پاندەميا كەزىندە ءوزى ءبىلىم الىپ جۇرگەن شوتلانديادا كارانتيندە قالعان كوللەدج ستۋدەنتى 48 كۇندە ۆەلوسيپەدپەن ۇيىنە جەتكەن. 20 جاستاعى گرەكيا ازاماتى كوروناۆيرۋس سالدارىنان اۋە جولدارى جابىلعانىن ەستىپ, تۋعان جەرىنە قاراي ۆەلوسيپەدپەن شىعىپ كەتەدى. مۇنداي شەشىمگە ابەردين ۋنيۆەرسيتەتىنىڭ ينجەنەرلىك فاكۋلتەتىنىڭ ستۋدەنتى كلەون پاپاديميتريۋ رەيسى ءۇش رەت ۇشپاي قالعاننان كەيىن بارعان.
افيناداعى ۇيىنە دەيىن ول 2175 ءميلدى ۆەلوسيپەدتە باعىندىرام دەپ شەشكەن. ول جولعا 10 مامىر كۇنى شىققان. وزىمەن بىرگە ساياحاتقا ارنالعان شاتىر, ۇيىقتايتىن قاپ, كونسەرۆىلەر مەن نان العان. جول بويى ول ورمانداردا, دالادا, كەيدە قوناقجاي ادامداردىڭ ۇيىندە تۇنەگەن. 27 ماۋسىمدا ونى تۋعان جەرىندە تۋىستارى, دوستارى جانە ارنايى ءموبيلدى قوسىمشا ارقىلى جولىن باقىلاپ وتىرعان بەيتانىس ادامدار قوشەمەتپەن كۇتىپ العان.
ۇيىنە جەتكەنگە دەيىن جاس ساياحاتشى انگليا, نيدەرلاند, ودان بىرنەشە كۇن گەرمانيانى, اۋستريا مەن يتاليانىڭ شىعىس جاعالاۋىن ءجۇرىپ وتكەن. ەلۋ كۇنگە جۋىق ساياحاتىن قورىتىندىلاي كەلە پاپاديميتريۋ كوپ نارسە ۇيرەنگەنىن ايتادى. «جەكە تۇلعا رەتىندە دامىدىم, وزىمە دەگەن سەنىمىم ارتتى. بۇل جولدى ءجۇرىپ وتپەگەن بولسام, مۇنداي ارەكەت قولىمنان كەلمەس دەپ ويلار ەدىم», دەيدى ول. پاندەميا كەزىندە ومىرلىك ساباق العان ستۋدەنت جازعى جۇمىسىمەن قاتار قازىر كەلەسى ساياحاتتارىن دا جوسپارلاپ جۇرگەن كورىنەدى.