بايتەرەك اۋدانىنا قاراستى يانايكين اۋىلىنداعى مادەنيەت ءۇيىنىڭ الدىنا «دومبىرا» ءمۇسىنى ورناتىلدى.
ۇلتتىق دومبىرا كۇنىنە وراي ورناتىلعان بۇل كەشەندى جاساعان – ۇلكەن شاعان مەكتەبىنىڭ مۇعالىمى, جاس شەبەر رۋسلان احمەتوۆ. قاسيەتتى شاڭىراق اياسىندا تۇرعان دومبىرا بەينەسىنىڭ استىنداعى تاقتايشادا اقىن قادىر مىرزا ءالىنىڭ ايگىلى: «ەكى ىشەكتىڭ ءبىرىن قاتتى, ءبىرىن ءسال-ءسال كەم بۇرا. ناعىز قازاق – قازاق ەمەس, ناعىز قازاق – دومبىرا!» – دەگەن جىر جولدارى جازىلعان. اۋىلدىڭ ءسانىن كەلتىرگەن بۇل كەشەننىڭ قارجىسىن جەرگىلىكتى كاسىپكەرلەر, «دۇيسەن» جانە «وتەپ» شارۋا قوجالىقتارى كوتەرىپ الىپتى.
«رۋحاني جاڭعىرۋ» باعدارلاماسى اياسىندا بوي كوتەرگەن كومپوزيتسيانى اۋىل اقساقالى, ارداگەر حايرۋش وتارباەۆ پەن جاس دومبىراشى نۇرلىبەك مۇعالىموۆ اشتى. حايرۋش اعاي ۇلتىمىزدىڭ ۇلى اسپابى, مۋزىكالىق مۇراسى تۋرالى ءسوز قوزعاسا, نۇرلىبەك قوس ىشەككە ءتىل ءبىتىرىپ, كۇي تارتتى.
– قازاق پەن دومبىرا – ەگىز ۇعىم عوي. ۇلتتىڭ ۇنىنە اينالعان قاسيەتتى اسپابىمىز اۋىل تورىنەن ورىن العانىنا قۋانىشتىمىز. وسى ەسكەرتكىشتى ورناتۋعا قولداۋ كورسەتكەن اۋىل كاسىپكەرلەرىنە اۋدان اكىمى اتىنان العىس بىلدىرەمىن, – دەدى وسى سالتاناتقا ارنايى كەلگەن بايتەرەك اۋداندىق ىشكى ساياسات ءبولىمىنىڭ باسشىسى نۇرجان ءدۇزباتىر.
باتىس قازاقستان وبلىسى