رەسەي ازاماتىنا ايىپپۇل سالىندى

وبلىس پروكۋراتۋراسىنىڭ ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى الەۋمەتتىك جەلىلەرگە مونيتورينگ جۇرگىزۋ بارىسىندا قوستاناي وبلىسىندا تۇراتىن 38 جاستاعى رف ازاماتىنىڭ ءدىني مازمۇنداعى ماتەريالدار تاراتقانىن انىقتاپ, ەكى رەت اكىمشىلىك جاۋاپكەرشىلىككە تارتقان.

وعان العاش 2020 جىلعى ناۋرىز ايىندا قوستاناي قالاسىنىڭ سوتى  راديكالدى-ءدىني اعىمدى ناسيحاتتايتىن بەينەماتەريالدار تاراتقانى ءۇشىن 185 570 تەڭگە ايىپپۇل سالعان. بۇل جازا اسا اسەر ەتە قويماسا كەرەك, مامىر ايىندا قوستاناي قالاسىنىڭ مامانداندىرىلعان اكىمشىلىك سوتى ءدال وسى ازاماتقا قر اقبتك-ءنىڭ 490-بابى بويىنشا تاعى 138 900 تەڭگە ايىپپۇل  سالعان.

جىل باسىنان بەرى ايماقتا 6 ادام راديكالدى جانە دەسترۋكتيۆتى ءدىني مازمۇنداعى ماتەريالداردى ساقتاعانى جانە تاراتقانى ءۇشىن قر اقبتك-ءنىڭ 453, 490-باپتارى بويىنشا جالپى كولەمى 1 ميلليون تەڭگەدەن استام ايىپپۇل تۇرىندەگى اكىمشىلىك جاۋاپكەرشىلىككە تارتىلعان.

وبلىس پروكۋراتۋراسىنىڭ ەكسترەميزمگە قارسى ءىس-قيمىل جونىندەگى باسقارماسى وبلىس تۇرعىندارىنا كۇماندى سايتتار مەن توپتارعا كىرمەۋگە كەڭەس بەرەدى.

قوستاناي وبلىسى