كورشىم اقىق مۇعالىم ايتقان مىنا ءبىر جايت ءجيى ەسىمە تۇسەدى.
– ادامنىڭ اتى-جونىندە ءمان بار دەگەن وسى ەكەن. ادامبەك دەگەن وقۋشىم كوپ بالالى ۇيدەن, از قامتاماسىز ەتىلگەن وتباسىنان بولعان سوڭ مەكتەپ وعان كومەكتەسىپ تۇراتىن. مەنىڭ سىنىبىمدا سونداي 3-4 وقۋشى بار ەدى. ءبىر كۇنى ادامبەكتىڭ اناسى كەلىپ تۇر, – دەدى اقىق. – ۇكىمەت بەرىپ جاتقان 42 500 تەڭگەنى كۇتىپ ءجۇرىپ, مەن دە الدىم. سومكەمدە تۇر, الا عوي ءوزىڭ. ءسىزدىڭ سىنىپتاعى بالالارعا دا بۇيىردى, يگىلىكتى بولسىن! مەن ارتىق سويلەپ قويىپپىن, كەشىرىڭىز.
– قالايشا, تۇسىنبەدىم, بالالارعا بۇيىرعانى قالاي؟ – دەپ سۇرايدى مۇعالىم.
سويتسە, اياقكيىم الۋعا اقشا سۇراعان ادامبەك 42 500 تەڭگەنىڭ 20 مىڭ تەڭگەسىنە وزىنە جانە سىنىپتاس دوستارى اۋجار مەن انەسبەككە دە اياقكيىم مەن بالمۇزداق الىپ بەرىپتى.
– ءبىزدىڭ ۇيدە 4 بالا, ال ولاردىڭ ۇيلەرىندە 6-7 بالادان بار, اقشالارى جەتپەي تۇر كروسسوۆكا الۋعا. جالعىز ءوزىم كيىپ, دوستارىمدى قىزىقتىرىپ, جۇرەكتەرىن اۋىرتقىم كەلگەن جوق. ماما, نەگە ماعان رەنجيسىز؟ وسى 42 500 تەڭگەنى ۇنەمى الىپ جۇرگەن جوقپىز عوي. ءبىر رەت قانا بەرىلدى. ولارعا دا كومەك بولسىن. ماما, مەن سوندا جاماندىق جاسادىم با؟ – دەپتى العاشىندا قاتتى رەنجىپ قالعان اناسىنا.
وسىندايدا دۇكەن ساتۋشىسىنىڭ ايتقانى دا ەسىمە ءتۇستى. كەشكىلىك ۋاقىتتا ازىق-ت ۇلىك, كوكونىس ساتاتىن دۇكەنىمىزگە ءبىر جاس جىگىت جۇگىرىپ كىردى.
– اپايلار, 800 تەڭگە تاۋىپ بەرىڭىزدەرشى! بار اقشامدى تارتىپ الىپ, ءوزىمدى سوققىعا جىققاندارى بىرەۋلەردىڭ. اۋىلعا قايتا الماي تۇرمىن, كومەكتەسىڭىزدەرشى, – دەدى ەنتىگىپ. ەكى ساتۋشى ءبىر-بىرىمىزگە قارادىق. جىگىتتىڭ ءتۇسى شىنىمەن دە ادام ايارلىقتاي. بۇل ءبىر ەمەس, ءدال وسى جىگىت سياقتى 20, 50, 100 تەڭگە سۇراپ كەلەتىندەر دە جەتەدى. اراق ىشەتىندەرىن بىلەسىڭ دە, ەشتەڭە جوق دەپ قۋىپ جىبەرەتىنبىز. ءبارىمىز دە بالا ءوسىرىپ وتىرمىز عوي, جانىمىز اشىپ, جىگىتتىڭ سۇراعان اقشاسىن بەرىپ, شىعارىپ سالدىق. سودان, ارادا جارتى جىلداي ۋاقىت وتكەندە, ءبىر كۇنى الگى جىگىت كەلىپ تۇر. ەسكى تانىستاي ءجون سۇراسىپ جاتىرمىز:
– اپايلار, راحمەت سىزدەرگە! سول ءتۇنى سەمەي ارقىلى جۇرەتىن اۆتوبۋسپەن اۋىلعا جەتتىم. شەشەم ۋايىمداپ, دالادا كۇتىپ ءجۇر ەكەن, – دەپ 800 تەڭگەنى اكەپ تۇر. قولىندا اناسىنىڭ بىزگە بەرىپ جىبەرگەن قۇرت-ىرىمشىگى مەن مايى تاعى بار.
ءيا, مەيىرىمنىڭ, جان جىلۋىنىڭ, جاناشىرلىقتىڭ اينالامىزدا جۇرگەنىنە قۋاناسىڭ. مەيىرىمدى بولساڭىز, مەيىرىمگە بولەنەسىز دەپ تۇرعانداي.
پاۆلودار وبلىسى