بۇل ءدال قازىر بارشا قازاقستاندىق فۋتبول جانكۇيەرىن الاڭداتقان ساۋال دەسەك, ارتىق ايتقاندىق ەمەس شىعار. ويتكەنى پاندەمياعا بايلانىستى ەل بىرىنشىلىگى وسىمەن ەكىنشى رەت كەيىنگە شەگەرىلدى. ناۋرىزدا باستالعان چەمپيونات ەكى تۋردان سوڭ ۋاقىتشا توقتاتىلسا, ءبىرىنشى شىلدەدە قايتا جالعاسقان دوپ دوداسى ءۇشىنشى تۋردان كەيىن ەلدەگى كارانتين جاعدايىنا بايلانىستى تاعى دا بەلگىسىز مەرزىمگە كوشىرىلدى.
بۇگىندە فۋتبولدىڭ باسى-قاسىندا جۇرگەن اتقامىنەرلەر مىنا جاعدايدا قايتسەك ىشكى چەمپيوناتتى جالعاستىرامىز دەپ باس قاتىرىپ جاتىر. قازاقستان كاسىپقوي فۋتبول ليگاسىنىڭ باسشىلىعى ءتۇرلى نۇسقالاردى ويلاستىرىپ, ەڭ وڭتايلىسى دەگەندى كلۋب جەتەكشىلەرىنە جىبەرۋدە. ماسەلەن, ەلدەگى ەپيدەميالىق جاعدايعا بايلانىستى ارنايى جوسپار ازىرلەنىپ, كلۋب باسشىلارىنا OLIMPBET-فۋتبولدان قازاقستان چەمپيوناتىنىڭ بىرنەشە تۋرىن ءبىر قالادا وتكىزۋگە ۇسىنىس جاسالدى. ارنايى قۇرىلعان كوميسسيا دوپ دوداسىن الماتى جانە تالعار قالالارىنداعى تەكسەرۋدەن وتكەن 4 ستاديوندا شىلدەنىڭ 24-ىنەن باستاپ جالعاستىرۋدى كوزدەپ وتىر. الايدا بىرنەشە كوماندا چەمپيوناتتى باستاۋعا قارسىلىق تانىتقان.
ولاردىڭ اراسىندا التى دۇركىن ەل چەمپيونى «استانا» كومانداسى دا بار. ويتكەنى قازىر ەلوردا ۇجىمىندا نەگىزگى قۇرامنىڭ ءتورت فۋتبولشىسى پنەۆمونيامەن, تاعى تورتەۋى كوروناۆيرۋسپەن اۋىرىپ جاتىر. ونىڭ ۇستىنە كلۋبتىڭ نەگىزگى ستاديونى سانالعان «استانا ارەنادا» ءالى كۇنگە دەيىن ىشكى قۇرىلىس جۇمىسى بىتپەي جاتىر. وسىلاردى ەسكەرگەن «استانا» باسشىلىعى بىرىنشىلىكتى كەيىنگە شەگەرە تۇرۋعا نيەتتى.
ال ليگا باسشىلىعى تامىز ايىنىڭ ورتاسىندا باستالاتىن ەۋروكۋبوك باسەكەسىنە قاتىساتىن كوماندالار ءسال بولسا دا ويىن تاجىريبەسىن جيناپ ۇلگەرسىن دەگەن نيەتپەن بىرىنشىلىكتى مەيلىنشە ەرتە باستاۋعا تىرىسىپ باعۋدا. دەگەنمەن بۇل جوسپار ءالى مادەنيەت جانە سپورت مينيسترلىگى مەن دەنساۋلىق ساقتاۋ مينيسترلىگىندە تالقىلانىپ جاتىر. ەگەر جاۋاپتى مەكەمەلەر بۇل ۇسىنىسقا كەلىسىم بەرمەسە, ىشكى چەمپيونات كارانتين اياقتالعانىن كۇتۋگە ءماجبۇر بولادى.
ال ءبىرىنشى ليگا كوماندالارى اراسىنداعى چەمپيوناتتى ەكى كونفەرەنتسياعا ءبولىپ, تەك قانا ءبىر اينالىم وتكىزۋ ۇسىنىلدى. بۇل ليگانىڭ كەزدەسۋلەرىن دە ءبىر لوكاتسيادا وتكىزۋ جوسپارلانۋدا, اتالعان ورىن كەيىن بەلگىلى بولادى. قازاقستان كۋبوگىن وتكىزۋ جولدارى OLIMPBET-فۋتبولدان قازاقستان چەمپيوناتى جالعاسقاننان كەيىن قاراستىرىلادى.
ەسكە سالا كەتەيىك, فۋتبولدان قازاقستان چەمپيوناتىنىڭ ءۇشىنشى تۋرىنان كەيىن «قايرات» 9 ۇپايمەن كوش باستاپ كەلەدى. ەكىنشى جانە ءۇشىنشى ورىندى 7 ۇپايى بار «توبىل» مەن «شاحتەر» كلۋبتارى ءبولىسىپ تۇر. الماتىلىق ۇجىم باسقا كلۋبتارعا قاراعاندا ءبىر تۋر ارتىق وتكىزگەن.