قازاق ەلى قاجىرلى قالامگەر, قاستەرلى پەرزەنتىمەن قوشتاستى. مەملەكەتتىك سىيلىقتىڭ لاۋرەاتى قاجىعالي مۇقامبەتقالي ۇلىنىڭ جەتپىس سەگىز جاسىندا جەر بەتىندەگى ساپارى اياقتالدى. اقتوبە ءوڭىرىنىڭ قىزىلبۇلاق اۋىلىنان باستالعان جاستىقتىڭ جالعىزاياق سوقپاعى ەرەن ەڭبەكتىڭ, ەلدىك مۇراتتىڭ, ەلگە دەگەن ماحابباتتىڭ, كەڭدىك پەن كىسىلىكتىڭ, تازالىق پەن تۇلعالىق بولمىستىڭ, تولعامى تولىمدى, جازعانى مول ۇلكەن جۇرەكتى جازۋشىنىڭ جولىنا اينالدى.
قازاق ادەبيەتىنە قۋاتتى قالامىمەن قالتقىسىز قىزمەت ەتكەن, ەل ءومىرىنىڭ ەلەۋلى كەزەڭدەرىن, تۋعان ولكەنىڭ تولعاۋلى تاريحىن, ىلكى زاماننىڭ, ىرگەلەس جىلداردىڭ ىركەس-تىركەس وقيعالارىن ورامدى وي, ورنىقتى سوزبەن بەينەلەگەن سۋرەتكەردىڭ ۋاقىت كەرۋەنىنە ارتقان مۇراسى دا از ەمەس.
جازۋشى قالامىنان تۋعان شىعارمالار وزەگىنەن كۇرەسكەر حالىقتىق رۋحتىڭ بايانىن, قوعام ءومىرىنىڭ جۇلگەسى ۇزىلمەگەن جارقىن شەجىرەسىن كورەمىز. ءار جىلدار بەدەرىندە «جۇلدىزدى تۇندەر», «توعاي سىبدىرى», «جاڭعىرىق», «قايداسىڭ سەن, ماحاببات؟», «سىنىق تەرەزە», «جالعىز جيەن» سەكىلدى اڭگىمەلەر مەن پوۆەستەر جيناقتارىن, الەم جازۋشىلارى شىعارمالارىنان ءتارجىمالارىن ۇسىنسا, «تار كەزەڭ» تاريحي رومانى ءۇشىن مەملەكەتتىك سىيلىقتى الدى.
اقتوبە وبلىستىق تەلەۆيزيا جانە راديو كوميتەتىندە, وبلىستىق گازەتتە ادەبي قىزمەتكەر, «قازاقستان» باسپاسىندا اعا رەداكتور, «جۇلدىز» جۋرنالىندا ءبولىم مەڭگەرۋشىسى, «قازاق ادەبيەتى» گازەتىندە جاۋاپتى حاتشى, «جاڭا فيلم» جۋرنالىندا باس رەداكتور قىزمەتتەرىن اتقاردى.
كورنەكتى قالامگەر قازاسىنا قايعىرا وتىرىپ, وتباسىنا, تۋعان-تۋىستارىنا كوڭىل ايتامىز.
ەگەمەنقازاقستاندىقتار