بۇگىن الماتى اكىمى باقىتجان ساعىنتاەۆ سەلەكتورلىق كەڭەس بارىسىندا فارماتسەپتيكالىق يندۋستريا وكىلدەرىمەن ءدارى-دارمەك پرەپاراتتارىن جانە مەديتسينالىق زاتتاردى ءۇزىلىسسىز جەتكىزۋدى قامتاماسىز ەتۋ ماسەلەلەرىن تالقىلادى.
كەڭەستەگى باستى ماسەلە – ءدارى-دارمەك نارىعىنىڭ تۇراقتىلىعىن قامتاماسىز ەتۋ بولدى. وندىرىستىك كومپانيالاردىڭ, ءدارىحانالار جەلىسىنىڭ جانە سالالىق قاۋىمداستىقتىڭ وكىلدەرى ءدارى-دارمەكتەردىڭ قورى جانە ولاردى ۋاقتىلى جەتكىزۋدىڭ جوسپارلارى تۋرالى ايتتى. سونىمەن قاتار, ولار پروتسەدۋرالاردى راسىمدەۋ جانە جۇكتەردى قابىلداۋ تۋرالى دا ءسوز ەتتى.
قالا اكىمى ءتيىستى قىزمەتتەرگە مەديتسينالىق پرەپاراتتار مەن زاتتاردىڭ ەش كەدەرگىسىز ءوتۋىن قامتاماسىز ەتۋدى تاپسىردى. قاجەت بولسا سالىقتىق جانە كەدەندىك اكىمگەرلىك, سونىمەن قاتار شەتەلدىك تاۋار سەرتيفيكاتتارىن الۋ جەدەلدەتىلەدى.
بۇلاردان وزگە, كەڭەستە ءدارى-دارمەكتىڭ تۇراقتى قورىن قۇرۋ ماسەلەسى دە تالقىلاندى. ياعني, وتە قاجەت ءدارى-دارمەكتەردىڭ جارتىجىلدىق قورى جاسالادى, ەگەر ءدارى تاپشىلىعى ورىن السا, ولار بىردەن قالانىڭ ءدارىحانا جەلىسىنەن الىناتىن بولادى.
باقىتجان ساعىنتاەۆ قازىرگى كەزدە قالا تۇرعىندارىنىڭ دەنساۋلىعىن ساقتاۋ ءبىرىنشى كەزەكتەگى ءارى باستى مىندەت ەكەنىن اتاپ ءوتتى. دەنساۋلىق ساقتاۋدىڭ قاجەتتىلىگىنە ءتيىستى قارجىنىڭ بارلىعى بولىنەتىن بولادى.
قالا اكىمى ءدارى-دارمەك نارىعىنا قاتىسۋشىلاردى ءدارى-دارمەكتىڭ جەتكىزىلۋى تۋرالى شۇعىل اقپارات بەرۋگە جانە دەر كەزىندە كومەك الۋعا شاقىردى. بارلىق ماسەلەلەر شۇعىل شەشىلەتىن بولادى