كەشە وبلىس اكىمى گۇلشارا ابدىقالىقوۆا وڭىرلىك كوممۋنيكاتسيالار قىزمەتىندە ءباسپاسوز ءماسليحاتىن وتكىزدى. ونلاين رەجىمدە وتكەن شارادا ايماق باسشىسى وڭىردە ەپيدەميالىق جاعدايعا بايلانىستى اتقارىلىپ جاتقان شارالار تۋرالى ايتىپ, ساۋالدارعا جاۋاپ بەردى.
وبلىس باسشىسى اپتا باسىندا تۇرعىندار تالابىنا ساي قاجەتتى شارالاردى كۇشەيتىپ, تۋىنداعان ماسەلەلەردى جەدەل شەشۋ ءۇشىن قالاداعى بىرقاتار اۋرۋحانالار مەن ءدارىحانالاردى ارالاعانىن اتاپ ءوتتى. ارالاۋ بارىسىندا ينفەكتسيالىق جانە پروۆيزورلىق توسەكتىك ورىندار سانىن كوبەيتۋ قاجەتتىگى انىقتالعان. وسى كۇنى وبلىس اۋماعىنداعى ينفەكتسيالىق ستاتسيونارلاردا 515, پروۆيزورلىق ستاتسيوناردا 1730 توسەكتىك ورىن بار. ودان بولەك, تەز ارادا وبلىستىق فتيزيوپۋلمونولوگيا ورتالىعى بازاسىندا قوسىمشا 120 ورىندىق ينفەكتسيالىق جانە جاڭاقورعان اۋدانىنداعى شالقيا ەلدى مەكەنىنەن 30 توسەكتىك پروۆيزورلىق ورىن اشىلادى. وبلىس باسشىسى وڭىردە ناۋقاستار ءۇشىن ورىن تاپشىلىعى جوقتىعىن, ەگەر قاجەتتىلىك تۋىنداعان جاعدايدا جەكە كلينيكالاردى دا وڭتايلاندىرىپ پايدالانۋعا كەلىسىم جاسالعانىن ايتىپ ءوتتى.
– مەديتسينا مەكەمەلەرىن ارالاۋ بارىسىندا بىرقاتار اۋرۋحانا باسشىلارى نەگىزگى پروبلەمالاردىڭ ءبىرى رەتىندە وتتەگى باللوندارىنىڭ جەتىسپەۋشىلىگىن ايتىپ وتىر. وسىعان بايلانىستى, ءوندىرۋشى مەكەمەلەرمەن بىرلەسە وتىرىپ سالا باسشىلارى مەن قالا, اۋدان اكىمدەرى اۋرۋحانالاردى ۇزدىكسىز جانە جەتكىلىكتى كولەمدە وتتەگى باللوندارىمەن قامتاماسىز ەتۋدىڭ بارلىق مۇمكىندىكتەرىن قاراستىرۋدا. سونىمەن قاتار وبلىستىق كوپبەيىندى اۋرۋحانا جانىنان وتتەگى وندىرەتىن تسەح سالۋ جۇمىستارى قولعا الىنىپ, وبلىستىق بيۋدجەتتەن 80 ملن تەڭگە قارجى ءبولىندى, – دەدى گۇلشارا ناۋشاقىزى.
وسى مامىر ايىندا وكپەنى جاساندى جەلدەتەتىن 20 قۇرىلعى الىنعان, تاعى 63-ىنە تاپسىرىس بەرىلدى. ەل جاعدايىنا الاڭداعان جەرگىلىكتى كاسىپكەرلەردىڭ دە وسىنداي اپپاراتتار الۋعا قولداۋ ءبىلدىرىپ وتىرعانى قۋانتادى.
ءدارىحانالاردا ۆيرۋسقا قارسى پرەپاراتتار بار, الايدا ديستريبيۋتورلار تاراپىنان تاپسىرىستا كورسەتىلگەن كولەم تولىعىمەن جەتكىزىلمەي وتىر. سوڭعى ءبىر اپتا كولەمىندە وبلىس ءدارىحانالارىندا 3 ايعا جەتەتىن ءدارى-دارمەك ساتىلىپ كەتىپ, جەتىسپەۋشىلىك تۋىندادى. تەك قىزىلوردا ەمەس, كۇللى ەل بويىنشا وسىنداي كورىنىس بايقالۋدا. مەديتسينالىق ستاتسيونارلاردا 45 كۇنگە جەتەتىن ءدارى-دارمەك قورى بار.
– تۇرعىندار اراسىندا ءدارىحانالاردا ءدارى-دارمەكتەردىڭ باعاسىنىڭ رەتسىز وسۋىنە بايلانىستى شاعىم كوپ. بۇل باعىتتا وبلىستىق تاۋارلار مەن كورسەتىلەتىن قىزمەتتەر ساپاسى مەن قاۋىپسىزدىگىن باقىلاۋ دەپارتامەنتى جۇمىس اتقارۋدا. سونداي-اق قالا, اۋدان اكىمدىكتەرى جانە Nur Otan پارتياسىنىڭ وبلىستىق فيليالى جانىنان قۇرىلعان ارنايى توپتار ءدارى-دارمەك باعاسى مەن كولەمىنە قاتاڭ باقىلاۋ جاسايدى, – دەدى وبلىس باسشىسى.
تۇرعىندار ءدارىحانالاردا ءدارى باعاسىنىڭ رەتسىز ءوسۋى تۋرالى دەرەكتەردى ءتيىستى ورىندارعا ەلەكتروندى تۇردە نەمەسە 40-00-01, 109 ءنومىرلى «جەدەل جەلى» ارقىلى حابارلاسىپ, جەتكىزە الادى. «جەدەل جەلى» تاۋلىك بويى جۇمىس ىستەيدى.
قازىر وبلىستاعى «جەدەل جاردەم» قىزمەتىنە جۇكتەمە 2 ەسەگە ءوسىپ, ديسپەتچەرلەر مەن قىزمەتكەرلەردىڭ جەتىسپەۋشىلىگى بايقالىپ وتىر. وسىعان بايلانىستى وبلىستا مەديتسينا ماماندىعى بار جاس ماماندار مەن ەرىكتىلەردى جۇمىسقا تارتۋ شارالارى قولعا الىنۋدا. ال ۇيدەن ەم الۋشىلارعا قوسىمشا كومەك بەرۋ ماقساتىندا 50-دەن استام دارىگەرلىك موبيلدىك توپ قۇرىلدى.
قىزىلوردا وبلىسى