باتىس قازاقستان وبلىستىق قازاقستان حالقى اسسامبلەياسى كورەي مادەني-اعارتۋشىلىق بىرلەستىگى بەلسەندىلەرى ورال قالاسىندا «بەس ۇرپاق» اتتى شاعىن ساياباق اشىپ, جالاڭاياق جۇرۋگە ارنالعان «دەنساۋلىق جولى» ساۋىقتىرۋ جولاعىن اشتى.
وڭىردەگى ۇلتتىق-مادەني ورتالىقتار بىلتىردان بەرى جاڭا ءۇردىس باستادى. وتكەن جىلى ازەربايجان ورتالىعى ورال قالاسىنداعى ازەربايجان كوشەسىنە 50 ءتۇپ شىرشا ەگىپ, ءوز قامقورلىعىنا العان بولاتىن. وڭىردەگى اسسامبلەيا جەتەكشىسى عايسا قاپاقوۆتىڭ يدەياسىنان تۋعان بۇل باستامانى بيىل كورەي ۇلتتىق مادەني بىرلەستىگى جالعادى.
– قازاقستاندا كورەي ۇلتىنىڭ ءجۇز مىڭنان استام وكىلى تۇرادى. 1937 جىلى ستاليندىك رەپرەسسيا كەزىندە قيىر شىعىستاعى اتامەكەنىنەن كۇشتەپ كوشىرىلگەن كورەيلەر قازاق جەرىنە العاش تابان تيگىزسە, بۇگىندە بۇل توپىراقتا سول بوسقىنداردىڭ بەسىنشى ۇرپاعى دۇنيەگە كەلىپ جاتىر. بۇگىنگى گۇلزار باقتىڭ اتاۋىن «بەس ۇرپاق» دەپ اتاۋىمىزدىڭ سەبەبى وسى. مۇندا قويىلعان ورىندىقتاردىڭ ءوزى وسى بەس ۇرپاقتىڭ وزىنە ءتان ءداۋىردى كوزگە ەلەستەتەدى. سونىمەن قاتار ءوزىم دارىگەر بولعاندىقتان, ارنايى ۇسىنىس ايتىپ, جالاڭاياق جۇرۋگە ارنالعان «دەنساۋلىق جولى» سوقپاعىن جاسادىق. تابانداعى نۇكتەلەر ارقىلى ادامنىڭ ىشكى اعزاسىنا, ماڭىزدى مۇشەلەرىنە اسەر ەتۋگە بولادى. بۇگىنگىدەي الەمدى جايلاعان پاندەميا كەزىندە دەنساۋلىق – زور بايلىق ەكەنىنە كوزىمىز جەتتى عوي. اقجايىق وڭىرىندەگى كورەي دياسپوراسىنىڭ قولداۋىمەن اشىلىپ وتىرعان بۇگىنگى گۇلزار ورالدىقتار ءماندى دە پايدالى دەمالاتىن سۇيىكتى مۇيىسكە اينالادى دەپ سەنەمىن, – دەيدى كورەي قوعامدىق بىرلەستىگىنىڭ توراعاسى ۆيتالي ان.
كارىس حالقىنىڭ دۇنيەتانىمىندا قازاقپەن سايكەسەتىن سالت-ءداستۇر كوپ ەكەن. سونىڭ ءبىرى – كيەلى داراقتى ءتاۋ ەتىپ, تاڭىرىدەن تىلەك تىلەپ, اعاش بۇتاعىنا شۇبەرەك بايلاۋ. «بەس ۇرپاق» ساياباعىندا ءدال وسىنداي سيمۆوليكالىق «بايتەرەك» ورناتىلعان. سونداي-اق, جاڭا ۇيلەنگەن جاس جۇبايلار نەكە بەرىك بولۋى ءۇشىن وسى گۇلزارداعى جۇرەك بەينەسىنە كەلىپ, ق ۇلىپ تاعىپ, كىلتىن «ماحاببات قۇدىعىنا» تاستايدى.
باتىس قازاقستان وبلىسى