وسىدان ءدال 18 جىل بۇرىن, ياعني 2002 جىلدىڭ 31 شىلدەسىندە ءوزىمىزدىڭ جەرلەسىمىز, داڭقتى حوككەيشى بوريس الەكساندروۆ جول اپاتىنان قايتىس بولعان ەدى, - دەپ جازادى Egemen.kz
بوريس ۆيكتور ۇلى 1955 جىلى وسكەمەندە دۇنيەگە كەلدى. سپورتتىق كارەراسىن جەرگىلىكتى "تورپەدودا" باستاعان سۇرمەرگەن شابۋىلشى ماسكەۋدىڭ تسسكا مەن "سپارتاك", تۆەردىڭ سكا-مۆو كلۋبتارىندا جاسىنداي جارقىرادى. بىرنەشە اتالمدار بويىنشا ارنايى سىيلىقتاردى يەلەندى. سەكسەنىشى جىلدارى قايتا ەلگە ورالىپ, التى ماۋسىم بويى "تورپەدونىڭ" نامىسىن ابىرويلى قورعادى. ودان كەيىن ول يتاليانىڭ "ميلانى" مەن ماجارستاننىڭ "فەرەنتسۆاروشىندا" ونەر كورسەتتى. كسرو قۇراماسى ساپىندا بىرقاتار حالىقارالىق دەڭگەيدەگى دودالارعا قاتىسىپ, 1976 جىلى ينسبرۋكتە الاۋى تۇتانعان وليمپيا ويىندارىنىڭ جەڭىمپازى اتاندى. ۇلكەن سپورتپەن قوش ايتىسقاننان كەيىن الەكساندروۆ ءوزىنىڭ تۋعان قالاسىندا جاتتىقتىرۋشىلىق قىزمەت اتقارىپ, 1996-2002 جىلدارى قازاقستان قۇراماسىنىڭ باس باپكەرى بولدى.
2002 جىلى شىلدە ايىنىڭ سوڭعى كۇنى ۋفا-چەليابى تاس جولىنىڭ بويىندا قوس كولىكتىڭ سوقتىعىسۋى سالدارىنان داڭقتى حوككەيشى كوز جۇمدى. بوريس الەكساندروۆ نەبارى 46 جاستا ەدى...