الاتاۋدىڭ ار جاعىنان تاعى دا جايسىز حابار ەستىلدى. ماسەلەنى مامىلەمەن شەشۋ ورنىنا ءبىر-بىرىنە تاياق الا ۇمتىلىپ, ءالى جەتكەنى ولتىرۋدەن دە تايىنار ەمەس. م ۇلىكتى توناپ نەمەسە قيراتىپ, ءۇيدى ورتەپ, بىلگەندەرىن ىستەۋدە.
تاعى دا رەۆوليۋتسيا. قىرعىز اعايىندار 2005 جىلعى وقيعالاردى تاعى دا قايتالاپ وتىر. ارينە, ءار ەل ءوز جولىن ءوزى تاڭدايدى دەسەك تە, قىرعىز حالقىنىڭ تاعدىرلى كۇندەردى باستان كەشىپ جاتقانى انىق. بۇگىنگى وقيعا ەرتەڭگى كۇنى قالاي جالعاساتىنىن ءدوپ باسىپ ايتۋ قيىن.
بۇل ەلدە بيلىك پەن وپپوزيتسيانىڭ اراسىنداعى شيەلەنىس استە دە ۇزىلمەيدى. ونىڭ ءبىر ءسات كوتەرىلىپ, ونان سوڭ ءبىرشاما باسەڭدەيتىن كەزدەرى بار. وتكەن ايدىڭ ورتاسىندا وپپوزيتسيا مەن بيلىك كەزەكتەسىپ قۇرىلتايلار وتكىزگەندە, سول شيەلەنىستىڭ ءبىرشاما شارىقتاعانداي كەزى بولعان. ءسىرا, بيلىك ەندى وپپوزيتسيانىڭ قايتا باس قوسىپ, ۇيىمشىلدىقپەن ارەكەت ەتەتىنىن كۇتە قويماعانداي. ەندى قارسىلاستاردىڭ مامىلە جولىن ىزدەمەي, ءوز رايلارىنان قايتپاۋى وتقا ماي قۇيعانداي بولدى. العاشىندا سەيسەنبى كۇنى تالاس وبلىسىندا, ونىڭ ورتالىعىندا بولعان قاقتىعىس لەزدە بۇكىل ەلدى شارپىپ, اقىرىندا بىشكەك قالاسى وتقا وراندى.
ءيا, رەۆوليۋتسيا قىرعىزستانعا قايتا ورالدى. بۇل وتكەندەگىدەن دە قىزۋلاۋ دەسە, ارتىق ەمەس. كوتەرىلگەن حالىق وتكەننىڭ تاجىريبەسىنەن ساباق العانداي. قۇقىق قورعاۋ ورىندارىنىڭ ادامدارى كوز اشىتاتىن گازبەن, ءارى كەتسە رەزىڭكە وقپەن اتاتىنىن اڭعارعان كوتەرىلىسشىلەردىڭ تاياق پەن تاس قارۋلارى الدەقايدا كۇشتى ەدى. ولار بارلىق جەردە دە جەڭىسكە جەتىپ جاتتى.
وقيعانىڭ بارىسىن تاپتىشتەپ ايتۋدىڭ ءوزى ارتىق. ول ساعات سايىن وزگەرىپ جاتادى. سارسەنبى كۇنى قىرعىز استاناسى ۇلكەن شايقاستىڭ الاڭىنا اينالعانداي بولدى. رەسپۋبليكادا توتەنشە جاعداي جاريالانىپ, ءبىشكەكتە كومەندانتتىق ساعات ەنگىزىلگەنىنە قاراماي, كوتەرىلىسشىلەر مەن قۇقىق قورعاۋ ورىندارى ادامدارىنىڭ اراسىندا قاقتىعىس تولاستامادى. كوشەلەردە, الاڭداردا مۇمكىن بولعان ءنارسەنىڭ ءبارى قيراتىلدى. ۇيلەردىڭ تەرەزەلەرى شاعىلىپ, ماشينەلەر توڭكەرىلىپ, ورتەلدى.
قۇقىق قورعاۋ ورىندارىنىڭ كۇشتەرى وپپوزيتسيا جەتەكشىلەرىن قاماۋعا العاننان كەيىن شەرۋگە شىققانداردىڭ ارەكەتتەرى بۇرىنعىدان دا كۇشەيە ءتۇستى. ولار قارسىلاستارىنىڭ قارۋلارىن تارتىپ الا باستادى. بۇدان كەيىن الاڭعا جينالعان حالىقتىڭ قولداۋىمەن ولار ۇكىمەتتىك عيماراتتارعا شابۋىل جاسادى. سونىڭ سالدارىنان باس پروكۋراتۋرانىڭ, پارلامەنتتىڭ, ۇلتتىق قاۋىپسىزدىك قىزمەتىنىڭ عيماراتتارى وتقا وراندى. وپپوزيتسيا جەتەكشىلەرى قاماۋدان بوساتىلدى.
بۇل ەلدەن ناقتى رەسمي حابار الۋ قيىن. ۇكىمەتتىڭ تولىق قۇرامىندا قىزمەتىنەن كەتكەنى حابارلاندى. “حالىق سەنىمى ۇكىمەتىنە” باسشىلىققا تاعايىندالعان وپپوزيتسيانىڭ ءبىر كوسەمى ر.وتىنباەۆا وپپوزيتسيانىڭ ەلدەگى بيلىكتى قولدارىنا العانىن, ءسويتىپ, ۋاقىتشا ۇكىمەت قۇرىلعانىن, ونىڭ ەلدەگى جاعدايعا تولىق باقىلاۋ جاساپ وتىرعانىن مالىمدەدى. ءبىر دەرەكتەرگە قاراعاندا, پرەزيدەنت قۇرمانبەك باكيەۆ پەن قورعانىس ءمينيسترى ب.قالىەۆ وشتاعى پرەزيدەنت رەزيدەنتسياسىندا بولسا كەرەك.
قارۋلى قاقتىعىس بولعان جەردە ءولىم بار. دەنساۋلىق ساقتاۋ ورىندارى قازا بولعاندار سانىن ەلۋدەن اسىرىپ وتىر. جارالانعانداردى جاتقىزاتىن ورىن جەتپەۋدە دەگەن اقپارات بار.
ماماديار جاقىپ.