پەتروپاۆلدا قىزىل پالە قىزىپ تۇر

قازىرگى كەزەڭنىڭ تاعى ءبىر ەرەكشەلىگى سول – ول اۋدان ورتالىقتارى مەن اۋىلدىق جەرلەردە دە ءورشىپ تۇر. العاشقى كەزەڭدە مۇنداي جاعداي مۇلدە بايقالماعان ەدى. سونىڭ كەسىرىنەن ايىرتاۋ, اقجار, ش.ءۋاليحانوۆ, ع.مۇسىرەپوۆ جانە تايىنشا اۋداندارى تولىعىمەن كارانتينگە جابىلىپ, بلوك-بەكەتتەر قويىلدى. شال اقىن اۋدانىنداعى جاڭاجول مەن م.جۇماباەۆ اۋدانىنداعى تامان اۋىلدارى دا كارانتينگە جابىلدى. قازىر وبلىستاعى ناۋقاسقا ۇشىراعاندار سانى 700-دەن اسىپ كەتتى جانە بۇل سان توقتاۋسىز وسۋدە.

كەشە سولتۇستىك قازاقستان وبلىسىنىڭ تاۋارلار مەن قىزمەتتەردىڭ قاۋىپسىزدىگى مەن ساپاسىن باقىلاۋ دەپارتامەنتىنىڭ باستىعى نەمەسە قىسقا سوزبەن ايتقاندا باس سانيتارلىق دارىگەر سەرىكباي قاسماقاسوۆ پەن پەتروپاۆل قالاسى اكىمىنىڭ ورىنباسارى اسقار حابيبۋلين جۋرناليستەرگە سۇحبات بەرىپ, وبلىس پەن قالاداعى جامان ىندەتكە قارسى كۇرەستىڭ احۋالى تۋرالى باياندادى.  س.قاسماقاسوۆ الدىمىزداعى دەمالىس كۇندەرى قالاداعى بارلىق سۋپەر جانە گيپەرماركەتتەر جابىلاتىنىن ەسكەرتتى.

"حالىقتىڭ تەك جۇمىس پەن دارىحاناعا جانە ءۇيىنىڭ ماڭىنداعى ازىق-ت ۇلىك دۇكەندەرىنە عانا بارۋىنا رۇقسات ەتىلەدى. بارلىق ساۋدا ويىن-ساۋىق ورىندارى, ءدىني مەكەمەلەر, دەمالىس پاركتەرى, جاعاجايلار, بيزنەس ورتالىقتارى, بازارلار, قوعامدىق مونشالار مەن ساۋنالار جابىلادى, قوعامدىق كولىكتىڭ ءجۇرۋى توقتاتىلادى. پاتەر يەلەرى كووپەراتيۆتەرىنىڭ باسشىلارىنا وسى كۇندەرى اۋلالاردى, بالالار وينايتىن الاڭداردى, اۆتوتۇراقتاردى ديزەنفەكتسيالاۋ ۇسىنىلادى", دەدى ول. سونىمەن بىرگە ادامداردىڭ ءبىر-بىرىنەن الىس بولۋى, قولدارىن ۇنەمى جۋىپ وتىرۋى, ىستىقتارىن ءجيى ولشەپ تۇرۋى سۇرالاتىنىن جەتكىزدى. "تەك قانا وسى شەكتەۋلەردى قاتتى ساقتاعاندا عانا ءبىز دەرتتى قۇرىقتاي الاتىن بولامىز. سوندىقتان ءبىزدىڭ تالاپتارىمىزعا تۇسىنىستىكپەن قاراڭىزدار", دەدى س.قاسماقاسوۆ.  

قالا اكىمىنىڭ ورىنباسارى اسقار حابيبۋلين وسى تالاپتاردى ورىنداماعان زاڭدى تۇلعالار مەن جەكە تۇلعالارعا ايىپپۇل سالىناتىنىن جەتكىزدى. قازىردىڭ وزىندە 16 ماتەريال جينالىپ, ءىس سوتقا وتكىزۋگە دايىندالۋدا دەدى ول.

"جاتتىعۋ زالدارىنا جاسىرىنىپ بارعىسى كەلەتىن ادامدارعا, وتباسىلىق شارالاردى ەسىكتەرىن جاۋىپ الىپ وتكىزگىسى كەلەتىن ءدامحانالار مەن مەيرامحانالارعا دا ايىپپۇل سالىناتىنىن ەسكەرتەمىن. قازىردىڭ وزىندە 4 مەيرامحانانىڭ جۇمىسى توقتاتىلىپ, ليتسەنزياسىن قايتارىپ الدىق. وسىنىڭ ءبارى حالىقتىڭ دەنساۋلىعىن ساقتاۋ ءۇشىن جاسالىپ جاتقان قاتاڭ شارالار, سوندىقتان وندايلارعا تۇرعىندار تۇسىنىستىكپەن قاراۋلارى كەرەك", دەدى ا.حابيبۋلين.

سونىمەن بىرگە دەرتتى تاراتۋ وشاقتارى حقكو مەن بالاباقشالاردان شىققانى دا بەلگىلى بولعان. سوندىقتان حقكو ونلاين رەجىمدە جۇمىس ىستەۋگە كوشىرىلگەن. قالانىڭ ءتورت بالاباقشاسى كارانتينگە جابىلعان. ءبىر دۇكەن, ءبىر سۇلۋلىق سالونىنا ايىپپۇلدار سالىنعان.

شىنىن ايتۋ كەرەك, قىزىل پالە باستالعاننان بەرى قىزىلجاردا مۇنداي دۇربەلەڭ بولعان جوق ەدى. ەندى وبلىس تۇرعىندارى ونى دا كوردى, ايتەۋىر ارتى دۇرىس بولىپ, ىندەتتىڭ بەتى قايىرىلسا بولعانى.