تۇركىستان وبلىسىندا سۋ ايدىندارىندا ادامداردىڭ قازا بولۋى بۇگىنگى تاڭدا وزەكتى ماسەلەلەردىڭ بىرىنە اينالىپ وتىر. جىل باسىنان بەرى 23 ادام قازا تاپقان, ونىڭ 11-ءى بالا.
تۇركىستان وبلىسى توتەنشە جاعدايلار دەپارتامەنتى مالىمدەگەندەي, 12-13 شىلدە كۇندەرى بىرنەشە جازاتايىم وقيعا ورىن العان. اتاپ ايتقاندا, وتىرار اۋدانى, اقكول اۋىلىندا سىرداريا وزەنىندە 1997 جىلى تۋعان ازامات سۋعا كەتكەن. سونداي-اق وسى كۇنى اتالعان اۋداننىڭ ءشامشى اۋىلىندا ارىس وزەنىندە 1967 جىلى تۋعان ازاماتتىڭ ءمايىتى تۋىستارىمەن شىعارىلعان. كۋاگەرلەردىڭ ايتۋىنشا, مارقۇم ماس كۇيىندە سۋعا تۇسكەن. ال 13 شىلدە كۇنى ارىس قالاسىندا ارىس وزەنىندە 1991 جىلى تۋىلعان ازامات سۋعا باتقان. بۇدان وزگە, سايرام اۋدانى, اقسۋكەنت-2 اۋىلى تۇرعىنىنىڭ ءۇي جانىندا سىعىمدالعان ءشوبى بار "گازەل" اۆتوكولىگى تولىعىمەن جانىپ كەتكەن. ءورت سالدارىنان جۇرگىزۋشىنىڭ 2011 جىلى تۋعان ءىنىسى سول مەزەتتە ۇيقىدا بولىپ, كولىك ىشىنەن شىعا الماي وقيعا ورنىندا قايتىس بولدى. مامانداردىڭ مالىمدەۋىنشە, ءورت كولىك بورتىنداعى جينالعان ءشوپ ەلەكتر سىمدارىنا ءتيىپ, قىسقا تۇيىقتالۋ سالدارىنان شىققان.
ازاماتتاردىڭ قاۋىپسىزدىگىن قامتاماسىز ەتۋ ماقساتىندا دەپارتامەنتتىڭ قۇرىلىمدىق جانە اۋماقتىق بولىمشەلەرى ۇگىت - ناسيحات جۇمىستارىن كەڭ كولەمدە جۇرگىزۋدە. جەرگىلىكتى پوليتسيا قىزمەتىمەن بىرلەسە جۇرگىزىلگەن 181 رەيدتىك جۇمىسناتيجەسىندە 22 ازاماتقا 236 مىڭ 130 تەڭگە اكىمشىلىك ايىپپۇل سالىنعان.