نۇر-سۇلتان اكىمدىگى № 3 كوپسالالى قالالىق اۋرۋحاناسىنىڭ "رامادا پلازا" جۇقپالى اۋرۋلار ستاتسيونارىنداعى ناۋقاستار ءۇشىن زاماناۋي تالاپتارعا ساي 500 كوپفۋنكتسيالى كەرۋەت ساتىپ الدى, دەپ حابارلايدى Egemen.kz
كەرۋەتتەر ءدارى-دارمەك شتاتيۆتەرىمەن جابدىقتالعان. پايدالانۋعا وتە ىڭعايلى جانە ەركىن قوزعالادى. قازىرگى ۋاقىتتا استانادا 4 مىڭعا جۋىق توسەك-ورىندىق 16 ستاتسيونار جۇمىس ىستەيدى. مەملەكەت باسشىسىنىڭ تاپسىرماسىمەن ەلوردا اۋرۋحانالارى مەن ەمحانالارىنا كوروناۆيرۋس پەن پنەۆمونيانى ەمدەۋ ءۇشىن قوسىمشا مەديتسينالىق جابدىقتار كەلىپ ءتۇستى.
تاياۋ كۇندەرى قالا اۋرۋحانالارى مەن ەمحانالارىنا تاعى وكپەنى جاساندى جەلدەتۋگە ارنالعان 50 اپپارات, 250-دەن استام وتتەگى كونتسەنتراتى, 350 فلۋومەتر, 2 كومپيۋتەرلىك توموگراف جانە ت.ب. جابدىقتار كەلىپ تۇسەدى. سونىمەن قاتار قالاداعى دارىحانالارعا كوروناۆيرۋس پەن پنەۆمونيانى ەمدەۋ ءۇشىن 80 توننادان استام ءدارى-دارمەك ءتۇستى. اتالعان كومەك ءتۇرى گۋمانيتارلىق جۇك رەتىندە ەمەس, ءدارىحانالار جەلىسى ديستريبيۋتەرلەرىنىڭ قارجىسى ەسەبىنەن الىنعان. اكىمدىك تاراپىنان ولارعا ءدارى-دارمەكتى ساتىپ الۋعا قارجى ءبولىنىپ, كولىكپەن جەتكىزۋگە كومەك كورسەتىلۋدە. بۇگىن-ەرتەڭ قالاعا قوسىمشا دارىلەر جەتكىزىلەدى.