ەلورداداعى تالدىكول ماڭىن اباتتاندىرۋ, كوگالداندىرۋ جونىندە وسىعان دەيىن دە بىرقاتار جوبا قاراستىرىلعان بولاتىن. ونىڭ ىشىندە ديسنەيلەند ورتالىعىن قۇرۋ سىندى كۇللى استانالىقتاردى بەيجاي قالدىرماعان اۋقىمدى جوبالار بولدى. جۋىردا نۇر-سۇلتان قالاسىنىڭ ساۋلەت, قالا قۇرىلىسى جانە جەر قاتىناستارى باسقارماسى اتالعان كولدىڭ ماڭىنان اشىلۋى جوسپارلانىپ وتىرعان تابيعي پاركتىڭ سىزباسىن جاريالادى.
جوبا بويىنشا, رەكرەاتسيالىق ايماقتىڭ اۋماعى 5700 گەكتاردى قامتيدى. ساياباق قالانىڭ وڭتۇستىك-باتىسىندا – قورعالجىن شوسسەسى, ش.ايتماتوۆ كوشەسى مەن ك-1 اينالما جولى ارالىعىندا ورنالاسادى دەپ جوسپارلانىپ وتىر. تۇجىرىمداماعا سايكەس, پارك بىرنەشە ايماققا بولىنەدى. ونىڭ ىشىندە ورمان پاركى, سۋلى-باتپاقتى القاپ, حايۋاناتتار پاركى, سافاري پاركى جانە ەتنوپارك قاراستىرىلعان. سونداي-اق جوبادا ۆيزيت ورتالىق, قوناق ءۇي مەن مەيرامحانالار كەشەنى, بالالار مەن سپورتتىق الاڭدار دا كورسەتىلگەن.
قازىر جاسىل ايماقتىڭ تابيعي عىلىمي نەگىزدەمەسى جاسالعان. پارك قىزىل كىتاپقا ەنگەن قۇستار مەن جانۋارلاردىڭ تىرشىلىك ەتۋ ورتاسى رەتىندەگى تابيعي قالپىن ساقتايدى, سونىمەن بىرگە ستۋدەنتتەرگە, بيولوگتارعا, يحتيولوگتارعا, ورنيتولوگتارعا, ەكولوگتارعا ارنالعان ايرىقشا ءبىلىم ورتالىعىنا اينالادى دەپ كۇتىلۋدە.
پارك جۇمىسىنا ۇلىبريتانياداعى تاجىريبە رەتىندە لوندوندىق سۋلى-باتپاقتى القاپتىڭ ۇلگىسى, Rainham Marshes تابيعي پاركى, شەرۆۋد ورمانى مەن Minsmere قورىعىنىڭ ۇلگىسى پايدالانىلماق. قارجى كوزى – ۇلىبريتانيا قۇستارىن قورعاۋ كورولدىك قوعامىنىڭ بيوالۋانتۇرلىلىكتى ساقتاۋ باعدارلاماسى بويىنشا بولىنگەن گرانت.
ايتا كەتۋ كەرەك, تالدىكول كولى 1970-2015 جىلدارى سۋ جيناقتاۋ-بۋلاندىرۋ قىزمەتىن اتقاردى. جەرگىلىكتى دارەجەدەگى ورنيتولوگيالىق ماڭىزدى اۋماقتا ماۋسىمدىق ميگراتسيا كەزىندە قۇستاردىڭ 200-گە تارتا ءتۇرىن كورۋگە بولادى, ونىڭ ىشىندە بۇيرا بىرقازان, اقباس ۇيرەك, سۇڭقىلداق اققۋ, اققۇيرىق سۋبۇركىت سياقتى ەرەكشە تۇرلەرى بار. سونداي-اق كول اۋماعىنا تيەسىلى دالالى اۋماقتا وسىمدىكتەردىڭ 98 ءتۇرى تىركەلگەن.