ەلباسى داڭقتى سپورتشى, وليمپيادا چەمپيونى, قازاقستاننىڭ ەڭبەك ەرى جاقسىلىق ۇشكەمپىروۆتىڭ قايتىس بولۋىنا بايلانىستى تۋعان-تۋىستارى مەن جاقىندارىنا كوڭىل ايتۋ جەدەلحاتىن جولدادى.
نۇرسۇلتان نازارباەۆ ج.ۇشكەمپىروۆتىڭ ومىردەگى ءاربىر قادامى مەن اتقارعان ىستەرى ءوزىنىڭ ەسىمىنە ساي, جان-جاعىنا تەك جاقسىلىق پەن ىزگىلىكتىڭ شۋاعىن شاشىپ جۇرەتىن, حالقىمىزدىڭ شىنايى ماقتانىشىنا اينالعان ۇلى پەرزەنتتەرىنىڭ ءبىرى بولعانىن اتاپ ءوتتى.
«ول گرەك-ريم كۇرەسى بويىنشا قازاققا العاشقى بولىپ الەمنىڭ ەڭ باستى اتاعىن سىيلادى. كاسىپكەرلىكپەن دە تابىستى اينالىسىپ, ەل ەكونوميكاسىنىڭ وركەندەۋىنە لايىقتى ۇلەسىن قوسا ءبىلدى. قايىرىمدىلىق ءىس-شارالارعا بەلسەنە اتسالىسىپ, كاسىپكەرلىك تاجىريبەسىن وزگەلەرمەن ءبولىسىپ, جاقسى ۇلگى مەن ونەگە كورسەتتى.
مەن ونىمەن وتكىزگەن كەزدەسۋلەرىمدى اركەز ريزاشىلىقپەن ەسكە الامىن. وتانداستارىمىز دا ونىڭ ەسىمى مەن ەڭبەگىن ۇمىتپايدى دەپ سەنەمىن», - دەلىنگەن جەدەلحاتتا.