ەسكى قالاشىقتاعى جاڭا جوبالار

بۇل ىستەر كارانتيندىك ءتارتىپ پەن سانيتارلىق-ەپيدەميولوگيالىق تالاپتاردىڭ جانە قاۋىپسىزدىك شارالارىنىڭ مۇقيات ساقتالۋى جاعدايىندا جۇزەگە اسىرىلۋدا. وسىلايشا جۇمىس اۋقىمى بەلگىلەنگەن كەستەگە ساي اتقارىلۋدا.

قالانىڭ ورتالىق اۋماقتارىنا قوسا ونىڭ كونە بولىگىندەگى جولداردى جوندەۋ جۇمىستارى دا قولعا الىنعانى تۇرعىنداردىڭ ريزاشىلىعىن تۋعىزىپ وتىر. ءبىز تاياۋدا اقتوبەدەگى وسىنداي بايىرعى مەكەنجايلاردىڭ ءبىرى – تۇرعىنۇي قالاشىعى اۋدانىندا بولىپ, ناقتى ءىستىڭ جاي-كۇيىمەن تانىسقان ەدىك. ەسكى دە بولسا حالىق تىعىز قونىستانعان بۇل ماڭايداعى جوندەۋ جۇمىستارىن جۇرگىزۋ "اسسانا-دورستروي" جشس-ىنا تاپسىرىلىپتى.  اتالعان مەردىگەرلىك كومپانيانىڭ قۇرىلىسشى ماماندارى كەشەندى ءىستىڭ باسىم بولىگىن الدىمىزداعى قىركۇيەك ايىنا دەيىن اياقتاۋدى جوسپارلاپ وتىر ەكەن. ياعني, مۇندا سول كەزگە دەيىن 1164 مەتر جولعا اسفالت-بەتون جابدىقتارى توسەلمەك. وعان قوسا, ءبۇيىر تاستار ورناتىلىپ, جۇرگىزۋشىلەر مەن جاياۋ جۇرگىنشىلەرگە ىڭعايلى جاعدايلار تۋعىزىلماق. ەجەلگى تۇرعىنداردىڭ ايتۋىنشا, اتالعان اۋدان اۋماعىنا كىرەتىن كەيبىر جولداردىڭ جوندەۋ كورمەگەنىنە ەلۋ جىلعا جۋىقتاپتى.

بۇعان قوسا اباتتاندىرۋ مەن كوگالداندىرۋ جۇمىستارى ۇمىت قالىپ قويعانعا ۇقسايدى. ونى جونگە كەلتىرۋ مەن رەتتەۋ جونىندەگىۇسىنىس-تىلەكتەر جەرگىلىكتى تۇرعىندار تاراپىنان قالا جانە وبلىس باسشىلارىنا دا ايتىلىپتى.

ارينە مۇنى ورىنسىز دەۋگە بولمايدى. ايتسە دە تۇرعىن ءۇيدىڭ اينالاسىن تازا ۇستاۋ, تال-تەرەكتەر مەن اعاشتار وتىرعىزۋ, مۇمكىندىگىنە قاراي قولدان كەلەتىن وزگە دە جەڭىل-جەلپى اباتتاندىرۋ جۇمىستارىمەن اينالىسۋ – تۇرعىنداردىڭ وزدەرىنە دە قاتىستى ەكەنى ەشقانداي تالاس تۋعىزبايدى. ەگەر ولار كولدەنەڭ جاتقان كەسەكتى الۋ قاجەت دەپ تاپپاسا, اباتتاندىرۋ ىسىندەگى پروبلەمالار قوردالانىپ قالماعاندا قايتەدى؟ تۇرمىس مادەنيەتى ۇساق-تۇيەك دەۋگە مۇلدەم بولمايتىن ۇقىپتى شارۋاقورلىق كوزقاراستان باستالسا, قانشا جىل وتسە دە تۇرعىنۇي قالاشىعى اۋدانى اۋماعى ءدال قازىرگى كۇيدەگىدەي ىبىرسىپ, اشىلىپ-شاشىلىپ كەتپەگەن بولار ما ەدى دەگەن وي كەلەدى.

دەگەنمەن, قازىرگى كۇنى تۇرعىندار تىلەگى اياقسىز قالماي, ەسكى قالاشىقتى قايتادان جاڭعىرتۋ جونىندەگى جوبا جاساقتالعانىن دا اتاپ ايتۋعا تۇرارلىق. سوعان سايكەس ەڭ الدىمەن بيىلعى جىلى كونە قالاشىق اۋماعىنا كىرەتىن اۋلالارعا دا اسفالت توسەلمەك. راسىندا دا بايىرعى تۇرعىندار اتاپ كورسەتكەندەي مۇندا بۇل باعىتتاعى جۇمىستار ەلۋ جىل ۋاقىت بويى تاسادان قالىپ كەلىپتى. ونىمەن اينالىسۋ جونىندەگى وي بۇعان دەيىن ەشكىمنىڭ باسىنا كىرىپ-شىقپاپتى. بۇعان قوسا فۋتبول مەن كوشە گيمناستيكاسىن جاساۋعا مۇمكىندىك بەرەتىن  – ۆوركاۋت  الاڭدار ورناتىلماق.

وسىلايشا كونە قالاشىقتىڭ ەلۋ جىلدان بەرى جيناقتالىپ قالعان ماسەلەلەرى مەن پروبلەمالارى بىرتىندەپ قالپىنا كەلەتىن بولادى. ونىمەن ىرگەلەس 312-ءىنشى اتقىشتار ديۆيزياسى داڭعىلى بويىندا اۆتوكولىك جولدارىن باسقارۋدىڭ تەحنيكالىق قۇرالدارى ورناتىلۋدا. الداعى تامىز ايىندا شىعاناق بەرسيەۆ پەن قازاقستاننىڭ 30 جىلدىعى كوشەلەرىندەگى اسفالت پەن جاياۋ جۇرگىنشىلەر جولدارىن ورناتۋ جۇمىستارى دا تولىقتاي اياقتالماق. وسىلايشا ەسكى قالاداعى جاڭا جوبالار جالعاسىن تابا بەرمەك دەدى گازەت تىلشىسىنە اقتوبە وبلىسىنىڭ اكىمى وڭداسىن ورازالين.