ەلباسى تاپسىرماسىنا وراي 2004 جىلدان باستاۋ العان “قىزىلوردا قالاسىنىڭ تۇرعىن ءۇي سەكتورىن جانە جىلۋ, قۋات كوزدەرىن ىلەسپە گازعا كوشىرۋ” جوباسى بۇل كۇندەرى جەمىستى جۇزەگە اسىپ كەلەدى. الدىمەن مۇناي كەنىشتەرىندە ىسىراپ بولىپ جانىپ جاتقان “كوگىلدىر وتىندى” حالىقتىڭ پايداسىنا جاراتۋ ماقساتىندا 2004-2010 جىلدارعا ارنالعان باعدارلاما جاسالعان بولاتىن. سودان بەرى ەلباسىنىڭ تىكەلەي باقىلاۋىندا تۇرعان ماڭىزدى جوبا كىدىرىسسىز ىسكە اسۋدا.
باعدارلاما 2 كەزەڭدى قامتىدى. جوبانىڭ العاشقى كەزەڭىندە, ياعني 2004-2007 جىلدار ارالىعىندا 7,4 ملرد. تەڭگە يگەرىلىپ, قىزىلوردا جىلۋ ەلەكتر ورتالىعى جانە قىزىلوردا وڭتۇستىك جىلۋ ورتالىعى سياقتى ماڭىزدى نىساندارعا, 8 بۋ قازاندىعىنا, 382 كوپ قاباتتى جانە 4 مىڭعا جۋىق جەكە سەكتورداعى تۇرعىن ۇيلەرگە گاز قۇبىرى تارتىلدى.
ودان ءارى 2008-2010 جىلداردى قامتىعان ەكىنشى كەزەڭدە جوبا ءۇشىن بولىنگەن 3,1 ملرد. تەڭگەگە 463,1 شاقىرىم جوعارى, ورتاشا جانە تومەنگى قىسىمداعى گاز قۇبىرلارى جۇرگىزىلدى. ءبىرىنشى كەزەڭدە گازعا قوسىلماعان كوپ قاباتتى ۇيلەردىڭ تۇرعىندارى وسى جولى ارزان وتىنعا قول جەتكىزدى.
سونىمەن بىرگە بۇل ۋاقىتتا جەكە تۇرعىن ۇيلەر يەلەرىنىڭ ارزان دا ءتيىمدى جىلۋ كوزىنە دەگەن سۇرانىسى ەسەلەپ ارتتى. قىس بويى بىرنەشە توننا كومىر مەن وتىنعا كەتەتىن شىعىننىڭ قىسقارعانىنا جۇرتشىلىق ءدان ريزا. بيىل قىزىلوردا قالاسىن گازداندىرۋ 76 پايىزدىڭ دەڭگەيىنە جەتتى. بۇل كورسەتكىش گازداندىرۋ باعدارلاماسىنىڭ باسىم بولىگى ەڭسەرىلىپ, تولىققاندى جۇزەگە اسۋىنا جاقىن قالعانىن ايعاقتايدى.
وتكەن جىلى سىربويىلىقتاردىڭ 1 تەكشە مەتر گازعا وتەيتىن تولەمى 37 پايىزعا ارزاندادى. قىزىلوردا قالاسىنىڭ تۇرعىندارى “كوگىلدىر وتىن” ءۇشىن ەڭ ارزان اقى تولەيتىن بولدى. جىلۋ جانە قۋات كوزدەرى باعاسىنىڭ تومەندەۋى ءوز كەزەگىندە قالانىڭ ەكونوميكالىق, يندۋستريالىق-يننوۆاتسيالىق دامۋىنا, تۇرعىنداردىڭ الەۋمەتتىك جاعدايىنىڭ جاقسارۋىنا وڭ ىقپال جاسادى. ونىڭ ۇستىنە سۇيىتىلعان گازدىڭ باعاسى دا 3 ەسەگە ارزاندادى.
العاشقى جوبانى 2010, ياعني, ۇستىمىزدەگى جىلى اياقتاۋ جوسپارلانعان بولاتىن. دەگەنمەن, بيىلعى گازداندىرۋ جۇمىستارىنا 1,384 ملرد. تەڭگە ءبولىنىپ, قالعان 875 ملن. تەڭگە 2011 جىلعا جىلجىتىلىپ وتىر.
جوبا جۇزەگە اسقان جىلدارى گازداندىرۋ باعدارلاماسىنا ەنبەي قالعان ۇيلەردىڭ ماسەلەسى كۇردەلى كۇيىندە قالىپ كەلگەن ەدى. بۇل ءتۇيىننىڭ شەشىمىن تاپقان وبلىس باسشىلىعى 2004 جىلعا دەيىن تۇرعىزىلعان ۇيلەرگە “كوگىلدىر وتىن” جەتكىزۋدىڭ جولدارىن ءجىتى زەردەلەدى. ءسويتىپ, بيىلعى جىلدىڭ جوباسىنا ەنگىزدى. الداعى ۋاقىتتا گاز جەتكىزىلمەگەن ايماقتاردىڭ ءماسەلەسى دە تۇبەگەيلى شەشىلەتىن بولادى.
ەركىن ءابىل.
قىزىلوردا.