قازىرگى ۋاقىتتا مەملەكەت باسشىسىنىڭ تاپسىرماسى بويىنشا, ەل اۋماعىنىڭ كورىكتى جەرلەرىندەگى دەمالىس ورىندارىندا زاڭسىز قوقىس ورىندارىن انىقتاۋ مەن ونى جويۋ بويىنشا كەشەندى جۇمىس جۇرگىزىلۋدە. وتكەن اپتادا شىعىس قازاقستان وبلىسىنىڭ ەكولوگيا دەپارتامەنتى مەن ەكولوگيالىق قاۋىپسىزدىك ورتالىعىنىڭ ماماندارى رەكرەاتسيالىق ايماقتارداعى رۇقسات ەتىلمەگەن قوقىس ورىندارىن انىقتاۋ مەن ونى جويۋ بويىنشا تەكسەرۋلەر جۇرگىزىپ, كەزەكتى رەيدتى وڭىردەگى تاماشا تابيعات مۇيىستەرىنىڭ ءبىرى سانالاتىن دۇبىعالى كولىنە جۇرگىزدى.
شىعىس وڭىرىندە بۇدان بۇرىن بۇقتىرما سۋ قويماسىنىڭ جاعالاۋىنا رەيد جاسالعان بولاتىن. سودان سوڭ بۇل ءىس-شارا مەملەكەتتىك قىزمەتكەرلەر, قوعام بەلسەندىلەرى مەن ەرىكتىلەر اراسىندا كەڭىنەن قولداۋعا يە بولا تۇسكەندەي. ايتالىق, دۇبىعالى كولىنە جۇرگىزىلگەن تەكسەرۋ بارىسىنا ۇلان اۋدانىنىڭ اتقارۋشى ورگاندارى, پوليتسيا جانە كوممۋنالدىق قىزمەتى, ەكولوگيالىق قۇرىلىم, كاسىپكەرلىك وكىلدەرىنەن قۇرالعان 24 ادام قاتىستى.
دەمالىس ايماعىن قاراۋ بارىسىندا قاتىسۋشىلار كول ماڭايىندا اباتتاندىرىلعان جاعاجايدىڭ جوقتىعىن, قاتتى تۇرمىستىق قالدىقتاردى جيناۋعا ارنالعان كونتەينەرلەردىڭ مۇلدە قاراستىرىلماعانىن جانە بىرقاتار زاڭسىز قوقىس الاڭدارى انىقتالعانىن اتاپ ءوتتى.
تاۆريا اۋىلدىق وكرۋگى اكىمى ورىنباسارىنىڭ ايتۋىنشا, اكىمدىكتىڭ كۇشىمەن اپتا سايىن تازالىق جۇمىستارى جۇرگىزىلىپ, جاعالاۋ اۋماعىنان 5-6 توننا كولەمىندە قوقىس شىعارىلادى, سونىمەن بىرگە دەمالۋشىلارعا ءارتۇرلى ءتۇسىندىرۋ جۇمىستارى جۇرگىزىلىپ, جادىنامالار تاراتىلىپ تۇرادى.
– الايدا بۇل رەتتە ءبىزدىڭ الەۋەتىمىز بەن قارجىمىز جەتكىلىكسىز دەپ ويلايمىن. ەسەپتەۋىمىزشە, كولگە ءبىر دەمالىس كۇنى كەلۋشىلەردىڭ ءوزى 1 مىڭ ادامدى قۇرايدى. ەگەر ءبىر ادام كۇنىنە 1,1 كيلو قوقىس قالدىراتىن بولسا, جاعالاۋدا كۇندەلىكتى 1 توننادان استام قوقىس پايدا بولادى, – دەيدى ەكولوگيالىق قاۋىپسىزدىك ورتالىعىنىڭ مامانى ەلەنا پوليانتسەۆا.
سونداي-اق اۋدان اكىمدىگى مەن دەمالۋشىلاردىڭ تاعى ءبىر وتكىر ماسەلەسى بار. بۇل اتالعان دەمالىس ورنىندا ۇيالى بايلانىستىڭ جوقتىعى. ياعني بۇل ماسەلە توتەنشە جاعداي كەزىندە دەمالۋشىلارعا جوعارى تاۋەكەل تۋدىرىپ قانا قويماي, اۋداننىڭ بيۋدجەتىنىڭ قامتاماسىز ەتۋدە قيىندىق اكەلەدى. ينتەرنەتتىڭ جوقتىعى كاسىپكەرلەر تاراپىنان تۋريستىك بيزنەستەن تۇسەتىن كىرىستەرىن جاسىرۋعا مۇمكىندىك بەرەدى, سونىمەن بىرگە پوليتسيا قىزمەتكەرلەرىنىڭ وقيعا ورنىندا حاتتاما تولتىرۋىن قيىنداتادى.
قوقىس ورىندارىنىڭ ماسەلەسىن كۇردەلەندىرىپ تۇرعان ماسەلەنىڭ ءبىرى – رەكرەاتسيالىق ايماقتاعى جەردىڭ ايتارلىقتاي بولىگى ساتىپ الىنعان جانە ماقساتتى تۇردە پايدالانىلا بەرمەيدى. كوپتەگەن جەكەلەگەن اۋماقتاردىڭ جاعدايى سىن كوتەرمەيدى, كورىكتەندىرىلمەك تۇرماق بەي-بەرەكەت قوقىس توگەتىن ورىنعا اينالىپ كەتكەن. زاڭ بويىنشا جەر تەلىمىنىڭ يەسى وزىنە تيەسىلى اۋماقتى جەكە قاراجاتى ەسەبىنەن تازالاپ تۇرۋى قاجەت.
ۇلان اۋدانى كاسىپكەرلىك جانە اۋىل شارۋاشىلىعى ءبولىمى وكىلىنىڭ سوزىنشە, 2015 جىلدان بەرى اۋدانداعى بارلىق جەر ۋچاسكەلەرىنە اۋقىمدى تۇگەندەۋ جۇمىستارى جۇرگىزىلىپ, ونىڭ بارىسىندا قايتارىلىپ الىنعان 8 جەر تەلىمى ورمان قورىنا تاپسىرىلعان. ودان وزگە قازىر دۇبىعالى كولىنە باراتىن جاڭا جولدىڭ قۇرىلىسىنا جوبالىق-سمەتالىق قۇجاتتاما جاسالىپ, مەملەكەتتىك ساراپتامادان وتۋدە. سونداي-اق جاعالاۋدى كورىكتەندىرۋ جۇمىستارى قۇرىلىسىنا ارنالعان سىزبا ازىرلەندى, وندا مۇگەدەكتەردىڭ دەمالىسىنا ارنالعان جاعداي قاراستىرىلعان. 2021 جىلى قۇرىلىسقا قاجەتتى بيۋدجەت قاراجاتىن بولۋگە ءوتىنىم بەرۋ جوسپارلانىپ وتىر.
– شىعىس قازاقستان وبلىسىنىڭ قوعامدىق كەڭەسىندە ەكولوگتار مەن كاسىپكەرلەر, قوعامدىق جانە رۋحاني كەلىسىم بويىنشا ساراپشىلىق جۇمىس توبى وكىلدەرىنىڭ قاتىسۋىمەن وتكەن وتىرىستا ءوڭىر باسشىسىنا دەمالىس ايماعىنداعى 20 جىل بويى ماقساتتى تۇردە پايدالانىلماعان جەر تەلىمدەرىن قايتارىپ الۋعا ىقپال ەتۋى ءۇشىن ءوتىنىش جازۋعا شەشىم قابىلداندى, – دەيدى وبلىستىق قوعامدىق كەڭەستىڭ قوعامدىق جانە رۋحاني كەلىسىم بويىنشا ساراپشىلىق جۇمىس توبىنىڭ جەتەكشىسى گەننادي پۋسسەپ.
ايتا كەتۋ كەرەك, رەيدكە قاتىسۋشىلار حات جازۋمەن عانا شەكتەلىپ قالماق ەمەس. ەكولوگتار مەن قوعام بەلسەندىلەرى ەكوسەنبىلىك وتكىزىپ, جاعالاۋداعى قوقىستىڭ ءبىر بولىگىن تازالادى. ەكولوگيا دەپارتامەنتىنىڭ ماماندارى جەرگىلىكتى اتقارۋشى ورگاندار مەن پوليتسيا قىزمەتىنە رۇقسات ەتىلمەگەن قوقىس ورىندارىن جويۋ جانە جەرگىلىكتى تۇرعىندار مەن دەمالۋشىلار اراسىندا الدىن الۋ جانە ءتۇسىندىرۋ جۇمىستارىن كۇشەيتۋ تۋرالى ۇسىنىمدارىن جەتكىزدى.
قوعام بەلسەندىلەرى مۇنداي رەيدتەردى تامىز ايىندا ءوڭىردىڭ باسقا دا اۋماقتارىندا وتكىزىلەتىنىن, وعان قاتىسۋعا نيەت بىلدىرگەن ۇيىمدار مەن مەكەمەلەردى قولدايتىندارىن اتاپ ءوتتى. دەپارتامەنت قىزمەتكەرلەرى سونىمەن بىرگە زاڭسىز قوقىس ورىندارى انىقتالعان جاعدايدا Call ورتالىقتىڭ 87759524900 نومىرىندەگى WhatsApp-قا قوقىس ورنىنىڭ فوتو جانە ۆيدەو ماتەريالدارىن جولداپ, ورنالاسقان اۋماعىن حابارلاۋعا بولاتىنىن جەتكىزدى.