وبلىس ورتالىعىندا قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلىنىڭ قاتىسۋىمەن ءدىني باسقارمانىڭ عۇلامالار كەڭەسىنىڭ XXV ءماجىلىسى ءوتتى. ماجىلىستەن سوڭ وڭىردەگى از قامتامسىز ەتىلگەن 100 وتباسىعا ارنايى سىيلىق تابىس ەتىلدى.
ال باسقارمانىڭ «زەكەت» قورى باستاماسىمەن «ەل ۇلەسى – پاتەرگە» قايىرىمدىلىق شاراسى جالعاسۋدا. قور ارقىلى ەلىمىزدىڭ بارلىق وڭىرلەرىندە تۇراتىن مۇقتاج جاندارعا 235 پاتەر تابىستالعان ەكەن. قايىرىمدىلىق شاراسى اياسىندا وڭىرىمىزدە 7 وتباسىعا پاتەر بەرىلگەن.
باس ءمۇفتيدىڭ قولىنان 235-ءشى بولىپ, 2 بولمەلى پاتەر كىلتىن العان حينايات قاسىپ مايقايىڭ كەنتىندە تۇرادى.
– ادام بالاسى ءۇشىن باسپانانىڭ ورنى ەرەكشە. شارشاعاندا تىنىعاتىن, قۇلشىلىق جاساپ, دۇعا ەتەتىن, بالا-شاعاڭمەن قاۋىشىپ, قۋانىشقا بولەنەتىن, قوناق كۇتىپ, باتاسىن الاتىن مەكەنىڭ. سوندىقتان وسى ءۇيدى يگىلىك جولىندا پايدالانۋىڭىزعا تىلەكتەسپىن. وسى وتباسىعا قولداۋ ءبىلدىرىپ, قۋانىشىن ەسەلەگەن ادامدارعا اللا رازى بولسىن. جاساعان قايىرىمدىلىقتىڭ قايىرىن وزدەرىڭىز دە كورىڭىزدەر, – دەدى ناۋرىزباي قاجى تاعان ۇلى.
– بۇل اپايىمىز ءوزى جالعىز 5 بالانى تاربيەلەپ وسىرۋدە. 1992 جىلى موڭعوليادان العاشقىلاردىڭ ءبىرى بولىپ, ەلگە ورالعان. باسپاناسىز ءار جەردە ءجۇرىپ, قيىندىق كورگەن انانىڭ پاتەر العانىنا ءبارىمىز دە قۋانىشتىمىز. الداعى ۋاقىتتا تاعى ءبىر وتباسىعا پاتەر سىيلاساق دەگەن ويىمىز بار, – دەيدى كەنتتەگى مەشىت يمامى سولدات بوداۋبەك.
ايتۋىنشا, حينايات قاسىپتىڭ پاتەر الۋى بۇل كەنتتەگى مەشىت القا مۇشەلەرىنىڭ باستاماسى جانە ۇيعارىمىمەن جاسالعان يگىلىكتى ءىس. بىلتىر تاعى ءبىر جالعىزىلىكتى انانىڭ پاتەرىنىڭ شاتىرىن جوندەۋگە كومەك جاسالىپ, 10 وتباسىعا كارتوپ تاراتىلعان.
ال مەشىت اۋلاسىندا قايىرىمدىلىق جارمەڭكەلەرى وتكىزىلىپ, ودان تۇسكەن قارجى «زەكەت» قورىنا اۋدارىلادى, قالعانى جەرگىلىكتى وتباسىلارعا كومەككە بەرىلەدى.
وتكەن جىلى ۇشق ۇلىن اۋىلى ورتا مەكتەبىنىڭ 4 وقۋشىسى قىسقى جىلى, قىمبات, ساپالى كۇرتەشەلەرمەن قامتاماسىز ەتىلىپتى.
جالپى, «زەكەت» قور-الەۋمەتتىك, قايىرىمدىلىق, مادەني, ءبىلىم بەرۋ جانە قوعامعا پايدالى يگى دە ىزگى ماقساتتاردى جۇزەگە اسىرۋ ءۇشىن قۇرىلعان كوممەرتسيالىق ەمەس ۇيىم. قوردىڭ نەگىزگى ماقساتى – قاسيەتتى قۇران كارىم مەن پايعامبارىمىز مۇحاممەدتىڭ (س.ع.س.) سۇننەتىمەن شاريعات ۇكىمدەرىنە سايكەس زەكەتتىڭ جيناقتالۋى مەن تاراتىلۋىن جۇزەگە اسىرۋ.
ال ادامدار اراسىندا مەيىرىمدىلىك, باۋىرمالدىق, جاناشىرلىق سەزىمىن وياتاتىن قايىرلى ءىس جاساۋ – بارىمىزگە ورتاق. «جاقسىلىق جاساپ جارىس» دەيدى حاديس. مەشىت قىزمەتكەرلەرىنىڭ تۇرمىسى تومەن, مۇقتاج وتباسىلارعا كومەك قولىن سوزعان قايىرىمدىلىق جارىسى بارىمىزگە ۇلگى بولسىن.
پاۆلودار وبلىسى