كاسىپوداقتار فەدەراتسياسى دارىگەرلەر ەڭبەگىن باعالاۋدى ۇسىندى

اتاپ ايتقاندا  مەديتسينالىق پەرسونالعا بىرجولعى الەۋمەتتىك تولەمدەر ۋاقتىلى تاعايىندالماي وتىر. ءارى قر ەڭبەك جانە حالىقتى الەۋمەتتىك قورعاۋ ءمينيسترىنىڭ 2020 جىلعى 9 ساۋىردەگى №129 جانە قر دەنساۋلىق ساقتاۋ ءمينيسترىنىڭ 2020 جىلعى 9 ساۋىردەگى №قر دسم-35/2020 بىرلەسكەن بۇيرىعىمەن بەكىتىلگەن دەنساۋلىق ساقتاۋ ۇيىمدارىنىڭ COVID-19 كوروناۆيرۋستىق ينفەكتسياسىمەن كۇرەس جونىندەگى ەپيدەمياعا قارسى ءىس-شارالارعا تارتىلعان قىزمەتكەرلەرى اتالعان ينفەكتسيانى جۇقتىرعان نەمەسە ودان قايتىس بولعان جاعدايدا ولارعا بىرجولعى الەۋمەتتىك تولەمدى جۇزەگە اسىرۋ قاعيدالارىندا  (بۇدان ءارى قاعيدا) كوروناۆيرۋسپەن كۇرەسكە  تارتىلعاندار ينفەكتسيانى جۇقتىرعان نەمەسە ودان قايتىس بولعان جاعدايدا پوليمەرازالىق تىزبەك رەاكتسياسى (پتسر) تالداۋى تەرىس ناتيجە كورسەتسە, پنەۆمونيامەن اۋرۋدى نەمەسە ودان قايتىس بولعان جاعدايلاردى كوروناۆيرۋسقا  جاتقىزباعاندىقتان, ولار بىرجولعى الەۋمەتتىك تولەمدى الۋ قۇقىعىنان ايرىلادى.  بۇدان باسقا, ەپيدەمياعا قارسى ءىس-شارالارعا تارتىلعان بىرقاتار قىزمەتكەرلەر ياعني  حيرۋرگيا, گينەكولوگيا جانە زەرتحانالىق-دياگنوستيكالىق بولىمدەرىنىڭ, راديولوگيالىق جانە پاتولوگواناتوميالىق قىزمەتتەرىنىڭ, ۋدز ماماندارى, پسيحولوگتار, جەدەل مەديتسينالىق كومەك بريگادالارىمەن تۇراقتى قاتىناستا بولاتىن جۇمىسكەرلەر (ديسپەتچەرلەر, مەحانيكتەر جانە باسقالارى)  الەۋمەتتىك تولەمدەرمەن قامتىلماي وتىر.

"سوڭعى ايلار بويى مەديتسينالىق قىزمەتكەرلەر ۇستەمە تۇردە, تۇنگى ۋاقىتتا, مەرەكە جانە دەمالىس كۇندەرى جۇمىس ىستەۋگە ءماجبۇر بولۋدا. الايدا, ءىس جۇزىندە جۇمىس بەرۋشىلەر  ۇستەمە جۇمىستار ءۇشىن تولەنەتىن قوسىمشا اقىنىڭ مولشەرىن شەكتەپ وتىر. «اتالعان شەكتەۋلەر (ەڭبەك كودەكسىنىڭ 78 بابى 3 تارماعىنا سايكەس) پاندەميا جاعدايىندا قولدانىلماۋى ءتيىس", - دەلىنگەن قركف-نىڭ ۇكىمەت باسشىسىنىڭ اتىنا جولدانعان حاتتا.

سونىمەن قاتار, پاندەميامەن كۇرەسكە اسكەري كلينيكالىق گوسپيتالدەر مەن ولاردىڭ قىزمەتكەرلەرى تارتىلدى. الايدا, جوعارىدا اتالعان قاعيدادا  ۇستەمەاقى بەرۋدە ەسكەرىلمەگەن, جانە كوروناۆيرۋستى جۇقتىرۋ قاۋپى ءتونىپ تۇرعانىنا قاراماستان, وسى ۋاقىتتا دەيىن قوسىمشا تولەمدەردى الۋ قۇقىعىنان ايرىلىپ وتىر.

"قر قارجى مينيسترلىگىنىڭ قارۋلى كۇشتەردىڭ مەديتسينالىق قىزمەتكەرلەرى لايىقتى اقشالاي ناپاقامەن قامتاماسىز ەتىلگەندىكتەن, تۇرعىن ءۇي تولەمدەرىن الاتىندىقتان جانە «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭىندا قاراستىرىلعان بارلىق جەڭىلدىكتەرمەن پايدالاناتىندىقتان, ولارعا ۇستەماقى تولەۋ ورىنسىز دەگەن ۇستانىمى ەشقانداي سىن كوتەرمەيدى. بۇعان قوسا, ءتيىستى ۇستەماقىنى الۋ قۇقىعىنان ايرىلعان اسكەري مەديتسينالىق مەكەمەلەردىڭ مەديتسينالىق جۇمىسكەرلەرىنىڭ قاتارىندا اسكەري قىزمەتشىلەرگە جاتپايتىن ازاماتتىق قىزمەتكەرلەر دە بار",- دەلىنگەن  قركف حاتىندا.

قركف COVID-19 پاندەمياسىمەن كۇرەسكە تارتىلعان مەديتسينا قىزمەتكەرلەرىنىڭ ۇلەسىن ءادىل باعالاۋ ماقساتىندا ولاردى مەملەكەت تاراپىنان قولداۋدىڭ (قورعاۋدىڭ) تۇراقتى تۇردە قولدانىلاتىن قوسىمشا شارالارىن زاڭنامالىق دەڭگەيدە بەكىتۋدى ۇسىنىپ وتىر.

«