ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ جۇمىس ساپارىمەن تۇركىستان وبلىسىندا ءجۇر, دەپ حابارلادى مينيسترلىكتىڭ ءباسپاسوز قىزمەتى.
بۇل تۋرالى ول سارسەنبى كۇنى Twitter-دەگى پاراقشاسىندا جازدى.
"مەن تۇركىستان وبلىسىندا جۇمىس ساپارىمەن ءجۇرمىن. ساردوبا سۋ قويماسىنىڭ بۇزىلۋىنان كەيىنگى قالپىنا كەلتىرۋ جۇمىستارىمەن, وبلىستاعى كانالداردىڭ قۇرىلىسىمەن جانە جوندەۋىمەن تانىستىم", دەپ جازدى م.مىرزاعاليەۆ.
"وڭىردە سۋارمالى جەرلەردىڭ اۋماعىن ۇلعايتۋ بويىنشا وبلىس بويىنشا 536 مىڭ گا قارقىندى جۇمىستار جۇرگىزىلۋدە, ونىڭ ىشىندە 21 مىڭ گا قالپىنا كەلتىرىلۋگە جاتادى. وسى ماقساتتا جالپى ۇزىندىعى 736 كم جاڭا ارنالاردى, بارلىعى 122 ارنانى قالپىنا كەلتىرۋ جانە سالۋ بويىنشا اۋقىمدى جۇمىستار جۇرگىزىلۋدە. بۇل جۇمىستارعا 1500-دەن استام جۇمىسشى جۇمىلدىرىلدى, قوسىمشا مىڭداعان جۇمىس ورنى اشىلادى", - دەدى مينيستر.
سونداي-اق, مينيستر "بۇل ستراتەگيالىق مىندەت, ونى جۇزەگە اسىرۋ قورىتىندىسى بويىنشا اۋىل شارۋاشىلىعى تاۋارىن وندىرۋشىلەر سۋمەن قامتاماسىز ەتىلەدى, سونىڭ سالدارىنان وبلىستا وسىرىلەتىن اۋىل شارۋاشىلىعى ونىمدەرىنىڭ كولەمى ارتادى, اۋىل تۇرعىندارى تۇراقتى جۇمىسپەن قامتاماسىز ەتىلەدى, جەكە جەمىس - كوكونىس ونىمدەرى بويىنشا ەلدىڭ يمپورتقا تاۋەلدىلىگى تومەندەيدى جانە ت.ب.", - دەپ اتاپ ءوتتى.