باتىس قازاقستان جوعارى مەديتسينالىق كوللەدجى جانىندا جاستارعا ازاماتتىق-پاتريوتتىق, ەستەتيكالىق-ەكولوگيالىق تاربيە بەرىپ, سالاۋاتتى ءومىر سالتىن ناسيحاتتايتىن پاندىك ۇيىرمەلەرگە 800-گە جۋىق ستۋدەنت مۇشە.
جالپى مەديتسينا ماماندىعىنىڭ ءوزى قايىرىمدىلىق, ياعني بوگدە ادامعا كومەك بەرۋدەن باستاۋ الادى عوي. سوندىقتان كوللەدج ستۋدەنتتەرى تاجىريبەلىك ساباقتاردا ءتۇرلى ورتاعا بارىپ, ەل مەديتسيناسىنىڭ دامۋىنا قاتىستى مالىمەتتەردى جينايدى. ءىرى ساۋدا ورتالىقتارى مەن بازارلاردا, حالىق كوپ جينالاتىن ورىنداردا ادامداردىڭ قان قىسىمىن جۇيەلى تۇردە ولشەپ تۇرادى. بۇل ءىس ولاردىڭ وقۋ باعدارلاماسىنا كىرمەيدى. بىراق بولاشاق كاسىبىنە ساي ادامدارمەن دۇرىس قارىم-قاتىناس ورناتۋ, حالىقپەن مادەنيەتتى, ساۋاتتى سويلەسە ءبىلۋ, جالپى كوممۋنيكاتيۆتىك داعدىسىن قالىپتاستىرۋ ماقساتىندا جۇرگىزىلەدى. ەمدەۋ مەكەمەلەرى مەن جەدەل-جاردەم ستانسالارىندا وتكىزىلەتىن تاجىريبەلىك ساباقتاردان بولەك, ءتۇرلى الەۋمەتتىك مەكەمەلەردە دە ولار العان ءبىلىمىن تاجىريبە جۇزىندە بايقاپ كورەدى. ال پاتروناجدىق كۇتىمگە بارۋ ارقىلى ەرىكتى رەتىندە ۋچاسكەلىك مەدبيكەگە كومەك كورسەتەدى. مۇنان باسقا ەمدەلۋشىلەردى ەلەكتروندى جۇيەگە تىركەۋ, ولاردىڭ اۋرۋ تاريحىنداعى مالىمەتتەردى كومپيۋتەرلىك جۇيەگە ەنگىزۋ, ەمدەلۋشىنى قابىلداۋ كەزىندەگى كاسىبي كومەكتەر سىندى جۇمىستار ەمحانالاردا جەتەرلىك. وسىنىڭ ءبارىن مەديتسينالىق كاسىپكە ماشىقتانىپ جۇرگەن ەرىكتىلەر اتقاراتىنى ءسوزسىز.
دەنساۋلىق باسقارماسى جانىنان جۇمىس جاسايتىن كوپتەگەن ۇيىمدار, مىسالى «سالاۋاتتى ءومىر سالتىن قالىپتاستىرۋ» ورتالىعى, سپيد, ۆيچ – اۋرۋلارىمەن كۇرەس ورتالىقتارى, قان ورتالىعى ماماندارى دا كوللەدج ەرىكتىلەرىنىڭ قىزمەتىنە جۇگىنەدى. ايتالىق, «مەدبيكەلىك ءىس» ءبولىمىنىڭ «مەيىرىم» ۇيىرمەسى ەرىكتىلەرى مەكتەپ وقۋشىلارى مەن مەكتەپكە دەيىنگى ۇيىمداردا قول جۋ تەحنيكاسىن ۇيرەتۋ ساباقتارىن جۇيەلى تۇردە جۇرگىزەدى. ال «ايالى الاقان» ۇيىرمەسى ۋچاسكەلىك دارىگەرلەرگە قولعابىس ەتسە, «گيپپوكرات» ۇيىرمەسىنىڭ مۇشەلەرى مۇمكىندىگى شەكتەۋلى بالالاردى تاربيەلەيتىن ورتالىق قىزمەتكەرلەرىنە ءجيى كومەككە بارادى. ولار ءوز قولىمەن توقىعان ويىنشىقتارىن سىيلاپ, جالپى كۇتىم بويىنشا العان ءبىلىمىن ءىس جۇزىندە قولدانادى. «اكۋشەرلىك ءىس» ءبولىمىنىڭ ەرىكتىلەرى ءوز ماماندىعىنا ساي مەكتەپتەر مەن كوللەدجدەردە, جوعارى وقۋ ورىندارىندا «قىز بالالاردىڭ جەكە باس گيگيەناسى», «جوسپارسىز جۇكتىلىك سالدارى», «وتباسىن جوسپارلاۋ», «قىز تاعدىرى – ەل تاعدىرى» تاقىرىپتارىندا تانىمدىق دارىستەر مەن ترەنينگتەر وتكىزۋدى داستۇرگە اينالدىرعان. «فارماتسيا» ءبولىمىنىڭ ەرىكتىلەرى اتالعان ماماندىقتى مەكتەپ وقۋشىلارىنا مەيلىنشە ناسيحاتتاۋدى ماقسات ەتسە, «گيگيەنا جانە ەپيدەميولوگيا», «لابوراتوريالىق دياگنوستيكا» ءبولىمىنىڭ ەرىكتىلەرى تازالىق, جەكە باس گيگيەناسى, سالاۋاتتى ءومىر سالتى, زياندى ادەتتەردەن اۋلاق بولۋ سىندى تاقىرىپتاردا اقپاراتتىق دارىستەر, ۆيدەوروليكتەردى وقۋ ورىندارىنا تاراتۋمەن اينالىسادى. «ەمدەۋ ءىسى» ءبولىمىنىڭ ەرىكتىلەرى جەدەل جاردەم ستانسالارىندا, كانيكۋل كەزىندە اۋىلدىق فەلدشەرلىك امبۋلاتوريالاردا ماۋسىمدىق ۆيرۋستىق دەرتتەردەن ساقتاندىرۋ نەمەسە الدىن الۋ جۇمىستارىنا بەلسەندى ارالاسادى.
2020 جىلدىڭ ەرىكتىلەر جىلى دەپ اتالعان ساتىنەن باستاپ, كوللەدجدەگى بەلسەندى ستۋدەنتتەر توپتاسقان جاستار كوميتەتى مۇشەلەرى ەرىكتىلىككە تالپىنىسى بار جاستاردان ۆولونتەر توبىن جاساقتاپ, جوعارىدا تىزبەكتەلگەن ءىس-شارالارعا قوسىمشا بىرنەشە جۇمىستى اتقارىپ ۇلگەردى. ەل پرەزيدەنتى قاسىم-جومارت توقاەۆتىڭ ءوزى بەلگىلەپ بەرگەن ەرىكتىلىكتىڭ 7 باعىتىن نەگىزگە العان جاستار كوميتەتىنىڭ «اشىق جۇرەك» ەرىكتىلەرى ء«بىلىم» باعىتىندا كوللەدجدىڭ ءبىتىرۋشى تۇلەكتەرىنە «ديپلوممەن اۋىلعا!» باعدارلاماسى جونىندە تولىق اقپارات بەرۋ ماقساتىندا «مەملەكەتتىك باعدارلامالار جاستارعا قىزمەت ەتەدى» تاقىرىبىمەن جاستار رەسۋرستىق ورتالىقتارى ماماندارىمەن, وبلىستىق ەكونوميكا جانە بيۋدجەتتى جوسپارلاۋ باسقارماسىنىڭ مامانىمەن, Jas Otan جاستار قاناتى وكىلدەرى قاتىسۋىمەن دوڭگەلەك ۇستەل ۇيىمداستىردى. ء«ۇمىت» باعىتىندا «شاپاعات» مەديتسينالىق-الەۋمەتتىك مەكەمەسىنە «كۇلكى تەراپياسى» باعدارلاماسىمەن بارىپ, مۇگەدەك بالالاردىڭ كوڭىلىن كوتەرىپ قايتتى. قالالىق جاستار رەسۋرستىق ورتالىعىنىڭ جاستارىمەن بىرىگىپ, قالامىزدىڭ ارداگەرلەرىنىڭ ۇيىنە ءار اپتانىڭ بەيسەنبى, جۇما كۇندەرى بارىپ, دەنساۋلىقتارىنا باقىلاۋ جاساپ تۇرۋ «قامقور» باعىتىندا جولعا قويىلعان. «اسىل مۇرا» باعىتى « ۇلى جولدار ءوز تابالدىرىعىڭنان باستالادى» ۇرانىمەن كوللەدج كىتاپحاناسىندا كىتاپتاردى تۇپتەۋ, جەلىمدەۋ جۇمىستارىن اتقارىپ, الەۋمەتتىك جەلى ارقىلى كومەك سۇراعان ورال قالالىق زاعيپ جاندارعا ارنالعان ارناۋلى كىتاپحاناسىندا دا سانيتارلىق, تازالىق جۇمىستارىن جۇرگىزدى. سونداي-اق كوللەدج ەرىكتىلەرى وزدەرى قۇرالىپتاس جاستارعا العاشقى كومەك كورسەتۋدىڭ وڭتايلاندىرىلعان ادىسىنەن ماستەر-كلاسس ۇيىمداستىرىپ وتىرادى.
ەلدە جاريالانعان توتەنشە جاعدايعا بايلانىستى قاشىقتان وقىتۋ رەجىمىندە ءبىلىم الۋشىلار كارانتين كەزىندە دە «قول جۋ الگوريتمدەرى» بەينەروليگىن ءتۇسىرىپ, الەۋمەتتىك جەلى ارقىلى كوپشىلىككە تاراتتى. ىندەتپەن كۇرەس كەزىندە كوللەدجىمىزدىڭ 19 ستۋدەنتى جەدەل جاردەم ستانساسى قىزمەتكەرلەرى قاتارىندا تەڭ دارەجەدە ەل يگىلىگىنە ەڭبەك ەتىپ ءجۇر. بۇل ءبىز ءۇشىن ۇلكەن ماقتانىش.
اسەمگۇل ميمارۋكقىزى,
باتىس قازاقستان جوعارى مەديتسينالىق كوللەدجى
جاستار كوميتەتىنىڭ ينسپەكتورى