دەپۋتاتتىق كورپۋس پەن ۇكىمەتتىڭ بىرلەسكەن جۇمىسى Nur Otan پارتياسىنىڭ سايلاۋالدى باعدارلاماسىنىڭ قاجەتتى زاڭنامالىق نەگىزىن قالىپتاستىرىپ, پارتيانىڭ سايلاۋ الدىنداعى بارلىق مىندەتتەمەلەرىن ورىنداۋعا مۇمكىندىك بەردى. بۇل تۋرالى ماجىلىستەگى Nur Otan پارتياسى فراكتسياسىنىڭ كەڭەيتىلگەن وتىرىسىندا تالقىلاندى, دەپ حابارلادى ءماجىلىستىڭ ءباسپاسوز قىزمەتى.
پارتيانىڭ «قازاقستان-2021: بىرلىك. تۇراقتىلىق. جاسامپازدىق» اتتى سايلاۋالدى باعدارلاماسىنىڭ ورىندالۋ بارىسىن تالقىلاۋ بەينەكونفەرەنتسيا رەجىمىندە ءوتتى.
جيىنعا قاتىسۋشىلار باعدارلامانى جۇزەگە اسىرۋ بارىسىنا اي سايىن مونيتورينگ جۇرگىزىپ وتىرۋ ەلباسى, Nur Otan پارتياسىنىڭ توراعاسى نۇرسۇلتان نازارباەۆتىڭ العا قويعان تاپسىرماسى ەكەنىن اتاپ ءوتتى. سونىمەن قاتار دەپۋتاتتىق كورپۋس پەن ۇكىمەتتىڭ بىرلەسكەن جۇمىسى, قاجەتتى زاڭنامالىق نەگىز قۇرۋ قازىرگى ۋاقىتتا پارتيانىڭ بارلىق سايلاۋ الدىنداعى مىندەتتەمەلەرىنىڭ 90%-ىن ورىنداۋعا مۇمكىندىك بەرگەنىنە توقتالدى.
فراكتسيانىڭ كەڭەيتىلگەن جينالىسىنا قاتىسقان پرەمەر-مينيستر اسقار ءماميننىڭ ايتۋىنشا, قازىرگى ۋاقىتتا الدا تۇرعان بارلىق جوسپارلانعان ءىس-شارالار مەرزىمىندە ورىندالماق. وسى رەتتە فراكتسيا مۇشەلەرى سايلاۋ الدىنداعى مىندەتتەمەلەردى ورىنداۋ ولاردىڭ تۇراقتى باقىلاۋىندا بولاتىنىن اتاپ ءوتتى.
زاڭ جوبالارى بويىنشا جۇمىس بارىسىندا دەپۋتاتتار پارتيانىڭ العا قويعان مىندەتتەرىن شەشۋدە, ەڭ الدىمەن, قاجەتتى قارجى رەسۋرستارىن قامتاماسىز ەتۋدىڭ ناقتى جولدارىن ىزدەستىرۋگە باسا نازار اۋداردى.
سونىمەن قاتار ءماجىلىس دەپۋتاتتارى ىشكى نارىقتى وتاندىق ونىمدەرمەن تولىقتىرىپ, تۇرعىن ۇيمەن قامتاماسىز ەتۋ, اتاۋلى الەۋمەتتىك كومەكتى تاعايىنداۋداعى اشىقتىق ءۇشىن مەملەكەتتىك ورگانداردىڭ اقپاراتتىق جۇيەلەرىن «E-Halyk» اقپاراتتىق جۇيەسىمەن بىرىكتىرۋدىڭ مەرزىمدەرىن اياقتاۋ سىندى بىرقاتار ماسەلەنى كوتەردى.