الەۋمەتتىك مەديتسينالىق ساقتاندىرۋ قورىنىڭ باسقارما توراعاسى ايباتىر جۇماعۇلوۆ بلوگەرلەرمەن ونلاين-كەزدەسۋ وتكىزدى. كەزدەسۋگە قوعامدىق پىكىر كوشباسشىلارى نۇرلان وتەشەۆ, اياز بي, دۋمان قاپاسوۆ, سامات ىسقاقوۆ جانە البينا اتەن قاتىستى.
اڭگىمەلەسۋ بارىسىندا قور قاراجاتىن ماقساتتى جۇمساۋ, سونداي-اق پاندەميا كەزىندەگى مەديتسينالىق ساقتاندىرۋ جۇيەسىنىڭ جۇمىس ماسەلەلەرى تالقىلاندى.
قوردىڭ باسقارما توراعاسى ايباتىر جۇماعۇلوۆ سونداي-اق الەۋمەتتىك جەلىلەردە ءوز وتباسىنا قاتىستى, كولىك داۋى تۋرالى تاراتىلعان اقپاراتقا تۇسىنىكتەمە بەرىپ ءوتتى. اسق باسشىسى بۇل وقيعا وسىدان 13 جىل بۇرىن, 2007 جىلى ياعني ايباتىر جۇماعۇلوۆ ءالى مەملەكەتتىك قىزمەتكە كەلمەگەن كەزدە بولعانىن اتاپ ءوتتى. بۇل اقپارات الەۋمەتتىك جەلىگە ءتورت جىل بۇرىن جازىلعان ەدى.
«پاندەميا ۋاقىتى, ادامدارعا سىيلىقتار تاراتىپ, توي تويلايتىن كەزەڭ ەمەس. كەيبىر ادامدار مۇراعاتتان ءتورت جىل بۇرىنعى الەۋمەتتىك جەلىلەردەگى پوستى شىعارىپ, قازىرگى تاڭدا ورىن العانداي ەتىپ كورسەتىپ وتىر. وسىنداي جاڭالىقتاردى تاراتۋ نە ءۇشىن كەرەك بولعانىن تۇسىنبەيمىن. بۇل اقپارات حالىقتىڭ اشۋ-ىزاسىنا تيەدى دەپ ويلايمىن. بىراق بۇل بارىپ تۇرعان ادەپسىزدىك دەپ بىلەمىن. ءبىزدىڭ وتباسىمىزدا ءبىر عانا كولىك بار», – دەپ اتاپ ءوتتى ايباتىر جۇماعۇلوۆ.
اسق باسشىسىنىڭ ايتۋىنشا, اڭگىمە ءبىر مەزگىلدە كولىك ساتىپ الۋ تۋرالى ەمەس, ولاردى بىرتىندەپ اۋىستىرۋ تۋرالى بولدى. ايباتىر جۇماعۇلوۆ نەكە قيعان 25 جىل ىشىندە ورتاق وتباسىلىق اۆتوكولىكتى جاڭارتىپ وتىرعاندارىن ايتتى.
وسىلايشا قوردىڭ باسقارما توراعاسى جۇرتشىلىقپەن ديالوگقا ءوزىنىڭ قاي كەزدە دە اشىق ويىن بىلدىرە الاتىنىن, كەز كەلگەن سۇراققا جاۋاپ بەرە الاتىندىعىن كورسەتتى.
سونىمەن قاتار ايباتىر جۇماعۇلوۆ قوردىڭ 1406 call-ورتالىعى, سونداي-اق قوسىمشالار جەلىسىندە قولجەتىمدى Qoldau 24/7 ءموبيلدى قوسىمشاسى ارقىلى قابىلداناتىن ازاماتتاردىڭ شاعىمدارىمەن جۇمىسى تۋرالى ايتىپ بەردى.
«قوسىمشاعا قوڭىراۋ شالۋ كەزىندە ىركىلىستەر بولدى. بۇل قوڭىراۋلاردىڭ كوبەيۋىنە بايلانىستى, كۇنىنە 30 مىڭعا دەيىن قوڭىراۋ كەلىپ ءتۇستى. بىراق بىزدە call back, ياعني كەرى قوڭىراۋ جۇمىس ىستەيدى. Qoldau 24/7 ءموبيلدى قوسىمشاسى بار – بۇل مەديتسينالىق قىزمەتتەرگە شاعىم جىبەرۋگە بولاتىن مەحانيزم. ولار باس دارىگەر مەن دەنساۋلىق ساقتاۋ باسقارماسىنا كەلىپ تۇسەدى. ەگەر شاعىمدار نەگىزدەلگەن جانە شەشىلمەگەن بولسا, وندا بۇل ماسەلەلەردى جۇيەلى تۇردە تالقىلاۋ ءۇشىن ءبىزدىڭ شتابتارعا جەتكىزەمىز», – دەپ اتاپ ءوتتى ايباتىر جۇماعۇلوۆ.
قوردىڭ باسقارما توراعاسى بلوگەرلەردىڭ سۇراقتارىنا جاۋاپ بەرىپ, مۇنداي كەزدەسۋلەر كەڭ اۋديتوريا اراسىندا اقپاراتتى تاراتۋ ءۇشىن ىڭعايلى فورمات بولىپ تابىلاتىنىنا توقتالا كەتتى. كەزدەسۋ سوڭىندا مۇنداي جيىنداردى جۇيەلى تۇردە ونلاين-فورماتتا وتكىزۋ ۇسىنىلدى.