قۇرمانعازى اۋدانىندا تۇراتىن عالىمجان مۇقاشەۆتىڭ ماماندىعى – ەسەپشى. بىراق بالا كەزىنەن تاريحي جادىگەرلەردى, كونەنىڭ كوزىنە اينالعان بۇيىمداردى جيناۋعا اۋەس بولىپتى.
الدىمەن تىگىنشىلىگىمەن تانىمال بولعان اناسى مولقۇيما قۇسپانعاليەۆا اياقپەن قوزعالىسقا كەلتىرىلەتىن ۇرشىعىن دالاعا تاستاعىسى كەلمەپتى. ءسويتىپ, اناسى تۇتىنعان بۇيىمداردى كونەنىڭ كوزىندەي ساقتاۋدى ءجون كورەدى. كەيىن سوعىس ارداگەرى, ىشكى ىستەر سالاسىنىڭ ۇزدىگى اتانعان اكەسى باتىرعالي مۇقاشەۆتىڭ قولدانعان بۇيىمدارىن دا جيناقتايدى.
وسىلايشا, ءوز ۇيىندە مۋزەي جاساقتالا باستاعانىن بايقاماي قالادى. كەيىن مۋزەي قورى اۋىل ازاماتتارىنىڭ بۇيىمدارىمەن تولىعىپ, وتكەن عاسىردىڭ 60-70-جىلدارىن كوز الدىڭىزعا ەلەستەتەدى. كەيبىر جادىگەرلەردىڭ جۇزجىلدىق تاريحى بار. مۋزەي بىلتە شام, ۇتىك, قۇمان سەكىلدى تۇرمىستىق بۇيىمدارمەن تولىقتى. ءتىپتى ديىرمەننىڭ تاسى دا تۇر. تەلەۆيزور مەن راديوقابىلداعىشتىڭ, مۋزىكالىق اسپاپتاردىڭ بىرنەشە ءتۇرى بار. تاۋەلسىزدىكپەن بىرگە اينالىمعا ەنگەن تەڭگەنىڭ العاشقى نۇسقالارىن دا كەزدەستىرۋگە بولادى.
– ءان جازىلعان پلاستينكانى اينالدىراتىن ەسكى پاتەفوندى تابۋ قيىن عوي. ءىس تىگەتىن ماشينا, راديونىڭ بىرنەشە ءتۇرى – مۇنىڭ ءبارى كونە جادىگەر. كەيبىرىن اعايىنداردان, دوستارىمنان سۇراپ الدىم. بەلگىلى قالامگەر راحمەت يمانعاليەۆتىڭ جازۋ ماشينكاسىن بالالارى تاپسىردى. يدايات قۋانعاليەۆ دەگەن كورشىمنىڭ ترانزيستورىن اعانىڭ كوزىندەي ساقتاپ وتىرمىن, – دەيدى عالىمجان مۇقاشەۆ.
قولى بوساعان ساتتە ءوزى جاساقتاعان شاعىن مۋزەيدەگى كونە بۇيىمداردى قالپىنا كەلتىرىپ, كەيبىرىن وڭدەيدى. سول سەبەپتەن بولار, ەلۋ جىل بۇرىنعى پاتەفوندار, راديو-ترانزيستورلار ءالى كۇنگە دەيىن جۇمىس ىستەيدى. مىس پەن جەزدەن, اعاشتان جاسالعان كونە بۇيىم, اسىرەسە تەلەفون مەن فوتواپپاراتتىڭ الۋان ءتۇرى ءتىزىلىپ تۇر. بولاشاقتا مۋزەيدى كەڭەيتىپ, اۋدان جۇرتشىلىعىنا تانىستىرۋدى ماقسات ەتىپ وتىر. كەيبىر جادىگەردىڭ تۇسىنا شىققان جىلىن, اتاۋىن جازىپ قويۋدى قولعا الماق.
اتىراۋ وبلىسى