تۇركىستان وبلىسىنىڭ پوليتسەيلەرى شايحانا يەسىنەن جىرتقىش قۇستاردى تاركىلەدى. تۇلكىباس اۋداندىق پوليتسيا بولىمىنە تابيعاتتى قورعاۋ پوليتسياسىنىڭ ينسپەكتورى ن. مۇزدىباەۆتان ازاتتىق كەنتىندەگى شايحانادان سيرەك كەزدەسەتىن جىرتقىش قۇستارعا ۇقساس بىرنەشە قۇس تابىلعانى تۋرالى حابارلاما كەلىپ تۇسكەن. وقيعا ورنىنا كەلگەن اۋداندىق پوليتسيا ءبولىمى قىزمەتكەرلەرى شايحانانىڭ يەسى التى قۇستى عيماراتتىڭ اۋلاسىندا زاڭسىز توردا ۇستاعانىن انىقتادى, - دەپ حابارلايدى Egemen.kz.
ايعاقتى زات رەتىندە الىنىپ, ساراپتاماعا جىبەرىلگەن قۇستار كەزقۇيرىق جانە جاعالتاي بولىپ شىقتى. پوليتسيا قىزمەتكەرلەرىنىڭ حابارلاۋىنشا, اتالعان جايت قر اقبتك-ءنىڭ 389-بابى “جابايى جانۋارلار مەن وسىمدىكتەردىڭ تۇرلەرىن, ولاردىڭ بولىكتەرىن نەمەسە دەريۆاتتارىن زاڭسىز يەمدەنۋ, وتكىزۋ, الىپ ءوتۋ, اكەلۋ, اكەتۋ, ساقتاۋ (ۇستاۋ)” بويىنشا تىركەلىپ, اكىمشىلىك حاتتاما تولتىرىلعان. جيناقتالعان ءىس-قۇجاتتارى شەشىم شىعارىلۋ ءۇشىن سوتقا جولدانادى.
ءتارتىپ ساقشىلارى وسى باپتىڭ سانكتسيالارىنا سايكەس جابايى جانۋارلار, وسىمدىكتەردىڭ تۇرلەرى مەن ولاردىڭ ونىمدەرى تاركىلەنە وتىرىپ, جەكە تۇلعالارعا – ون, شاعىن كاسىپكەرلىك سۋبەكتىلەرىنە – وتىز, ورتا كاسىپكەرلىك سۋبەكتىلەرىنە – ەلۋ, ءىرى كاسىپكەرلىك سۋبەكتىلەرىنە جەتپىس ايلىق ەسەپتىك كورسەتكىش مولشەرىندە ايىپپۇل سالىناتىنىن ەسكەرتەدى.
تۇركىستان وبلىسى