ەرتەڭ الەمدىك فۋتبولدىڭ شوق جۇلدىزى ليونەل مەسسيدىڭ تۋعان كۇنى. ارگەنتينا ۇلتتىق قۇراماسى مەن يسپانيانىڭ "بارسەلونا" كلۋبىنىڭ سۇرمەرگەنى 33 جاسقا تولادى, - دەپ جازادى Egemen.kz
ليونەل 1987 جىلدىڭ 24 ماۋسىمىندا ارگەنتينانىڭ روساريو قالاسىندا دۇنيەگە كەلدى. بەس جاسىنان فۋتبولمەن شۇعىلدانعان بالا لەزدە-اق دارا تالانتىمەن وقشاۋلانىپ, 13 جاسىندا ايگىلى "بارسەلونانىڭ" قىراعى ماماندارىنىڭ نازارىنا ىلىكتى. وسىلايشا, ول پيرەنەي تۇبەگىنە اتتاندى. ال مەسسيدىڭ ودان كەيىنگى ءجۇرىپ وتكەن جولى جارقىن جەڭىستەرگە تولى ەكەنىنە بارشا جانكۇيەر كۋا. 2003 جىلى كاتالونيالىق كلۋبتىڭ نەگىزگى قۇراماسىنا قابىلدانعان ول سول كەزدەن بەرى ايتۋلى كوماندانىڭ نامىسىن ابىرويلى قورعاۋدا. ليونەل "بارسەلونامەن" بىرگە بيىك بەلەستەردىڭ بارلىعىن باعىندىرىپ, تالاي رەكوردتىق كورسەتكىشكە قول جەتكىزدى.
ال ارگەنتينا قۇراماسى ساپىندا وليمپيادا چەمپيونى, الەم بىرىنشىلىگىنىڭ كۇمىس جۇلدەگەرى اتاندى. امەريكا كۋبوگىندا سان مارتە جۇلدەگەرلەر قاتارىنان كورىندى. باسقا دا كوپتەگەن ءدۇبىرلى دوپ دودالارىندا مول ولجاعا كەنەلدى.
ەڭ باستىسى, فيفا ۇيىمى مەن "فرانس فۋتبول باسىلىمى تاعايىنداعان الەم مەن ەۋروپانىڭ ەڭ ۇزدىك فۋتبولشىسىنا تيەسىلى "التىن دوپتى" ليونەل مەسسي التى مارتە يەلەندى. سونداي-اق, ول التى رەت "التىن بۋتسىنىڭ" يەگەرى اتاندى. كۇنى بۇگىنگە دەيىن وسى سپورت ءتۇرىن سەرىك ەتكەن تورتكۇل دۇنيەدەگى بىردە-ءبىر ويىنشى ءدال وسىنداي وراسان زور تابىسقا جەتە العان جوق.