا كوروناۆيرۋسپەن اۋىرعاندار سانى ازايىپ كەلەدى

وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى حاميت مىرزاقاسىموۆتىڭ ايتۋىنشا, سوڭعى اپتادا ينفەكتسيالىق ستاتسيونارلار مەن پروۆيزورلىق ستاتسيونارلارداعى ناۋقاستار سانى 15,4 پايىزعا, رەانيماتسيا بولىمشەلەرىندە 24 پايىزعا ازايعان. سونىمەن قاتار, ينفەكتسيالىق جانە پروۆيزورلىق ستاتسيونارلارداعى پاتسيەنتتەر قاجەتتى دارىلىك پرەپاراتتارمەن قامتاماسىز ەتىلگەن. بۇل رەتتە "سك-فارماتسيا" جاۋاپكەرشىلىگى شەكتەۋلى سەرىكتەستىگىمەن بىرلەسە وتىرىپ, 7,6 ميلليارد تەڭگەنىڭ ءدارى-دارمەكتەرى جەتكىزىلگەن. سوندىقتان دا وبلىستىق مەديتسينالىق مەكەمەلەردە ءدارى-دارمەكتەردىڭ ءبىر ايلىق قورى قالىپتاسقان. ناۋقاستاردىڭ دەنساۋلىعىن قالپىنا كەلتىرۋ ءۇشىن اۋرۋحانالاردا 476 وتتەگى كونتسەنتراتورى, 167 وكپەنى جاساندى جەلدەتۋ اپپاراتى بار. ماۋسىم ايىمەن سالىستىرعاندا وكپەنى جاساندى جەلدەتۋ اپپاراتىنىڭ سانى 30 پايىزعا, وتتەگى كونتسەنتراتورلارىنىڭ سانى 70 پايىزعا ارتقان.

"دارىگەرلەر اۋرۋحانادان شىققاننان كەيىن دە ناۋقاستاردىڭ جاعدايىن باقىلاۋدى جالعاستىرۋدا. ولارعا بۇل ىستە ەمحانالار بازاسىندا قۇرىلعان ءموبيلدى توپتار كومەكتەسۋدە. توپ مۇشەلەرى شىعارىلعان ەمدەلۋشىلەردىڭ جاعدايىن تەكسەرىپ, قاجەتتى كومەكتەر كورسەتەدى", دەيدى حاميت مىرزاقاسىموۆ.

سونىمەن قاتار, اتالعان ءموبيلدى توپتار ءۇي كارانتينىندەگى تۇرعىنداردى دا باقىلاۋعا العان. وبلىس بويىنشا بارلىعى 214 ءموبيلدى توپ جۇمىس ىستەيدى. ال, ولاردىڭ قۇرامىنا 642 مامان ەنگەن. حاميت مىرزاقاسىموۆتىڭ ايتۋىنشا, قازىرگى تاڭدا ەپيدەميالىق جاعداي تۇراقتالىپ كەلەدى. وتكەن اپتادا كوروناۆيرۋس ىندەتى 1,2 ەسەگە, پنەۆمونيا 2,6 ەسەگە تومەندەگەن. ال, جەدەل جاردەم شاقىرۋشىلار سانى 11,4 پايىزعا ازايعان. بۇگىنگى تاڭدا وڭىردە كوروناۆيرۋس ىندەتىنىڭ ەكىنشى تولقىنىنا قىزۋ دايىندىق جۇمىستارى جۇرگىزىلۋدە. بۇل رەتتە قوسىمشا تاعى 1600 پروۆيزورلىق جانە ينفەكتسيالىق توسەك ورىندارىن اشۋ, ءۇش ايلىق ءدارى-دارمەك قورىن قالىپتاستىرۋ جوسپارلانۋدا.

جامبىل وبلىسى