زاڭ بۇزۋشىلىقتار تۋرالى ماتەريالدار تاۋارلار مەن كورسەتىلگەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنە جىبەرىلدى, دەپ حابارلايدى ەلوردا اكىمدىگىنىڭ ءباسپاسوز قىزمەتى.
نۇر-سۇلتان قالالىق پوليتسيا دەپارتامەنتىنىڭ ەسىل اۋداندىق پوليتسيا باسقارماسى باسشىسى ماديار ايتۋعانوۆتىڭ ايتۋىنشا, سوڭعى تاۋلىكتە نۇر-سۇلتاندا كارانتين ءتارتىبىن بۇزعان 60 جاعداي انىقتالعان.
ء"تارتىپ ساقشىلارى, ەپيدەميولوگتار, ەرىكتىلەر, جەرگىلىكتى اتقارۋشى ورگانداردىڭ وكىلدەرى كارانتين رەجيمىن بۇزعانداردى انىقتاۋ بويىنشا رەيد جۇرگىزۋدە. سوڭعى تاۋلىكتە ەلوردادا ءموبيلدى توپتار كارانتين ءتارتىبى بۇزىلعانىن انىقتادى. ونىڭ ىشىندە ماسكا تاعۋ جانە الەۋمەتتىك قاشىقتىق ساقتاۋ بويىنشا مىندەتتى تالاپتار ساقتالماعان 42 جاعداي جانە تىيىم سالىنعان ۋاقىتتا جۇمىس ىستەگەن 18 كاسىپكەر انىقتالدى", – دەيدى م.ايتۋعانوۆ.
قالالىق پوليتسيا دەپارتامەنتىنىڭ حابارلاۋىنشا, زاڭ بۇزۋ تۋرالى ماتەريالدار نۇر-سۇلتان قالاسىنىڭ تاۋارلار مەن كورسەتىلگەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنە تاپسىرىلعان. ەلوردادا 16 مونيتورينگتىك ءموبيلدى توپ جۇمىس ىستەيدى. ولار ويىن-ساۋىق ورىندارىنا, قوعامدىق تاماقتانۋ نىساندارىنا, ساۋنا, مونشا, اتتراكتسيوندارعا بارىپ, تەكسەرىس جۇرگىزەدى. سونىمەن قاتار, بۇگىن ەلوردادا مونيتورينگتىك توپ بوتانيكالىق باقتا ازاماتتارعا سانيتارلىق تالاپتار مەن ەرەجەلەردى ساقتاۋ بويىنشا ءتۇسىندىرۋ جۇمىسىن جۇرگىزدى.
"ەگەر ازامات ەرەجەگە ادەيى باعىنبايتىن بولسا نەمەسە سول زاڭ بۇزۋشىلىق بويىنشا قايتا ۇستالسا, ءتيىستى حاتتاما تولتىرىلادى. ازاماتتاردىڭ كوپشىلىگى ءتۇسىندىرۋ جۇمىستارىن دۇرىس قابىلداپ جاتىر. بىراق بۇل ءىس-شارالار وزدەرىنىڭ قاۋىپسىزدىگى ءۇشىن وتكىزىلىپ جاتقانىن تۇسىنبەيتىندەر دە بار", - دەيدى ايتۋعانوۆ.
كارانتين رەجيمىن ساقتاماعان جاعدايدا جەكە تۇلعالارعا 30 اەك (83 340 تەڭگە), زاڭدى تۇلعالارعا 230 اەك (638 940 تەڭگە) كولەمىندە ايىپپۇل سالىناتىن بولادى.