دەنساۋلىق ساقتاۋ ءمينيسترى الەكسەي تسوي «قوعامدىق باقىلاۋ» ازاماتتىق باستاماسىن قولداۋ ماقساتىندا ەرىكتىلەر قوزعالىسىنىڭ بەلسەندىلەرىمەن, دارىگەرلەرمەن, ۇەۇ وكىلدەرىمەن ونلاين-كەزدەسۋ وتكىزدى. كۇن تارتىبىندە مونيتورينگتىك توپتاردىڭ جۇمىسىن ۇيىمداستىرۋ, ولاردىڭ ناقتى قىزمەتىن انىقتاۋ, قۇقىقتىق مارتەبە بەرۋ ماسەلەلەرى تالقىلاندى.
الماتى قالاسى بويىنشا «قوعامدىق باقىلاۋ» قوعامدىق باستاماسىنىڭ بەلسەندىسى سايدا تاۋەكەلوۆانىڭ ايتۋىنشا, ءدارىحانالاردى تەكسەرگەندە, گۋمانيتارلىق جۇكتەردى جەتكىزۋگە كومەكتەسكەندە جانە مەديتسينالىق ۇيىمدارعا رەيد بارىسىندا قۇقىقتىق سيپاتتاعى ماسەلەلەر ءجيى تۋىندايدى. ء«اربىر مونيتورينگتىك توپتىڭ ناقتى قىزمەتىن بەلگىلەپ, ەرىكتىلەرگە كۋالىك, جادىناما مەن تانۋ بەلگىلەرىن بەرۋ كەرەك, تۇسكەن اقپاراتتى وڭدەپ, ونى شەشىم قابىلداۋ ءۇشىن ءتيىستى ينستانتسيالارعا بەرۋ قاجەت», دەدى ەرىكتىلەر قوزعالىسىنىڭ جەتەكشىسى.
«قوعامدىق باقىلاۋدىڭ» رەسپۋبليكالىق ۇيلەستىرۋشىسى ليما دياستىڭ پىكىرىنشە, جۇمىستى ءبىر جۇيەگە قويىپ, ەڭ باستىسى دارىگەرلەردىڭ قىزمەتىنە كەدەرگى كەلتىرمەي, ماماندار مەن پاتسيەنتتەردىڭ دەنساۋلىعىنا قاۋىپ توندىرمەۋ قاجەت. ەرىكتىلەرگە قاتاڭ سانيتارلىق رەجىمدەگى مەكەمەلەرگە, ينفەكتسيالىق ستاتسيونارلارعا كىرۋىنە رۇقسات ەتۋ كەرەك. ول بارلىق وبلىستا ەرىكتىلەر قوزعالىسىنىڭ ۇيلەستىرۋ ورتالىعى قۇرىلعانىن حابارلادى. اۋرۋحانالارعا كەلگەن گۋمانيتارلىق جۇكتەردى بىرگە جەتكىزۋ بويىنشا مونيتورينگ جۇرگىزگەنىن, ءدارى-دارمەكتىڭ بار-جوعىن انىقتاۋ ءۇشىن دارىحانالارعا تەكسەرۋ جۇرگىزىلگەنىن, مەديتسينالىق ۇيىمدارعا بارۋ جوسپارلانىپ وتىرعانىن ايتتى.
دەپۋتات يرينا سميرنوۆا قوعامدىق توپتار ازاماتتاردىڭ دەنساۋلىعىن قورعاۋ ىسىنە باعا جەتپەس ۇلەس قوسىپ, ءدارىحانالاردى ءدارى-دارمەكپەن قامتاماسىز ەتۋدە ۇلكەن قادام جاساپ وتىر دەپ ەسەپتەيدى. سونداي-اق قوستاناي وبلىسى دەنساۋلىق ساقتاۋ باسقارماسىنىڭ وكىلى كسەنيا جىلقىباەۆا جۇقپالى جانە پروۆيزورلىق ستاتسيونارلاردىڭ مەديتسينا قىزمەتكەرلەرى قوعامدىق باقىلاۋ جۇمىسىنان قاۋىپتەنگەنىن جەتكىزدى. «ەرىكتىلەردىڭ يگى نيەتى ينفەكتسيا ءورشىپ تۇرعان قاۋىپتى اۋرۋحانالارعا باقىلاۋسىز ساياحاتقا اينالماۋى ءتيىس», دەدى ول دارىگەرلەردىڭ اتىنان.
– قوعامدىق باقىلاۋدىڭ نەگىزگى مىندەتى – اۋرۋحانالار مەن ءدارىحانالاردىڭ جۇمىسىنا كەدەرگى جاساۋ ەمەس, جاعدايعا ەموتسياسىز وبەكتيۆتى باعا بەرۋ, – دەدى نۇر-سۇلتان قالاسى بويىنشا قوزعالىس بەلسەندىلەرىنىڭ ءبىرى ۆەرا كيم. – ءبىز ءۇشىن كەرى بايلانىستىڭ بولعانى, باق-تا, الەۋمەتتىك جەلىلەردە جاعدايدى جاريالاۋ وتە ماڭىزدى. ءبىزدىڭ قىزمەتىمىز كۆي-گە شالدىققان ادامداردىڭ مۇڭ-مۇقتاجىنا باعىتتالعان, ولار تولىق مەديتسينالىق كومەك الادى.
«دەنساۋلىق ساقتاۋ مينيسترلىگىنىڭ كەلىسىمى مەن رەگلامەنتى بولسا, كۆي-گە شالدىققان ناۋقاستار ەمدەلىپ جاتقان مەديتسينالىق ۇيىمدارعا بارۋدى جوسپارلايمىز. جاقىن ارادا ەرىكتىلەردىڭ جۇمىسىنا ارنالعان مەموراندۋم – قۇقىقتىق بازا, ەرىكتىلەرگە ارنالعان جادىناما جانە ماقساتتى مونيتورينگتىك توپتاردىڭ رەگلامەنتى ازىرلەنەدى. ءبىز دەنساۋلىق ساقتاۋ مينيسترلىگى مەن جەرگىلىكتى اتقارۋشى ورگانداردى, اتاپ ايتقاندا دەنساۋلىق ساقتاۋ باسقارماسىنىڭ قولداۋىنا ۇمىتتەنەمىز», دەدى بەلسەندىلەر.
مينيستر بارلىق تاراپتىڭ پىكىرلەرىن تىڭداپ, «قوعامدىق باقىلاۋ» مۇشەلەرىنەن كەلىپ تۇسەتىن اقپاراتپەن ناقتى جۇمىس ىستەۋدىڭ ماڭىزدىلىعىن اتاپ ءوتتى, بۇل جەرگىلىكتى اتقارۋشى ورگانداردىڭ قاتىسۋىمەن جۇيەلى ماسەلەلەردى شەشۋگە مۇمكىندىك بەرەدى.
«كۆي-گە قارسى بىرگە كۇرەسۋىمىز كەرەك. ءبىزدىڭ مىندەتىمىز – دۇرىس دەنساۋلىق ساقتاۋ جۇيەسىن قۇرۋ. جەرگىلىكتى جەرلەر سالعىرتتىق تانىتپاۋى ءتيىس, سونىمەن بىرگە دارىگەرلەردى قولداپ, قامقورلىق كورسەتۋگە مىندەتتىمىز. پاتسيەنتتەرگە كەلەتىن بولساق, ەگەر زاڭسىز جاعدايلار بولسا نەمەسە كومەك كورسەتۋ ستاندارتتارىنا سايكەس كەلمەسە, ونىڭ سەبەپتەرىن انىقتاۋ كەرەك. دارىگەرلەر مەن پاتسيەنتتەردىڭ ار-نامىسى مەن ابىرويى قورعالۋى ءتيىس», دەدى دەنساۋلىق ساقتاۋ ءمينيسترى.
سونداي-اق ول ەرىكتىلەر قاۋىپسىزدىك شارالارى مەن سانيتارلىق نورمالاردى ساقتاۋى قاجەت ەكەنىن, مىندەتتى تۇردە قاتاڭ نۇسقامادان ءوتۋى تيىستىگىن, ويتكەنى ينفەكتسيانى جۇقتىرۋ قاۋپى جوعارى ەكەنىن جەتكىزدى. سوندىقتان ستاتسيونارلاردىڭ قاتاڭ تالاپتارىن ساقتاۋ وتە ماڭىزدى. ۆەدومستۆو باسشىسىنىڭ ايتۋىنشا, ەگەر زاڭ بۇزىلسا, شاعىمدار بەلگىلى ءبىر نورمالاردى ساقتاي وتىرىپ راسىمدەلۋى قاجەت.
«زاڭ بۇزۋعا بولمايدى. دەنساۋلىق ساقتاۋ مينيسترلىگى ونى تۇراقتى باقىلاۋدا ۇستايدى جانە قاداعالايدى», دەدى مينيستر.
ەرىكتىلەر قوزعالىسىنىڭ مۇشەسى ءبيبىنۇر شەراليەۆا مينيسترگە بىرقاتار ۇسىنىس ايتتى. ماسەلەن, جۇمىسى توقتاپ تۇرعان مەديتسينالىق جابدىقتاردى قايتا ءبولۋ, سونداي-اق ەپيدەميا كەزىندە پاتسيەنتتەرگە پسيحولوگيالىق قولداۋ كورسەتۋ. دەنساۋلىق ساقتاۋ ءمينيسترى بارلىق ۇسىنىستى مۇقيات تىڭداپ, مەديتسينالىق كومەك ساپاسىن ارتتىرۋ جانە مەديتسينالىق ۇيىمداردىڭ جۇمىسىن جاقسارتۋ ءۇشىن «قوعامدىق باقىلاۋ» بەلسەندىلەرىنە جان-جاقتى قولداۋ كورسەتۋگە دايىن ەكەندىگىن ءبىلدىردى.