سەيسەنبى كۇنى مەملەكەت باسشىسى نۇرسۇلتان نازارباەۆ «ازىرەت سۇلتان» مەشىتىندە بولىپ, قازاقستاندىقتاردى, ءيسى مۇسىلمان قاۋىمىن قاسيەتتى قۇربان ايت مەرەكەسىمەن قۇتتىقتادى.
سەيسەنبى كۇنى مەملەكەت باسشىسى نۇرسۇلتان نازارباەۆ «ازىرەت سۇلتان» مەشىتىندە بولىپ, قازاقستاندىقتاردى, ءيسى مۇسىلمان قاۋىمىن قاسيەتتى قۇربان ايت مەرەكەسىمەن قۇتتىقتادى.
اللا ۇيىنە كەلگەن نۇرسۇلتان نازارباەۆ وسىناۋ قاسيەتتى كۇندى بۇكىل مۇسىلمان الەمى اتاپ وتەتىنىن جەتكىزە كەلە, ۇلت پەن ۇلىستى بىرىكتىرەتىن ۇلىق مەيرامنىڭ ماڭىزىنا توقتالدى.
«بۇگىن بارلىق مۇسىلمان ءۇشىن ماڭىزدى كۇن – قۇربان ايت مەرەكەسى. بۇل مەيرامدى مۇسىلمان الەمى, دۇنيە جۇزىندەگى 1,5 ميلليارد مۇسىلمان جۇرتشىلىعى ۇلكەن قۇرمەتپەن اتاپ وتۋدە. قازاقستاندا ءبىز بۇل كۇندى وزگە دە ءدىني سەنىمدەگىلەردىڭ مەرەكەسى سياقتى اتاپ وتەمىز. حالىقتىڭ بىرلىگىنىڭ, وتانعا دەگەن سۇيىسپەنشىلىگىنىڭ ارقاسىندا ءبىزدىڭ ەلىمىز تابىستى تۇردە دامىپ كەلەدى. تاۋەلسىزدىك كەزەڭىندە حالقىمىز ءوزىنىڭ تاريحي ءدىنى – يسلام دىنىنە قايتا ورالدى, بۇل ءبىزدى قۋانتادى. بۇگىندە كۇللى ەلىمىز بويىنشا 3 مىڭنان استام مەشىت بار. ءبىز قازاقستانداعى ەڭ ۇلكەن مەشىتتى استانادا سالدىق. وسىنىڭ بارلىعى ەلگە دەگەن قامقورلىق, مۇسىلماندارعا دەگەن قامقورلىق, – دەدى مەملەكەت باسشىسى.
قازاقستان پرەزيدەنتى قازاقستاندىقتاردىڭ ەلدەگى بەيبىتشىلىك پەن تىنىشتىق, باق-بەرەكە مەن بىرلىك تىلەگەن بارلىق دۇعاسىنىڭ قابىل بولۋىن تىلەدى.
«بۇگىن قۇرباندىق شالىپ, مۇسىلماندار تازا, ادال نيەتتەرىمەن ەلىمىز بەن حالقىمىزعا ىزگىلىك پەن باقىت تىلەيدى. ەلىمىزدى بەرەكە مەن بىرلىككە شاقىرادى. سول تىلەكتىڭ بارلىعى ورىندالسىن. مۇسىلماننىڭ شالعان قۇرباندىعى مەن دۇعا-تىلەگى قابىل بولىپ, اللانىڭ قۇلاعىنا شالىنسىن. اللا تاعالا بىزگە تىنىشتىق جانە كوپۇلتتى ءارى كوپكونفەسسيالى حالقىمىزعا بىرلىك بەرسىن. قازاقتاردى, مۇسىلمانداردى, حالىقتىڭ بارلىعىن اللا بىرلىكتەن ەشۋاقىتتا اجىراتپاسىن. سوندا ءبىز ەلىمىزدىڭ بارشا ازاماتتارىنىڭ يگىلىگى ءۇشىن قازاقستاندى ودان ءارى وركەندەتە بەرەتىن بولامىز», – دەدى نۇرسۇلتان نازارباەۆ.
ءسوزىنىڭ سوڭىندا مەملەكەت باسشىسى قازاقستان حالقىن قاسيەتتى قۇربان ايت مەرەكەسىمەن تاعى دا قۇتتىقتاپ, ءار شاڭىراققا جاقسىلىق, بەرەكە-بىرلىك, بەيبىت ءومىر جانە يگىلىك تىلەدى.